Nĩkĩ Gĩtũmaga Tũhunjie?
1. Nĩ kĩĩ gĩtũmaga tũkorũo na kĩyo ũtungata-inĩ?
1 Kũhunjia ũhoro ũrĩa mwega wa Ũthamaki wa Ngai nĩguo wĩra ũrĩa wa bata mũno tũngĩruta ũmũthĩ. Kũgerera wĩra ũcio, nĩ tuonanagia wathĩki witũ harĩ maathani marĩa merĩ manene, nĩmo, kwenda Jehova na kwenda andũ arĩa angĩ. (Mar. 12:29-31)Wendo nĩguo ũndũ ũrĩa wa bata ũtũmaga tũkorũo na kĩyo ũtungata-inĩ. —1 Joh. 5:3.
2. Wĩra witũ wa kũhunjia wonanagia wendo witũ atĩa harĩ Jehova?
2 Kwenda Jehova: Kwenda Mũrata witũ ũrĩa mũnene, Jehova, nĩ gũtũmaga tũrute ũira igũrũ rĩake. Shaitani nĩ akoretwo akĩmũcambia kwa ihinda ta rĩa mĩaka 6,000 mĩhĩtũku. (2 Kor. 4:3, 4) Nĩ ũndũ ũcio, andũ aingĩ metĩkĩtie atĩ Ngai nĩ aherithagia ehia mwaki-inĩ wa tene na tene, Ngai nĩ Ũtatũ, na ndarũmbũyagia andũ. O na angĩ matuaga atĩ gũtirĩ Ngai. Na githĩ to tũkene mũno kuona andũ makĩmenya ma ĩgiĩ Ithe witũ wa matu-inĩ! Jehova nĩ akenagio mũno nĩ kĩyo giitũ gĩa kũruta ũira wake no ũndũ ũcio ndũkenagia Shaitani.—Thim. 27:11; Ahib. 13:15, 16.
3. Ũtungata witũ wonanagia wendo harĩ andũ arĩa angĩ na njĩra ĩrĩkũ?
3 Kwenda Andũ Arĩa Angĩ: O rĩrĩa rĩothe twahunjĩria mũndũ, tũmuonagia atĩ nĩ tũmwendete. Andũ nĩ manyoteire kũigua ũhoro mwega, makĩria matuku maya marĩ na moritũ maingĩ. Aingĩ mahaana ta andũ a Nineve matuku-inĩ ma Jona arĩa ‘mataamenyaga gũkũũrana guoko kwa ũrĩo kana kwa ũmotho.’ (Jona 4:11) Ũtungata witũ ũrutaga andũ ũrĩa mangĩkorũo na mũtũũrĩre mwega na wĩ na gĩkeno. (Isa. 48:17-19) Ningĩ nĩ ũmaheaga kĩĩrĩgĩrĩro. (Rom. 15:4) Mangĩthikĩrĩria na meke kũringana na maũndũ marĩa mareruta, nĩ “makahonoka.”—Rom. 10:13, 14.
4. Nĩ ũndũ ũrĩkũ Jehova atakariganĩrũo nĩguo?
4 Mwana wendete mũciari wake, amwendaga hĩndĩ ciothe, no ti rĩmwe na rĩmwe. O ũndũ ũmwe na ũguo, wendo witũ harĩ Ngai na andũ nĩ ũrĩtũmaga tũhũthĩre mĩeke ĩrĩa yothe twagĩa nayo ya kũmahunjĩria, no to mahinda marĩa tũbangĩte. Tũgũthiĩ na mbere kũhunjia tũtegũtigithĩria. (Atũm. 5:42) Jehova ndakariganĩrũo nĩ wendo ũcio.—Ahib. 6:10.