Gũtirĩ Hĩndĩ Tũthiaga Rũũtha
1. Tũmenyaga atĩa atĩ gũtirĩ hĩndĩ ahunjia a karine ya mbere maatuaga atĩ marĩ rũũtha?
1 Ahunjia a karine ya mbere maahunjagia na kĩyo ‘mategũtiga’ o kũrĩa guothe mangĩakorire andũ. (Atũm. 5:42) Kwoguo tũtiagĩrĩirũo gwĩciria atĩ magĩthiĩ nyũmba kwa nyũmba maahĩtũkaga andũ barabara-inĩ matekũmahunjĩria. Ningĩ matingĩateire kamweke ga kũhunjia kangĩeyumĩririe materĩgĩrĩire, makĩgũra indo thoko thutha wa kuumĩra wĩra-inĩ wa kũhunjia. O ta Jesu, gũtirĩ hĩndĩ maatuaga atĩ marĩ rũũtha.—Mar. 6:31-34.
2. Gũtũũra kũringana na rĩĩtwa riitũ nĩ kuuga twĩkage maũndũ marĩkũ?
2 Tũikaraga Twĩhaarĩirie: Rĩĩtwa riitũ, Aira a Jehova, rĩtionanagia o wĩra ũrĩa tũrutaga tu; rĩonanagia ithuĩ tũrĩ a. (Isa. 43:10-12) Kwoguo tũikaraga twĩhaarĩirie gũcokeria mũndũ o wothe ũrĩa ũngĩtũũria ũhoro wa kĩĩrĩgĩrĩro giitũ, o na rĩrĩa tũtarahunjia nyũmba kwa nyũmba. (1 Pet. 3:15) Hihi nĩ wĩciragia kabere ũhoro wa mĩeke ya kũhunjia ũterĩgĩrĩire ĩrĩa ĩngĩyumĩria na ũgeciria ũrĩa ũngiuga? Nĩ ũkuuaga mabuku ma kũhe andũ arĩa mangĩonania gũkenio nĩ ũhoro ũrĩa tũhunjagia? (Thim. 21:5) Hihi ũhunjagia o nyũmba kwa nyũmba, kana nĩ ũhunjagĩria andũ ũhoro ũrĩa mwega o na marĩ maũndũ-inĩ mangĩ kũngĩhoteka?
3. Nĩkĩ ciugo “mahubiri ya badala” ti cio ciagĩrĩire biũ gũtaarĩria mahunjio ma barabara-inĩ, ciigo-inĩ cia ngari, ihaaro-inĩ cia kũhurũka, icigo cia biacara, na kũrĩa kũngĩ?
3 Ti “Mahubiri ya Badala”: Mahinda mahĩtũku, rĩmwe nĩ tũrahũthagĩra ciugo cia Gĩthwaeri “mahubiri ya badala” tũkĩaria ũhoro wĩgiĩ mahunjio ma barabara-inĩ, ciigo-inĩ cia ngari, ihaaro-inĩ cia kũhurũka, icigo cia biacara, na kũrĩa kũngĩ. O na kũrĩ ũguo-rĩ, ciugo “mahubiri ya badala” no cionanie ta njĩra ĩyo ĩtarĩ ya ndũire, ta ĩtarĩ njĩtĩkĩrĩku kana ta ĩrĩ ya kũhũthĩrũo mũndũ eyendera. Mũtũmwo Paulo oigire atĩ aahunjagia “kũndũ kwa mũingĩ” na nyũmba kwa nyũmba. (Atũm. 20:20, NW) Kwoguo ciugo njega cia kũhũthĩra nĩ kũhunjia “kũndũ kwa mũingĩ” ithenya rĩa “mahubiri ya badala.” Hatarĩ nganja kũhunjia nyũmba kwa nyũmba nĩyo njĩra iitũ ĩrĩa ĩrĩ moimĩrĩro mega makĩria ya gũkinyĩria andũ ndũmĩrĩri ya Ũthamaki. O na kũrĩ ũguo, ahunjia a karine ya mbere maacaragia andũ no ti nyũmba. Maahũthagĩra mweke o wothe maangĩonire kũmenyithia andũ ũhoro wa ma kũndũ-inĩ kwa mũingĩ, nyũmba kwa nyũmba, na rĩrĩa kamweke ga kũhunjia keyumĩria materĩgĩrĩire. Rekei tũkorũo na muonere o ta ũcio wa maũndũ nĩguo tũhingie ũtungata witũ kĩhinyio.—2 Tim. 4:5.