Ũthĩni Ũkĩrĩtie Njano Ũtariĩ Atĩa?
ŨTHĨNI ũkĩrĩtie njano no ũtũme muoyo wa mũndũ ũkorũo hatĩka-inĩ. Ũguo nĩ kuuga kwaga irio cia kũigana, maĩ, na mwaki o hamwe na gĩikaro kĩega, ũrigitani mwega, na gĩthomo. Ũthĩni ta ũcio ũhutagia andũ bilioni ĩmwe, ũguo nĩ ta kuuga mũigana wa aikari othe a Afrika. Ĩndĩ andũ aingĩ a kũndũ ta Europe ya Ithũĩro na Amerika ya Gathigathini matirĩ mona mũndũ ũrĩ na thĩna ũkĩrĩtie njano. Rekei tũmenye ũhoro wĩgiĩ amwe ao.
Mbarushimana na mũtumia wake, hamwe na ciana ciao ithano maikaraga Rwanda, thĩinĩ wa Afrika. Mwana wao wa gatandatũ oragirũo nĩ malaria. Mbarushimana oigire ũũ: “Baba aatũgaĩire mũgũnda tũrĩ atandatũ. Kamũgũnda karĩa ndaagaĩirũo kaarĩ kanini mũno nginya ngĩthamĩria famĩlĩ yakwa taũni. Tũrĩ na mũtumia wakwa tũrutaga wĩra wa gũkuua mahiga na mũthanga na makũnia. Nyũmba iitũ ndĩrĩ ndirica. Tũtahaga maĩ gĩthima kĩrĩ ceceni-inĩ ya borithi. Kaingĩ tũrĩaga riita rĩmwe mũthenya, no hĩndĩ ĩrĩa twaga wĩra, mũthenya ũcio tũkaaga kũrĩa o nakĩ. Hĩndĩ ta ĩyo nyumaga nja, nĩ kũremwo gũkirĩrĩria kuona ciana ikĩrĩra nĩ kũhũta.”
Victor na Carmen marutaga wĩra wa kũrata iratũ. Maikaraga gataũni-inĩ gatarĩ andũ aingĩ thĩinĩ wa bũrũri wa Bolivia marĩ na ciana ciao ithano. Kanyũmba karĩa makomborete nĩ gakũrũ, nĩ koiraga na gatirĩ thitima. Cukuru ya kũrĩa maikaraga ĩkoragwo na ciana nyingĩ ũũ atĩ nĩguo kairĩtu kao getĩkĩrũo cukuru ĩyo no mũhaka Victor angĩagathondekeire gĩtĩ. Victor na Carmen mathiaga na magũrũ handũ ha kilomita ikũmi kuuna ngũ cia kũruga na gũtherũkia maĩ ma kũnyua. Carmen oigire: “Tũtikoragwo na kĩoro, kwoguo twĩteithagĩria rũũĩ, na no ruo twĩthambagĩra na tũgate gĩko. Kaingĩ ciana nĩ irwaraga.”
Francisco na Ilídia maikaraga gĩcagi-inĩ kĩmwe thĩinĩ wa bũrũri wa Mozambique. Kaana kao kamwe nĩ kooragirũo nĩ malaria thutha wa thibitarĩ ĩmwe kũrega gũkarigita; magĩtigwo na twana tũna tũnini. Nĩ mahandaga mũceere na ngwacĩ kamũgũnda-inĩ kao iria ingĩmaigana kwa ihinda rĩa mĩeri ĩtatũ. Francisco aroiga: “Rĩngĩ nĩ kwagaga kuura kana o na aici makaiya irio, kwoguo nĩ ndutaga wĩra wa gwatũra na kwendia mĩrangi ya gwaka. Ningĩ nĩ tũũnganagia ngũ gĩthaka-inĩ, handũ tũthiaga magũrũ mathaa merĩ. Tũrĩ na mũtumia wakwa, tũkuuaga o mũndũ mũrigo wake, ũmwe wa kũruga kiumia kĩmwe na ũcio ũngĩ wa kwendia.”
Andũ aingĩ nĩ monaga atĩ maũndũ ti mega o na hanini na gũtirĩ na kĩhooto thĩinĩ wa thĩ ĩno ĩrĩa andũ bilioni nyingĩ marĩ na ũtonga mũnene mũno hĩndĩ ĩrĩa mũndũ 1 harĩ 7 maratũũra o ta Mbarushimana, Victor, na Francisco. Kũrĩ andũ maanageria gũcaria kĩhonia kĩa ũndũ ũcio. Gĩcunjĩ kĩrĩa kĩrũmĩrĩire kĩronania maũndũ marĩa mekĩte na mwĩhoko ũrĩa marĩ naguo.
[Mbica]
Carmen na twana twake twĩrĩ, magĩtaha maĩ rũũĩ-inĩ