Hihi Ciana Ciaku nĩ Ciĩhaarĩirie?
1. Ciana iria ithiaga cukuru ibataraga gũkorũo ciĩhaarĩirie nĩkĩ?
1 Rĩrĩa rĩothe ciana ciitũ ciahingũra cukuru thutha wa gũkorũo irĩ rũtha hatarĩ nganja nĩ irĩcemanagia na hatĩka na moritũ maingĩ merũ. O na ningĩ nĩ igũkorũo irĩ na mĩeke ĩngĩ mĩega ya kũruta ‘ũira wa ũhoro-ũrĩa-wa-ma.’ (Joh. 18:37) Hihi nĩ ciĩhaarĩirie?
2. Nĩguo ciana ciaku ikorũo ciĩhaarĩirie-rĩ, ciagĩrĩirũo kũmenya maũndũ marĩkũ?
2 Hihi ciana ciaku nĩ ciũĩ wega nĩ maũndũ marĩkũ makonainie na gũkũngũĩra thigũkũ cia bũrũri na cia ndini cia maheeni, na nĩkĩ kũnyitanĩra maũndũ-inĩ macio arĩ ũũru? Nĩ ciĩhaarĩirie kũhiũrania na hatĩka iria cigũcemania nacio ciĩgiĩ kũrũmĩrĩra gĩthomo kĩa igũrũ, kũgĩa na ũrata wa anake na airĩtu, na kũhũthĩra njohi kana ndawa cia ũrĩu? Hihi mangiuga atĩ ndini yao nĩ ĩgirĩtie ũndũ ũcio ũtaagĩrĩire kana no mahote gũtaarĩria wĩtĩkio wao?—1 Pet. 3:15.
3. Aciari mangĩhũthĩra atĩa hwaĩ-inĩ wa Ũthathaiya wa Famĩlĩ kũhaarĩria ciana ciao?
3 Hũthĩra Hwaĩ-inĩ wa Ũthathaiya wa Famĩlĩ: Hatarĩ nganja, nĩ mũrĩkoragwo na ndeereti mahinda matiganĩte mwaka-inĩ kũringana na ũrĩa moritũ marĩyumagĩria. Mũngĩarĩrĩria mathĩna marĩa macemanagia namo rĩrĩa marĩ cukuru mbere ya mahingũrĩte, ũndũ ũcio no ũtũme magĩe na ũmĩrĩru. Githĩ to mũhũthĩre hwaĩ-inĩ ũmwe kana makĩria wa Ũthathaiya wa Famĩlĩ gwĩka ũguo? No ũũrie ciana ciaku kĩrĩa gĩcithumbũraga makĩria rĩrĩa ciecũrania ũhoro wa gũcoka cukuru. Maũndũ marĩa mwanaarĩrĩria mĩaka mĩhĩtũku no mũmacokere tondũ rĩu ciana icio nĩ inenehete na ikongerera ũtaũku. (Thab. 119:95) Ningĩ no mũkorũo na mahinda ma kwĩmenyeria marĩa mũciari angĩĩtua mwarimũ, mũtaarani wa cukuru kana mũrutwo ũngĩ. Ruta ciana ciaku ũrĩa ingĩcokia ciũria ikĩhũthĩra Bibilia na mabuku ta Kutoa Sababu na Maswali ambayo Vijana Huuliza. Mũciari ũmwe aahũthĩrire mahinda ma kwĩmenyeria hĩndĩ ya Ũthathaiya wao wa Famĩlĩ, kũhaarĩria ciana ciake ũrĩa ingĩaririe na aarimũ erũ kĩambĩrĩria-inĩ kĩa o mwaka na kũmeera atĩ o nĩ Aira a Jehova.—Rora Mnara wa Mlinzi, Disemba 15, 2010, karatathi ga 3-5.
4. Aciari ogĩ megwĩka atĩa?
4 Matukũ maya ma kũrigĩrĩria na “ma ũgwati,” Akristiano ethĩ no mũhaka macemanie na moritũ marĩa marathiĩ na mbere kuongerereka. (2 Tim. 3:1) Aciari ogĩ nĩ marĩgeragia gwĩciria o kabere mathĩna ma ciana ciao na gũcihaarĩria. (Thim. 22:3) Mbere ya mwaka ũngĩ wambĩrĩirie-rĩ, ĩka o ũrĩa wothe ũngĩhota gũteithia ciana ciaku ikorũo ciĩhaarĩirie.