‘Nĩwe Ngai wa Arĩa Marĩ Muoyo’

Hihi gĩkuũ nĩ kĩrĩ hinya gũkĩra Ngai? Aca! Gũtirĩ hĩndĩ gĩkuũ kana “thũ” ĩngĩ o yothe ĩngĩkorũo na hinya gũkĩra “Mũrungu-Mwene-Hinya.” (1 Akorintho 15:26; Thama 6:3) Ngai arĩ na ũhoti wa gũtooria gĩkuũ kũgerera ũriũkio, na nĩ eranĩire gũgeeka ũguo thĩinĩ wa thĩ njerũ yake.a Tũngĩtĩkia atĩa atĩ kĩĩranĩro kĩu nĩ gĩkaahinga? Mũrũ wa Ngai, Jesu, nĩ aahũthĩrire ciugo ciĩkagĩra kĩĩrĩgĩrĩro gitũ hinya mũno.—Thoma Mathayo 22:31, 32.

Jesu akĩarĩria Asadukai tondũ matietĩkĩtie ũriũkio, aamerire ũũ: “Ha ũhoro wa kũriũka kwa arĩa akuũ-rĩ, kaĩ mũtathomete ciugo iria mwerirũo nĩ Ngai, akiuga, Nĩ niĩ Ngai wa Iburahimu, Ngai wa Isaaka, o na Ngai wa Jakubu? Ngai-rĩ, ti Ngai wa arĩa akuũ no wa arĩa marĩ muoyo.” Jesu aaragia ũhoro wa ndeereti ya Ngai hamwe na Musa kĩhinga-inĩ kĩrĩa gĩaakanaga mwaki, mĩaka ta 3,500 yahĩtũkĩte. (Thama 3:1-6) Kũringana na Jesu, ciugo icio Jehova eerire Musa—“Nĩ niĩ Ngai wa Iburahimu, Ngai wa Isaaka, o na Ngai wa Jakubu”—cionanagia atĩ kĩĩranĩro kĩa ũriũkio no mũhaka gĩgaakinyanĩra. Na njĩra ĩrĩkũ?

Amba wĩcirie ũrĩa gwatariĩ. Jehova akĩaria na Musa, Iburahimu aakuĩte mbere ĩyo mĩaka 329, Isaaka mĩaka 224, na Jakubu mĩaka 197. O na kũrĩ ũguo, Jehova oigire ‘Ndĩ Ngai’ wao, ndoigire ‘Niĩ ndaarĩ’ Ngai wao. Jehova aaririe ũhoro wa athuri acio atatũ a tene ta maarĩ o muoyo. Nĩkĩ?

Jesu aatarĩirie ũũ: “[Jehova] ti Ngai wa arĩa akuũ no wa arĩa marĩ muoyo.” Wĩcirie o hanini ũrĩa ciugo icio ciugĩte. Gũtangĩrĩ ũriũkio-rĩ, Iburahimu, Isaaka, na Jakubu matingĩgacoka muoyo o rĩ o rĩ. Korũo andũ matikariũkio, Jehova angĩrĩ Ngai wa ciimba. Na njĩra ĩyo, gĩkuũ kĩngĩkorũo kĩrĩ na hinya kũrĩ Jehova ũndũ atangĩhota gũkũũra ndungata ciake njĩhokeku kuuma hinya-inĩ wakĩo.

Tũkiuge atĩa ũhoro-inĩ wa Iburahimu, Isaaka, Jakubu, na ndungata ciothe njĩhokeku cia Jehova iria ikuĩte? Jesu oigire ũũ na kinyi: “Maitho-inĩ make othe marĩ muoyo.” (Luka 20:38, New World Translation) Muoroto wa Jehova wa kũriũkia ndungata ciake njĩhokeku nĩ wa ma biũ ũũ atĩ acionaga ta irĩ muoyo. (Aroma 4:16, 17) Jehova ekũiga andũ othe ta acio thĩinĩ wa kĩririkano gĩake gĩtangĩtharũka nginya hĩndĩ yake ya kũmacokia muoyo ĩkinye.

Hihi nĩ ũcanjamũragwo nĩ kĩrĩgĩrĩro gĩa gũgaacemania hĩndĩ ya ũriũkio na mũndũ wendete? Angĩkorũo nĩguo, ririkana atĩ Jehova arĩ na ũhoti ũkĩrĩte wa gĩkuũ. Gũtirĩ kĩndũ kĩngĩgiria ahingie kĩĩranĩro gĩake gĩa kũriũkia akuũ. Na githĩ ti wega wĩrute makĩria ũhoro wa kĩĩranĩro kĩa ũriũkio na ũhoro wa Ngai ũrĩa ũkaahingia kĩĩranĩro kĩu! Weka ũguo, hatarĩ nganja nĩ ũgũkuhĩrĩria Jehova makĩria, “Ngai wa arĩa . . . marĩ muoyo.”