Ndũkanage Kũhunjia nĩ Ũndũ wa Gwĩtigĩra
1. Nĩ ũndũ ũrĩkũ ũbataraga ũcamba, na nĩkĩ?
1 Hihi nĩ ũrĩ waga kũhunjia ũrĩ cukuru nĩ ũndũ wa gwĩtigĩra kũnyũrũrio? Hatarĩ nganja nĩ ũndũ ũbataraga ũcamba kuuga ũrĩa wĩtĩkĩtie, makĩria angĩkorũo nĩ ũrĩ thoni. Nĩ kĩĩ gĩgũgũteithia?
2. Ũũgĩ ũbataranagia atĩa rĩrĩa tũrahunjia tũrĩ cukuru?
2 Hũthĩra Ũũgĩ: O na gũtuĩka cukuru no ĩkorũo ĩrĩ gĩcigo gĩaku kĩũmbe gĩa kũhunjia-rĩ, ririkana atĩ to mũhaka ũhunjĩrie andũ othe ta ũrĩa ũngĩka rĩrĩa ũrahunjia nyũmba kwa nyũmba. Hũthĩra ũũgĩ nĩguo ũmenye nĩ rĩ wagĩrĩirũo kwaria. (Koh. 3:1, 7) Ithomo rĩrĩa mũrathoma kĩrathi kana wĩra ũrĩa mũheetwo no ũkũhe mweke mwega wa kwaria igũrũ rĩgiĩ wĩtĩkio waku. Kana mũrutwo ũngĩ no akũũrie kĩrĩa gĩtũmaga wage kũnyitanĩra maũndũ-inĩ mamwe. Akristiano amwe makoretwo makĩmenyithia arutani ao kĩambĩrĩria-inĩ kĩa mwaka atĩ o nĩ Aira a Jehova na makamahe mabuku mataarĩirie wĩtĩkio witũ. Angĩ nao matigaga mabuku kana ngathĩti ciitũ metha-inĩ ciao nĩguo arutwo arĩa mathomaga nao mamoorie ciũria.
3. Ũngĩĩhaarĩria atĩa kũhunjia ũrĩ cukuru?
3 Koragwo Wĩhaarĩirie: Wehaarĩria wega, ũgũkorũo na ũũma biũ wa ũrĩa ũroiga. (1 Pet. 3:15) Kwoguo geria gwĩciria ciũria iria ũngĩũrio, na wone ũrĩa ũngĩcicokia. (Thim. 15:28) Kũngĩhoteka, korũo ũrĩ na Bibilia yaku na mabuku maigana ũna cukuru ta Kutoa Sababu, Vijana Huuliza, na mabuku megiĩ ũũmbi, nĩguo ũmahũthĩre ũrĩ cukuru rĩrĩa kwabatarania. Ũria aciari aku mũkoragũo na mahinda ma kwĩmenyeria kũhunjia hingo ya ũthathaiya wanyu wa famĩlĩ.
4. Wagĩrĩirũo gũthiĩ na mbere kũhunjia ũrĩ cukuru nĩkĩ?
4 Korũo na Mawoni Mega: Ndũgecirie atĩ arutwo arĩa angĩ megũtũũra makũnyũrũragia rĩrĩa wagweta ũndũ wĩgiĩ ma ya Bibilia. Amwe ao no makenio nĩwe nĩ ũndũ wa kuonania ũcamba na hihi magũthikĩrĩrie. Ndũgakue ngoro angĩkorũo gũtirĩ mũndũ ũgũgũthikĩrĩria. Jehova nĩ egũkena tondũ nĩ wageria. (Ahib. 13:15, 16) Thiĩ na mbere kũmũhoya agũteithie ‘waragie ũmĩrĩirie mũno.’ (Atũm. 4:29; 2 Tim. 1:7, 8) Ta wĩcirie ũrĩa ũngĩigua ũkenete rĩrĩa mũndũ agũthikĩrĩria. Mũndũ ũcio hihi ahota gũgaatuĩka ndungata ya Jehova!