KĨONGO KĨA MWERI ŨYŨ: “KĨHUNJAGIE ŨHORO WA NGAI, NA WĨKAGĨRE KĨYO.”—2 TIM. 4:2.
Wĩrutanĩrie Gũcaria Mĩeke ya Kũhunjia!
1. Nĩ ũndũ ũrĩkũ tũngĩĩruta na kĩonereria kĩa Daudi?
1 Mũthamaki Daudi aarĩ mũndũ ũtetĩkĩragia maũndũ marĩa aahiũranagia namo mamũcokie na thutha. Kwa ngerekano, Daudi nĩ endaga gwakĩra Jehova nyũmba. Hĩndĩ ĩrĩa aagiririo gwĩka ũguo, Daudi nĩ aagarũrire muoroto wake na akĩambĩrĩria gũthagathaga indo iria Suleimani angĩkaahũthĩra gwaka hekarũ. (1 Ath. 8:17-19; 1 Maũ. 29:3-9) Handũ ha gwĩciria mũno maũndũ marĩa aatangĩahotire gwĩka, Daudi aathingatire maũndũ marĩa aangĩahotire gwĩka. Tũngĩgerekania atĩa na kĩonereria kĩa Daudi tũkĩhũthĩra njĩra itiganĩte cia kũhunjia?
2. Tũngĩĩthuthuria na njĩra ĩrĩkũ?
2 Ĩka Ũrĩa Ũngĩhota: Andũ aingĩ nĩ mahũthĩtie ũtũũro wao nĩguo matuĩke mapainia a gũteithĩrĩria kana mapainia a hĩndĩ ciothe. (Mat. 6:22) Hihi no ũtuĩke ũmwe wao? Ũngĩĩthuthuria na njĩra ya mahoya, no wone atĩ o nawe nĩ ‘ũhingũrĩirũo mũrango mũnene, wa kũruta wĩra mũno.’ Ũngĩoya mweke ũcio!—1 Kor. 16:8, 9.
3. Nĩ mĩeke ĩrĩkũ ya kũhunjia tũngĩetha o na angĩkorũo maũndũ maitũ matiratũĩtĩkĩria tũtuĩke mapainia?
3 Ĩ angĩkorũo maũndũ maku nĩ marakũgiria ũtuĩke painia? Ndũkage kũhũthĩra mĩeke ĩngĩ ya kũhunjia. Kwa ngerekano, angĩkorũo nĩ ũrutithanagia wĩra na andũ matarĩ Aira a Jehova no ũcarie mweke ũrĩa wagĩrĩire nĩguo ũmahunjĩrie. Kana angĩkorũo ũrĩ na gathĩna ka mwĩrĩ-rĩ, hihi no ũcarie mweke ũrĩa wagĩrĩire kũhunjĩria arĩa makũrigitaga? Ririkana atĩ nĩ kũrĩ mũbango wa kũruta riboti ya ndagĩka 15 nĩ ũndũ wa arĩa matahotaga kũhingia maũndũ maingĩ ũtungata-inĩ nĩ ũndũ wa ũkũrũ kana kwaga ũgima mwega wa mwĩrĩ. Hĩndĩ ĩrĩa ũraruta riboti yaku ya ũtungata wa o mweri, ririkanaga kwandĩka mathaa marĩa ũhunjĩtie o na rĩrĩa ũtarĩ ũtungata-inĩ, na mabuku marĩa ũratigĩire andũ o hamwe na trakti na tũratathi twa kũnyita andũ ũgeni Kĩririkano-inĩ na kĩgomano-inĩ. Nĩ ũkũgega kuona ũrĩa mĩeke ĩyo ĩrĩongagĩrĩra mathaa marĩa ũhunjagia.
4. Wee ũtuĩte itua rĩrĩkũ?
4 O ũrĩa maũndũ maitũ mangĩkorũo matariĩ, rekei tũgerie gwetha kamweke o gothe kũhunjia ũhoro mwega. Nĩ tũkũiganĩra nĩ kũmenya atĩ nĩ tũreka o ũrĩa wothe tũngĩhota nĩ ũndũ wa Ũthamaki.—Mar. 14:8; Luk. 21:2-4.