Wĩra Wĩ Gĩkeno Mũno
1. Nĩ wĩra ũrĩkũ ũrarutwo ũmũthĩ wa gũteithia andũ mamenye Jehova?
1 Andũ arĩa moonire andũ makĩhonio hĩndĩ ya mahinda ma atũmwo nĩ maiyũrirũo nĩ gĩkeno kĩingĩ ngoro-inĩ ciao. (Luk. 5:24-26) Mahinda maitũ, tũkenagĩra wĩra wa gũteithia andũ mamenye Jehova. (Kũg. 22:1, 2, 17) Nĩ ũndũ ũkoragwo ũrĩ wa gĩkeno gũthoma maũndũ marĩa monetwo, marĩa monanagia ũrĩa roho wa Jehova na Kiugo gĩake iteithĩtie andũ kũgarũra mĩtũũrĩre yao! Gĩkeno kĩnene makĩria kiumanaga na kũnyita itemi wĩra ũyũ na njĩra ya gũtongoria wĩruti wa Bibilia na mũndũ ũrathiĩ na mbere wega kĩĩroho.
2. Rĩrĩa twaruta mũndũ ma-rĩ, tũgĩaga na gĩkeno kĩrĩkũ?
2 Rĩĩtwa rĩa Ngai nĩ rĩrĩkũ? Etĩkagĩria mĩnyamaro nĩkĩ? Ũthamaki wa Ngai ũgekĩra andũ atĩa? To gũcokia ciũria icio tu gũtũkenagia, no nĩ nginya kuona gĩkeno kĩrĩa kiumanaga na mũrutwo rĩrĩa areruta ma. (Thim. 15:23; Luk. 24:32) O ũrĩa mũrutwo arathiĩ na mbere kĩĩroho, no ambĩrĩrie kũhũthĩra rĩĩtwa rĩa Jehova, agarũrĩre mĩĩhumbĩre yake, atige mĩthiĩre mĩũru, na ambĩrĩrie kũhunjĩria andũ arĩa angĩ. Angĩthiĩ na mbere eyamũrĩre Ngai na abatithio, no atuĩke ũmwe wa mũriũ kana mwarĩ wa Ithe witũ na mũruti wĩra hamwe na ithuĩ. O ikinya harĩ maya nĩ gĩtũmi gĩa gũkena.—1 Thes. 2:19, 20.
3. Nĩ maũndũ marĩkũ tũngĩka nĩguo twambĩrĩrie kwĩruta Bibilia na mũndũ?
3 Hihi Wee no Ũkorũo na Itemi? Angĩkorũo no wende gũkorũo na itemi thĩinĩ wa wĩra ũyũ ũrĩ gĩkeno mũno-rĩ, hoya Jehova akũhe mweke wa kwĩruta Bibilia na mũndũ, na wĩke kũringana na mahoya maku. (1 Joh. 5:14) Hunjia kũrĩa ũkuona andũ na rĩrĩa maroneka. Ambĩrĩria wĩruti wa Bibilia hĩndĩ ĩrĩa yothe kũngĩhoteka. (Koh. 11:6) Rĩrĩa wona mũndũ wagĩrĩire na wahanda mbegũ ya ma-rĩ, coka rĩngĩ ũmĩitĩrĩrie maĩ.—1 Kor. 3:6-9.
4. Nĩkĩ nĩ twagĩrĩirũo kwambĩrĩria wĩruti wa Bibilia na andũ tũrĩ na mĩtũkĩ?
4 Nĩ kũrĩ andũ aingĩ mũno matigaire, marahũtĩra na kũnyotera ũthingu. Nũũ ũkũhingia mabataro mao ma kĩĩroho na njĩra ya kwĩruta Bibilia hamwe nao? (Mat. 5:3, 6) Rekei twĩrutĩre twĩyendeire, gũteithia kũrĩkia wĩra wa kũhunjia na gũtua andũ arutwo magetha matanathira.—Isa. 6:8.