Onanagia Ũũgĩ Ũrĩ Ũtungata-inĩ
1. Nĩkĩ ũũgĩ nĩ wa bata ũtungata-inĩ?
1 O ‘ta mbũri gatagatĩ-inĩ ka njũi,’ ndungata cia Ngai ihunjagia gatagatĩ-inĩ ka ‘rũciaro ruogomu na rũtũrĩku.’ (Mat. 10:16; Afil. 2:15) Maũndũ ma ngũĩ, ũhinya, na andũ kũnyitwo mĩgwate nĩ mongererekete, makaruta ũira atĩ andũ oru marathiĩ o ‘magĩkĩragĩrĩria’ gũthũka. (2 Tim. 3:13) Nĩ kũhũthĩra motaaro marĩkũ gũgũtũteithia tũkoragwo “na ũũgĩ” tũrĩ ũtungata-inĩ?—Mat. 10:16.
2. Nĩ maũndũ marĩkũ mangĩtũma mũndũ ehere gĩcigo-inĩ kĩrĩa ekũhunjagia athiĩ kĩngĩ?
2 Hũthagĩra Ũũgĩ: Thimo 22:3 ĩtĩtĩrithagia ũũgĩ wa ‘kwĩhitha’ rĩrĩa tuona thĩna. Ikaraga wĩhũgĩte! Kũndũ gũkoragwo na thayũ maũndũ no magarũrũke tũterĩgĩrĩire. Wahota kuona thigari kana mũrũrũngano wa andũ barabara-inĩ. Rĩmwe na rĩmwe no ũheo mũkaana nĩ mwene nyũmba ũragũcaĩra. Handũ ha gũikara o kũu wone ũrĩa gũgũthiĩ-rĩ, nĩ ũũgĩ kwehera kuo narua na ũthiĩ na mbere kũhunjia gĩcigo-inĩ kĩngĩ.—Thim. 17:14; Joh. 8:59; 1 Thes. 4:11.
3. Ũtaaro wa Kohelethu 4:9 ũngĩhũthĩka atĩa ũtungata-inĩ witũ?
3 Hunjagia Hamwe na Arĩa Angĩ: Kohelethu 4:9 yugaga “Nĩ kaba andũ erĩ gũkĩra ũmwe.” O na gũtuĩka no kũhoteke nĩ ũmenyerete kũhunjia ũrĩ wiki gũtarĩ na ũgwati-rĩ, hihi rĩu nĩ wega gwĩka ũguo? Icigo-inĩ imwe, nĩ wega. Ĩndĩ icigo-inĩ ingĩ, rĩu nĩ ũgwati harĩ mwarĩ wa Ithe witũ kana mũndũ mũnini kũhunjia wiki nyũmba kwa nyũmba, makĩria hwaĩ-inĩ. Maũndũ marĩa monetwo nĩ monanĩtie atĩ kũhunjia hamwe na mũndũ ũngĩ nĩ ũndũ wa bata mũno. (Koh. 4:10, 12) Ikaraga ũkĩrũmbũyagia arĩa mũrĩ nao gĩkundi-inĩ kĩanyu. Wĩmenyerie kũmenyithagia arĩa angĩ rĩrĩa woimĩra gĩcigo-inĩ gĩa kũhunjia.
4. Tũngĩteithia atĩa nĩguo o mũndũ thĩinĩ wa kĩũngano akoragwo na ũgitĩri?
4 Athuri a kĩũngano arĩa ‘maikaraga meiguĩte nĩ ũndũ wa mĩoyo iitũ,’ nĩo magĩrĩirũo kũheana ũtongoria ũrĩa wagĩrĩire kũringana na maũndũ ma kwanyu. (Ahib. 13:17) Hatarĩ nganja Jehova nĩ arĩtũrathimaga tuonania wĩnyihia wa Gĩkristiano na tũnyitanĩre nao biũ. (Mik. 6:8; 1 Kor. 10:12) Ndungata ciothe cia Ngai irogĩa na itemi harĩ kũruta ũira ũrĩ na moimĩrĩro mega gĩcigo-inĩ kĩrĩa tũhunjagia, ĩndĩ hĩndĩ ciothe mekage ũguo na njĩra ya ũũgĩ.