Mũtitũ wa Biriya thĩinĩ wa Galili
HIHI ŨRĨ WAMENYA?
Hihi thĩinĩ wa Isiraeli ya tene nĩ gwakoragwo na mĩtitũ ta ũrĩa Bibilia yonanagia?
BIBILIA yonanagia atĩ icigo imwe cia Bũrũri wa Kĩĩranĩro nĩ ciakoragwo na mĩtitũ na kwarĩ na mĩtĩ ‘mĩingĩ.’ (1 Ath. 10:27; Josh. 17:15, 18) Tondũ icigo nyingĩ cia bũrũri ũcio itikoragwo na mĩtĩ-rĩ, andũ amwe no mekĩrĩre nganja kana hihi nĩ kũrĩ hĩndĩ kwarĩ mĩtitũ.
Matunda ma mũborothandi
Ibuku rĩĩtagwo Life in Biblical Israel rĩtaaragĩria atĩ icigo nyingĩ thĩinĩ wa Isiraeli ya tene ciarĩ na mĩtitũ gũkĩra ũrĩa irĩ ũmũthĩ. Irĩma-inĩ gwakoragwo na mĩtĩ ta mĩcinda nũgũ (Pinus halepensis), na mĩgandi (Quercus calliprinos). Nakuo kũndũ kũrĩa kwaraganu gwakoragwo na mĩborothandi (Ficus sycomorus) mĩingĩ.
Ibuku rĩĩtagwo Plants of the Bible riugaga atĩ mĩtĩ nĩ yathirire biũ icigo-inĩ imwe cia Isiraeli. Mĩtĩ ĩyo yathirire atĩa? Ibuku rĩu rĩtaaragĩria atĩ ũndũ ũcio wekĩkire kahora kahora. Riugaga ũũ: “Mũndũ aathiire aninĩte mĩtitũ nĩguo agĩe kũndũ gwa kũrĩma, na gwa kũrĩithia, na ningĩ nĩguo one mwaki.”