Gĩkuũ Kĩrĩ Ruo!

Andũ aingĩ matiendete kwarĩrĩria ũhoro wĩgiĩ gĩkuũ. O na kũrĩ ũguo, gĩkuũ kĩhutagia andũ othe na gĩkamarehera ruo rũingĩ mũno.

Gũtirĩ mũndũ ũtanyitagwo nĩ kĩeha rĩrĩa akuĩrũo nĩ mũciari, mũthuri, mũtumia o na kana mwana wake. Ũndũ ũterĩgĩrĩirũo nĩ ũũkaga kana mũndũ agakua thutha wa kũrũara kwa ihinda iraya. O na kũrĩ ũguo, tũtingĩhota gwĩthema ruo na kĩeha iria ciumanaga na gĩkuũ.

Antonio, ũrĩa waakuĩrĩirũo nĩ baba wao thutha wa aksidenti ya barabara, oigire ũũ: “Nĩ ta mũndũ ahingĩte nyũmba yaku biũ na agathiĩ na macabi. Ũndũ ũtangĩhota gũcoka kuo o na ũngĩenda. Ũgatigwo ũkĩririkana o ũrĩa yaahanaga. No wende gũtuĩke atĩ ũguo tiguo kũrĩ, no ũũma nĩ atĩ, ũguo nĩguo kũrĩ na gũtirĩ ũndũ ũngĩhota gwĩka.”

Nake Dorothy arĩ wa mĩaka 47 nĩ aakuĩrĩirũo nĩ mũthuriwe. Aarĩ mwarimũ wa gũthomithia ciana kanitha-inĩ wao, na kwoguo ndeetĩkĩtie atĩ gĩkuũ nĩkĩo mũthia, ĩndĩ no eeyũragia ciũria nyingĩ ciĩgiĩ gĩkuũ. Nĩ ũndũ ũcio, akĩũria mũtungatĩri wa kanitha wao wa Anglikani ũũ: “Gũthiaga atĩa harĩ ithuĩ rĩrĩa twakua?” Nake akĩmũcokeria, “Gũtirĩ mũndũ ũĩ, no nĩ tũkaamenya rĩmwe tene.”

No ũguo nĩ kuuga atĩ, “gũtirĩ mũndũ ũĩ” ũrĩa gũthiaga harĩ mũndũ rĩrĩa aakua? Hihi nĩ harĩ kĩndũ kĩngĩtũteithia kũmenya kana kũna gĩkuũ nĩkĩo mũthia?