HIHI NĨ ŨRARIRIKANA?

Nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Nĩ hĩndĩ ĩrĩkũ Jesu ‘aahunjĩirie maroho marĩa matũire mohetwo’? (1 Pet. 3:19)

Kuonekaga atĩ thutha wa kũriũka gwake, Jesu nĩ aamenyithirie maroho macio moru ũhoro wa iherithia rĩrĩa rĩmetereire.​—6/15, karatathi ka 23.

Nĩ moritũ marĩkũ matatũ mangĩĩyumĩria kĩhiko-inĩ gĩa kerĩ?

Kũringithania kĩhiko gĩaku gĩa kerĩ na kĩrĩa kĩa mbere; gũthiĩ na mbere gũtwarana na arata aku a tene arĩa matoyaine na ũrĩa mũhikanĩtie nake; kwĩhoka ũrĩa mũhikanĩtie nake o na angĩkorũo ũrĩa mwahikanĩtie nake ndaarĩ mwĩhokeku.​—7/1, karatathi ga 9-10.

Jesu akaamũrania andũ a mũhaano wa ngʼondu na wa mbũri rĩ? (Mat. 25:32)

Hĩndĩ ya thĩna ũrĩa mũnene, thutha wa kũniinwo kwa ndini cia maheeni.​—7/15, karatathi ga 6.

Nĩ hĩndĩ ĩrĩkũ andũ arĩa aaganu magwetetwo thĩinĩ wa ngerekano ya ngano na thawani makaarĩra na mahagaranie magego? (Mat. 13:36, 41, 42)

Nĩ hĩndĩ ya thĩna ũrĩa mũnene thutha wa kũmenya atĩ matirĩ na gwa kũũrĩra matikaniinwo.​—7/15, karatathi ga 13.

Ciugo cia Jesu ciĩgiĩ ngombo ĩrĩa ĩĩhokekete na njũgĩ ciambĩrĩirie kũhinga rĩ? (Mat. 24:45-47)

Ciambĩrĩirie kũhinga thutha wa mwaka wa 1914, no ti hĩndĩ ya Bendegothito mwaka wa 33. Mwaka wa 1919 Jesu nĩ aamũrire ngombo ĩrĩa ĩĩhokekete ĩramatage andũ a nyũmba yake, arĩa nĩ hamwe na Akristiano othe arĩa maheagwo irio cia kĩĩroho.​—7/15, karatathi ka 21-23.

Jesu agaatua ngombo ĩrĩa ĩĩhokekete mũramati wa indo ciake ciothe rĩ?

Nĩ ihinda rĩrĩa rĩroka hĩndĩ ya thĩna ũrĩa mũnene, rĩrĩa ngombo ĩrĩa ĩĩhokekete ĩkaamũkĩra ngerenwa yayo ya gũthiĩ igũrũ.​—7/15, karatathi ka 25.

Hihi nĩ kuuga atĩ andũ amwe arĩa matagwetetwo marĩĩtwa mao thĩinĩ wa Bibilia maarĩ oru kana matiarĩ a bata?

Aca. Bibilia ndĩgwetete marĩĩtwa ma andũ othe arĩa maarĩ ega na arĩa maarĩ oru. (Ruth 4:1-3; Mat. 26:18) Bibilia ĩgwetete marĩĩtwa merĩ tu ma araika arĩa maarĩ ehokeku.​—8/1, karatathi ga 10.

Makĩria ma ũteithio wa Ngai-rĩ, nĩ kĩĩ gĩateithirie Aira a Jehova 230 mahonoke rũgendo rũraya rwa kuuma kambĩ ya kũherithĩrio ya Sachsenhausen?

O na gũtuĩka maarĩ ahinyĩrĩrĩku nĩ ũndũ wa kũhũta na kũrũara-rĩ, maathire na mbere gwĩkĩrana ngoro nĩguo mahote kũũmĩrĩria.​—8/15, karatathi ga 18.

Nĩkĩ rũgano rwa Aisiraeli kũringa Rũĩ rwa Jorodani makĩingĩra Bũrũri wa Kĩĩranĩro nĩ rũtwĩkagĩra ngoro?

O na gũtuĩka rũĩ rũu nĩ rwaiyũrĩte mũno, Jehova nĩ aarũrũgamirie rũgĩtiga gũtherera, andũ ake makĩamba kũringa. No mũhaka akorũo ũndũ ũcio nĩ wekĩrire wĩtĩkio na mwĩhoko wao harĩ Jehova hinya. O na ithuĩ nĩ twĩkagĩrũo ngoro mũno nĩ rũgano rũu.​—9/15, karatathi ga 16

Kũgwetwo kwa marangi maita maingĩ thĩinĩ wa Bibilia kuonanagia atĩa?

Kũgwetwo kwa marangi thĩinĩ wa Bibilia kuonanagia atĩ Ngai nĩ oĩ ũrĩa andũ mahutagio nĩ marangi na atĩ marangi no matũteithie kũririkana maũndũ.​—10/1, karatathi ga 14-15.

Ũrathi wa Mika 5:5 wĩgiĩ anene na arĩithi ũrahingio atĩa ũmũthĩ?

Nĩ tũĩ wega atĩ ‘arĩithi mũgwanja na anene anana’ arĩa magwetetwo thĩinĩ wa Mika 5:5 nĩ athuri arĩa mamũrĩtwo thĩinĩ wa ciũngano, arĩa mekagĩra andũ a Ngai hinya nĩguo meharĩrie nĩ ũndũ wa tharĩkĩro ĩrĩa ĩrathĩtwo atĩ nĩ ĩkamaakora.​—11/15, karatathi ka 20.

Tũbataraga Ngai nĩkĩ?

Nĩ tũbataraga ũtongoria mwega na kĩhonia kĩa mathĩna ma ũtũũro, na maũndũ macio moimaga kũrĩ Ngai. Nĩ atũteithagia ũrĩa tũngĩtũũra mũtũũrĩre mwega na ũrĩ na gĩkeno na nĩ akaahingia ciĩranĩro ciake iria irĩ thĩinĩ wa Kiugo gĩake nĩguo ũndũ ũcio ũhoteke.​—12/1, karatathi ga 4-6.