Wĩmenyerie Kwaga Gũcererũo
1. Jehova atũigĩire kĩonereria kĩrĩkũ gĩa kwaga gũcererũo?
1 Jehova ndaceragĩrũo. Aheaga ndungata ciake ‘ũteithio hĩndĩ ĩrĩa ibataire.’ (Ahib. 4:16) Ningĩ nĩ aciheaga irio cia kĩĩroho “hĩndĩ ĩrĩa yagĩrĩire yakinya.” (Mat. 24:45) No tũkorũo na ma atĩ, mũthenya wa Jehova ndũgaacererũo nĩ gũkorũo “ihinda rĩu rĩĩhĩkĩte rĩkinye.” (Hab. 2:3) Na githĩ tũtikĩgunĩkaga mũno nĩ gũkorũo Jehova ndaceragĩrũo! (Thab. 70:5) Tũrĩ andũ matarĩ akinyanĩru na marĩ mĩhangʼo mĩingĩ, kwoguo no akorũo arĩ ũndũ mũritũ kũiga mahinda. Twagĩrĩirũo kwĩmenyeria kwaga gũcererũo nĩkĩ?
2. Kwaga gũcererũo kũgocithagia Jehova na njĩra ĩrĩkũ?
2 Matukũ-inĩ maya ma kũrigĩrĩria, gũcererũo kuonekaga ta arĩ ũndũ wa ndũire, nĩ gũkorũo andũ aingĩ nĩ meyendete na matiũĩ kwĩgirĩrĩria. (2 Tim. 3:1-3) Kwoguo hĩndĩ ĩrĩa Akristiano maaga gũcererũo wĩra-inĩ kana mĩcemanio-inĩ, andũ arĩa angĩ nĩ monaga marĩ a mwanya, na ũndũ ũcio ũkagocithia Jehova. (1 Pet. 2:12) Hihi no kũhoteke nĩ tũkinyaga wĩra-inĩ witũ thaa iria ciagĩrĩire, no tũgekora nĩ tũceragĩrũo maũndũ-inĩ ma kĩĩroho? Tuonanagia nĩ tũrenda gũtũkia Jehova, Ithe witũ wa igũrũ ũrĩa wĩ kĩhaarĩro kĩega, rĩrĩa twakinya mĩcemanio-inĩ mbere ya rwĩmbo na mahoya.—1 Kor. 14:33, 40.
3. Mũndũ ũigaga mahinda onanagia atĩa atĩ nĩ eciragia andũ arĩa angĩ?
3 Kwaga gũcererũo ningĩ nĩ kuonanagia atĩ nĩ twĩciragia andũ arĩa angĩ. (Afil. 2:3, 4) Nĩ tũthumbũraga aarĩ na ariũ a Ithe witũ, rĩrĩa twakinya tũcereirũo mĩcemanio-inĩ ya Gĩkristiano, na ya gũthiĩ ũtungata. Ningĩ tũngĩkorũo tũmenyerete gũceragĩrũo hingo ciothe, tuonanagia atĩ mahinda maitũ nĩ ma bata kũrĩ ma andũ arĩa angĩ. Mũndũ ũigaga mahinda, onanagia nĩ arĩ ngumo cia bata, ta kĩyo na wĩhokeku.
4. Twagĩrĩirũo gwĩka atĩa angĩkorũo nĩ tũceragĩrũo kaingĩ?
4 Angĩkorũo nĩ ũceragĩrũo kaingĩ, wĩcũũranie gĩtũmi nĩ kĩrĩkũ. Thondeka mũtaratara na ũbange maũndũ maku wega, nĩguo ũrĩkagie mawĩra maku hĩndĩ ĩrĩa yagĩrĩire. (Koh. 3:1; Afil. 1:10) Hoya Jehova agũteithie. (1 Joh. 5:14) Kũiga mahinda nĩ njĩra ĩmwe ya kuonania atĩ nĩ tũtĩĩte maathani merĩ marĩa manene, kwenda Ngai na kwenda andũ arĩa angĩ.—Mat. 22:37-39.