Jesu Kristo Kũna Nũũ?

“Nake aakinya Jerusalemu, andũ a itũũra rĩu rĩothe makiumrrũka makĩũranagia, Nũ ũyũ? Nakĩo kĩrĩndĩ gĩgĩcokia atĩrĩ, Ũyũ nĩwe Jesu, mũnabii wa Nazarethi, itũũra rĩa Galili.”​—MATHAYO 21:10, 11.

NĨ KĨĨ gĩatũmire andũ moimũrũrũke ũguo, Jesu Kristoa aingĩra itũũra-inĩ rĩa Jerusalemu kĩmera-inĩ kĩa 33 M.M. (Mahinda Maitũ)? Aingĩ nĩ maaiguĩte ũhoro wa Jesu na maũndũ ma magegania marĩa eekĩte. Maikaraga makĩheaga arĩa angĩ ũhoro wake. (Johana 12:17-19) O na kũrĩ ũguo, kĩrĩndĩ gĩtiamenyaga atĩ mũndũ ũcio waarĩ gatagatĩ-inĩ kao, nĩ angĩagĩire na ũgucĩrĩria harĩ thĩ yothe kwa ihinda rĩa mĩaka mĩingĩ nginya ũmũthĩ!

Ta wĩcirie ũhoro wa ngerekano nyinyi iria cionanagia ũrĩa Jesu akoretwo na ũgucania mũnene harĩ andũ.

▪ Karenda ĩrĩa ĩhũthagĩrũo kũndũ kũingĩ thĩinĩ wa thĩ yumanĩte na mwaka ũrĩa andũ meciragĩria atĩ nĩguo Jesu aaciarirũo.

▪ Andũ ta bilioni igĩrĩ—hakuhĩ gĩcunjĩ gĩa ithatũ kĩa andũ othe thĩinĩ wa thĩ—moigaga nĩ Akristiano.

▪ Ndini ya Aithĩramu, ĩrĩa ĩkoragwo na arũmĩrĩri makĩria ma bilioni ĩmwe thĩinĩ wa thĩ, ĩrutanaga atĩ Jesu nĩ “mũnabii ũkĩrĩte Iburahimu, Nuhu, na Musa.”

▪ Ciugo nyingĩ cia ũũgĩ cia Jesu, nĩ ihũthagĩrũo na njĩra itiganĩte mĩario-inĩ ya o mũthenya. Imwe ciacio nĩ ici:

“Rekei ikũranĩre hamwe [ngano na thawani].”​—MATHAYO 13:30.

“Nengagĩrai Kaisari indo iria cia Kaisari.”​—MATHAYO 22:21.

“Enda mũndũ ũrĩa ũngĩ o ta ũrĩa wĩendete wee mwene.”​—MATHAYO 22:39.

‘Ikaragai mwĩhaarĩirie nginya Jesu agacoka.’​—MATHAYO 24:44.

‘Mũsamaria mwega.’​—LUKA 10:33.

Hatarĩ nganja Jesu nĩ akoretwo na ũgucania harĩ mĩtũũrĩre ya andũ aingĩ. O na kũrĩ ũguo, andũ makoragwo na mawoni na mawĩtĩkio matiganĩte mamwĩgiĩ. Kwoguo, wahota kwĩyũria, ‘Jesu Kristo kũna nũũ?’ Bibilia noyo iki ĩtwĩraga kũrĩa Jesu oimire, ũrĩa aatũũraga, na kĩrĩa gĩatũmire akue. Kũmenya ma icio cimwĩgiĩ no kũgarũre ũtũũro waku mũno—rĩu na nginya ihinda rĩrĩa rĩũkĩte.

[Kohoro ka magũrũ-inĩ]