Ciũria Kuuma Kũrĩ Athomi

Hihi rĩrĩa Shaitani eerire Hawa atĩ ndangĩakuire thutha wa kũrĩa maciaro ma mũtĩ ũrĩa wa kũmenyithania wega na ũũru, nĩrĩo aambĩrĩirie ũrutani ũrĩa andũ aingĩ metĩkĩtie atĩ andũ nĩ marĩ muoyo ũtakuaga?

Aca. Mũcukani ndeerire Hawa atĩ angĩarĩire itunda rĩrĩa rĩagirĩtio nĩ Ngai, nĩ harĩ gĩcunjĩ kĩmwe kĩa mwĩrĩ wake kĩngĩakuire, no nĩ harĩ gĩcunjĩ kĩngĩ gĩtangĩoneka kĩa mwĩrĩ wake kĩngĩathiire na mbere gũtũũra kũndũ kũngĩ. Shaitani akĩaria kũgerera nyoka, eerire Hawa atĩ angĩarĩire itunda rĩa mũtĩ ũcio ‘ndangĩakuire.’ Eendaga kuonania atĩ Hawa nĩ angĩathiire na mbere gũtũũra na gũkenera ũtũũro mwega gũkũ thĩ atekwĩhoka Ngai.​—Kĩam. 2:17; 3:3-5.

Gũkĩrĩ ũguo-rĩ, angĩkorũo ũrutani wa maheeni ũrĩa ũrutanagwo wĩgiĩ muoyo ũtangĩkua ndwambĩrĩirie Edeni-rĩ, waambĩrĩirie rĩ? Tũtiũĩ wega. Ũrĩa tũĩ nĩ atĩ, ũthathaiya wothe wa maheeni nĩ weeheririo hingo ya Mũiyũro wa matukũ ma Nuhu. Tondũ thutha wa Mũiyũro no Nuhu na famĩlĩ yake maarĩ kuo, na maarĩ athathaiya a Jehova, gũtiarĩ na morutani ma maheeni.

Kwoguo ũrutani ũrĩa ũrutanagwo ũmũthĩ wĩgiĩ muoyo ũtangĩkua, no mũhaka ũkorũo waambĩrĩirie thutha wa Mũiyũro. Rĩrĩa Ngai aahĩngĩcithanirie thiomi cia andũ itũũra-inĩ rĩa Babeli na ‘makĩhurunjũka thĩinĩ wa thĩ yothe,’ no kũhoteke nĩrĩo ũrutani wa muoyo ũtangĩkua waambĩrĩirie gũtherema. (Kĩam. 11:8, 9) Gũtekũmakania kũrĩa ũrutani ũcio wa maheeni woimire, no tũkorũo na ma atĩ Shaitani Mũcukani, o we “ithe wa maheeni,” nĩwe waambĩrĩirie ũrutani ũcio, na nĩ aakenire mũno kuona ũgĩtherema.​—Joh. 8:44.