Ũhoro Ũrĩa Mwega nĩ Ũrĩkũ?

“Ũhoro-ũyũ-Mwega . . . ”—MATHAYO 24:14.

AKRISTIANO magĩrĩirũo nĩ kũhunjia “Ũhoro-ũyũ-Mwega wa ũthamaki” na njĩra ya kwĩra andũ ũhoro wa Ũthamaki ũcio na kũmataarĩria atĩ nĩguo thirikari ĩrĩa ĩgaathamaka thĩ yothe na ũthingu. Ona kũrĩ ũguo ciugo ici ‘ũhoro mwega’ nĩ ihũthĩrĩtwo na njĩra ingĩ thĩinĩ wa Bibilia. Kwa ngerekano-rĩ, nĩ ĩgwetete “ũhoro ũrĩa mwega wa ũhonokio” (Thaburi 96:2 NW); “ũhoro ũrĩa mwega wa Ngai” (Aroma 15:16); “Ũhoro ũrĩa mwega wa Jesu Kristo.”—Mariko 1:1.

Na njĩra nguhĩ, ũhoro ũrĩa mwega nĩ ma iria ciothe Jesu aaririe ũhoro wacio na iria arutwo ake maandĩkire. Mbere ya kwambata igũrũ-rĩ, Jesu eerire arutwo ake ũũ: “Nĩ ũndũ ũcio, thiĩi mũgatũme andũ a ndũrĩrĩ ciothe matuĩke arutwo akwa, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa Roho Mũtheru: mũkĩmarutaga kũrũmia maũndũ marĩa mothe ndĩmwathĩte inyuĩ.” (Mathayo 28:19, 20) Kwoguo wĩra wa Akristiano a ma to kũmenyithia andũ ũhoro wa Ũthamaki; no mũhaka ningĩ merutanĩrie gũtua andũ arutwo.

Makanitha mekaga atĩa ũndũ-inĩ ũcio? Andũ aingĩ matiũĩ Ũthamaki nĩ kĩĩ na kwoguo matingĩhota kũrũta arĩa angĩ ũhoro waguo ũrĩa kwagĩrĩire. Ithenya rĩa ũguo, mahunjagia o maũndũ marĩa mangĩkenia andũ ta ũhoro wa kuoherũo mehia na wĩtĩkio thĩinĩ wa Jesu. Ningĩ nĩ macaragia arũmĩrĩri na njĩra ya kũgeria kwagĩria mĩtũũrĩre ya andũ kana gwaka macukuru, mathibitarĩ na mĩciĩ ya athĩni. O na gũtuĩka maũndũ ta macio nĩ matũmaga arũmĩrĩri mongerereke-rĩ, matiteithagia andũ matuĩke Akristiano a ma na matũũre kũringana na ũrutani wa Jesu.

Mũthomi ũmwe wa maũndũ ma ndini aandĩkire ũũ: “Athomi na atongoria aingĩ a ndini cia Gĩkristiano nĩ metĩkagĩra atĩ nĩ twagĩrĩirũo nĩ gũtua andũ arutwo a Jesu na kũmaruta gwĩka maũndũ mothe marĩa aarutanire. . . . Jesu nĩ onanirie wega biũ ũrĩa ũndũ ũcio wagĩrĩirũo nĩ gwĩkwo. Tũtiĩkaga ũrĩa oigire. Tũtigeragia gwĩka ũguo o na hanini. Anga o na tũtiũĩ ũrĩa tũngĩruta wĩra ũcio.”

Kũringana na ũthuthuria, gĩcunjĩ kĩa 95 harĩ igana kĩa Agatoreki thĩinĩ wa Amerika, nĩ meetĩkĩrire atĩ kũringana na wĩtĩkio wao nĩ magĩrĩirũo nĩ kũhunjia ũhoro ũrĩa mwega. O na kũrĩ ũguo-rĩ, aingĩ ao moigire atĩ njĩra ĩrĩa njega mũno ya gwĩka ũguo, ti ya kwaria na kanua, no nĩ gũkorũo marĩ kĩonereria kĩega kũrĩ andũ arĩa angĩ. Ũmwe wa arĩa maahoirũo ũhoro oigire atĩ: “Kũhunjia nĩ ngũrani na, ciugo theri. Nĩ ithuĩ twagĩrĩirũo gũkorũo tũrĩ Ũhoro ũrĩa Mwega.” Ngathĩti ya U.S. Catholic, ĩrĩa yekire ũthuthuria ũcio yoigire atĩ andũ aingĩ magaga kwaria ũhoro wa wĩtĩkio wao nĩ “ũrĩa kanitha ũcambĩte nĩ ũndũ wa riboti cia ica ikuhĩ ciĩgiĩ ngomanio itagĩrĩire na morutani mahĩtanu.”

Nake bishobu ũmwe wa kanitha wa Methodisti, oigire atĩ kanitha wake nĩ ũgayũkanĩte ũgaturura na ũkaaga ũhoti wa kũruta wĩra waguo, na mĩtugo ya arũmĩrĩri ĩkahaana o ta ya andũ arĩa angĩ. Akuĩte ngoro oririe ũũ: “Nĩa makĩagĩrĩirũo nĩ kũhunjia ũhoro ũrĩa mwega wa Ũthamaki?”

Bishobu ũcio ndaigana gũcokia kĩũria kĩu. No nĩ kũrĩ macokio, na nĩ ũkũmoona gĩcunjĩ-inĩ kĩrĩa kĩrũmĩrĩire.

Ũhoro ũrĩa mwega ũkoniĩ Ũthamaki wa Ngai na ũhonokio kũgerera wĩtĩkio harĩ Jesu Kristo