Gunĩka Biũ na Wĩruti Waku Kĩũmbe
1. Wĩruti na gwĩcũũrania kũngĩtũteithia atĩa?
1 Tũgunĩkaga na njĩra nene mahinda ma wĩruti wa mũndũ kĩũmbe na njĩra ya gwĩcũũrania ‘twarũmbũiya mohoro makĩria.’ (Ahib. 2:1) Gũthoma na gwĩciria na njĩra nene ũhoro kuuma thĩinĩ wa Bibilia na mabuku ma Gĩkristiano nĩ gũgũtũteithia tũgĩe na mĩeke ya bata harĩ kũrikĩria ma cia Kiugo kĩa Ngai ngoro-inĩ ciitũ. Naguo ũndũ ũcio nĩ ũkũhutia mwĩcirĩrie na mwĩkĩre witũ wa maũndũ. Hatarĩ nganja, nĩ gũgũtũteithia kũgĩa na gĩkeno harĩ gwĩka wendi wa Jehova. (Thab. 1:2; 40:8) Kwoguo, nĩ tũkũbatara gũkũria ũhoti wa kũhũthĩra meciria maitũ mũno nĩguo tũteithĩke rĩrĩa tũreruta. Nĩ ũndũ mũhũthũ mũno meciria maitũ gũtangʼatangʼa! Ihĩngĩca nini—kũhũrĩrwo thimũ kana inegene no gũtũme meciria maitũ moime ũhoro-inĩ ũrĩa tũrathoma. Kana o na no tũkorũo tũtihotaga kũiga meciria maitũ ihinda iraya ũhoro-inĩ ũrĩa tũrathoma. No tũikare thĩ twĩhaarĩirie gũthoma maũndũ ma kĩĩroho, no thutha wa ihinda inyinyi, meciria maitũ maambĩrĩrie gũtangʼatangʼa. Tũngĩhota atĩa “kũrũmbũiya makĩria mohoro” hĩndĩ ya wĩruti witũ kĩũmbe?
2. (a) Nĩ kĩ arĩ ũndũ wa bata kũbanga ihinda rĩa wĩruti witũ kĩũmbe? (b) Ũkoragwo na mũbango ũrĩkũ wa kwĩruta Kiugo kĩa Ngai?
2 Nĩ harĩ ũguni kwamũra mahinda ma kwĩruta na wa gũthomera handũ hagĩrĩru. Aingĩ aitũ, ti ũndũ mũhũthũ kũgĩa na mahinda na handũ hagĩrĩru ha kwĩrutĩra. No tũigue ta mĩhangʼo ya o mũthenya ĩtũthereragia ta kahwangʼa karĩ rũĩ-inĩ. Kwaria ma, nĩ tũrabatara kũhiũrania na makũmbĩ na tũcarie gacigĩrĩra ka ũhooreru. Tũtingĩeterera mweke wa kwĩruta wĩyumĩrie guo mwene. Ithenya rĩa ũguo, tũbataire gwetha mahinda ma kwĩruta. (Ef. 5:15, 16) Amwe mathomaga ihinda inyinyi rũciinĩ rĩrĩa gũtarĩ na maũndũ maingĩ mangĩtũma meciria mao matangʼatangʼe. Angĩ monaga atĩ hwaĩ-inĩ nĩrĩo ihinda rĩrĩa rĩmagĩrĩire. Ũrĩa tũroiga nĩ atĩ tũtiagĩrĩirũo kũhũthĩrĩria bata wa kũgĩa na ũmenyo wa ma wa Ngai na Mũriũ. (Joh. 17:3) Nĩũndũ ũcio-rĩ, rekei tũgĩe na mũbango wa ihinda rĩa wĩruti wa mũndũ kĩũmbe na tũũrũmie.
3. Gwĩcũũrania nĩ kĩĩ, na kũngĩtũteithia atĩa?
3 Gwĩcũũrania—gwĩthugunda igũrũ rĩgiĩ kĩrĩa tweruta kuuma harĩ ũhoro ũrĩa twathoma—nĩ kwa bata mũno. Nĩ gũteithagia kũingĩria Kiugo kĩa Ngai ngoro-inĩ ciitũ kiume iratathi-inĩ. Gwĩcũũrania nĩ gũtũteithagia kuona ũrĩa tũngĩhũthĩra ũtaaro wa Bibilia nĩguo tũtuĩke ‘andũ a gwĩkaga ũhoro ũrĩa tũiguĩte, na to a kũũiguaga tũtekũwĩka.’ (Jak. 1:22-25) Ningĩ-rĩ, gwĩcũũrania nĩ gũtũteithagia gũkuhĩrĩria Jehova makĩria, tondũ nĩ gũtũmaga twĩcirie ũhoro wa ngumo ciake na ũrĩa ironanio nĩ ũhoro ũcio twathoma ihinda rĩu rĩa wĩruti.
4. Nĩ maũndũ marĩkũ mabataranagia nĩguo mũndũ ahote gwĩcũũrania na njĩra njega?
4 Nĩgetha tũgunĩke biũ nĩ wĩruti na gwĩcũũrania-rĩ, no mũhaka meciria maitũ makorũo matarĩ na ũndũ ũramathĩnia. Nĩgetha tũhote kũiyũkia maũndũ merũ rĩrĩa tũrecũũrania-rĩ, no mũhaka tweherie maũndũ mothe ma kĩĩrĩu marĩa mangĩtũma meciria maitũ matangʼatangʼe. Gwĩka ũguo kũbataraga mahinda na mũndũ akorũo arĩ keheri-inĩ, no nĩ ũndũ ũcanjamũraga mũno kũrĩa irio cia kĩĩroho na maĩ ma ma marĩa makoragwo thĩinĩ wa Kiugo kĩa Ngai.
5. (a) Ha ũhoro wa wĩruti wa mũndũ kĩũmbe-rĩ, nĩ maũndũ marĩkũ mateithĩtie andũ amwe mahote gũkindĩria wĩruti-inĩ wao? (b) Twagĩrĩirũo gũkorũo na mwerekera ũrĩkũ harĩ wĩruti, na tũgunĩkaga atĩa kuumana na ũndũ ũcio wa bata?
5 Ĩ angĩkorũo ũhoti wa kũiga meciria maitũ wĩruti-inĩ nĩ mũkunderu na nĩ mambagĩrĩria gũtangʼatangʼa thutha wa o ihinda inyinyi? Amwe nĩ mahotete kuongerera ũhoti wa meciria mao hĩndĩ ya wĩruti na njĩra ya kwambĩrĩria na mahinda makuhĩ, na o kahora magathiĩ makĩmaraihagia. Muoroto witũ ndwagĩrĩirũo gũkorũo arĩ gũthoma narua, no nĩ gũkindĩria wĩruti-inĩ. Tũrabatara gũkũria wendi mũnene harĩ ũhoro ũrĩa tũreruta. Na o na no twĩke ũthuthuria makĩria tũkĩhũthĩra ũhoro mũingĩ ũrĩa tũheetwo nĩ ngombo ĩrĩa ĩĩhokekete na njũgĩ. Nĩ ũndũ wa bata mũno gũthuthuria “maũndũ ma Ngai marĩa ma thĩinĩ matangĩkinyĩrĩka.” (1 Kor. 2:10) Gwĩka ũguo gũtũhotithagia kuongerera ũmenyo witũ harĩ Ngai na gũkũria ũhoti witũ wa gũkũũrana wega na ũũru. (Ahib. 5:14) Tũngĩkorũo tũrĩ arutwo me gatũ a kiugo kĩa Nga-rĩ, nĩ tũkũgĩa na ‘ũhoti wa kũrutaga andũ angĩ o nao.’—2 Tim. 2:2.