Kĩũria Kĩrigithagia Andũ Aingĩ

MAWONI megiĩ gĩkuũ nĩ maingĩ na makoragwo marĩ ngũrani. Amwe meciragia atĩ thutha wa gũkua nĩ magathiĩ na mbere gũtũũra, hihi marĩ na mwĩrĩ ũngĩ kana magatũũre kũndũ kũngĩ. Angĩ nao meciragia atĩ nĩ magaciarũo rĩngĩ nĩguo matũũre rĩngĩ. No angĩ nao meciragia atĩ gĩkuũ nĩkĩo mũthia wa maũndũ mothe.

Kũringana na ũrĩa ũreretwo kana ũndũire wanyu, no ũkorũo nĩ ũrĩ na wĩtĩkio waku wĩgiĩ ũndũ ũcio. Tondũ mawoni megiĩ ũrĩa gũthiaga rĩrĩa mũndũ akua nĩ maingĩ ũguo-rĩ, hihi nĩ kũrĩ mũndũ tũngĩũria kana handũ tũngĩona macokio ma ma na ma kwĩhokeka ma kĩũria kĩu kĩrigithagia andũ?

Kwa ihinda rĩa karine nyingĩ, atongoria a ndini nĩ matheremetie ũrutani wa atĩ muoyo wa mũndũ ndũkuaga. Arũmĩrĩri a hakuhĩ ndini ciothe iria nene, Akristiano, Ahĩndĩ, Ayahudi, Aithĩramu, na angĩ, nĩ metĩkĩtie atĩ nĩ gũkoragwo na muoyo ũtangĩkua ũrĩa ũtigaraga mwĩrĩ wakua na ũthiaga gũtũũrania na maroho. Abutha nao metĩkĩtie atĩ kũgerera gũciarũo maita maingĩ, hinya, kana ũhoti wa meciria ũrĩa ũkoragwo thĩinĩ wa mũndũ, no ũkinye ihinda rĩa kwaga mathĩna rĩtagwo Nirvana.

Nĩ ũndũ wa morutani ta macio, andũ aingĩ thĩinĩ wa thĩ nĩ makinyĩrĩire gwĩtĩkia atĩ gĩkuũ nĩ njĩra ya gũthiĩ ũtũũro ũngĩ kũndũ kũngĩ. Nĩ ũndũ ũcio, andũ aingĩ monaga gĩkuũ arĩ gĩcunjĩ kĩa bata kĩa ũtũũro, na makona ta gũkua arĩ wendi wa Ngai. No Bibilia yugaga atĩa ũndũ-inĩ ũcio? Ũkũũrio ũthome gĩcunjĩ gĩkĩ kĩrũmĩrĩire na nĩ ũgũkenera kuona macokio.