Gũtongoria Arutwo a Bibilia Marathiĩ na Mbere
1. Ahunjia arĩa maratongoria arutwo a Bibilia makoragwo na itemi rĩrĩkũ?
1 Gũtirĩ mũndũ ũngĩhota gũtungatĩra Jehova “atagucĩrĩirio” nĩwe. (Joh. 6:44) O na kũrĩ ũguo, no mũhaka ahunjia arĩa matongoragia arutwo a Bibilia mahingie itemi rĩao harĩ gũteithia andũ makuhĩrĩrie Ithe wao wa igũrũ. (Jak. 4:8) Ũndũ ũcio nĩ ũbataraga kwĩhaarĩria. Gũthoma ibungo na kũũria kĩũria kĩrĩa gĩcabĩtwo ti kũiganu gũteithia arutwo aitũ gũtaũkĩrũo na gũthiĩ na mbere.
2. Kũruta mũndũ Bibilia na njĩra njega kũhingagia maũndũ marĩkũ?
2 Nĩguo ahunjia matongorie arutwo a Bibilia marathie na mbere, no mũhaka mamateithie (1) gũtaũkĩrũo nĩ ũrĩa Bibilia ĩrutanaga, (2) gwĩtĩkĩra ũrĩa Bibilia ĩrutanaga, na (3) kũhũthĩra maũndũ marĩa Bibilia ĩrutanaga. (Joh. 3:16; 17:3; Jak. 2:26) Mĩeri mĩingĩ no ĩhĩtũke ũgĩteithia mũrutwo gũkinyũkia makinya macio. O na kũrĩ ũguo, o ikinya rĩrũgamĩrĩire ihinda rĩna rĩa gũkũria ũrata na Jehova na kũmwĩyamũrĩra.
3. Nĩ kĩĩ gĩtũmaga arutani ega morie ciũria cia mawoni?
3 Hihi Mũrutwo wa Bibilia Areciria atĩa?: Nĩguo ũmenye kana mũrutwo wa Bibilia nĩ arataũkĩrũo na agetĩkĩra maũndũ marĩa areruta, wĩtheme kwaria mũno na ũmwĩkĩre ngoro eeyarie. (Jak. 1:19) Hihi nĩ arataũkĩrũo nĩ ũrĩa Bibilia ĩroiga igũrũ rĩgiĩ ũndũ ũrĩa mũrarĩrĩria? No ataarĩrie ũndũ ũcio na ciugo ciake mwene? Araigua atĩa igũrũ rĩgiĩ ũndũ ũcio eruta? Nĩ etĩkĩtie atĩ maũndũ marĩa Bibilia ĩrutanaga nĩ ma bata? (1 Thes. 2:13) Hihi nĩ aramenya atĩ maũndũ macio areruta nĩ magĩrĩire kũgarũra mũtũũrĩre wake? (Kol. 3:10) Nĩguo tũmenye macokio ma ciũria icio, nĩ tũrabatara kũũria na njĩra ya ũũgĩ ciũria cia mawoni tũcoke tũmũthikĩrĩrie akĩĩyaria.—Mat. 16:13-16.
4. Tũngĩka atĩa angĩkorũo mũrutwo nĩ araritũhĩrũo nĩ kũnyita kana kũhũthĩra maũndũ marĩa areruta thĩinĩ wa Bibilia?
4 Kaingĩ nĩ kũbataranagia ihinda kũriganĩrũo nĩ mĩtugo na mĩĩcirĩrie ĩngĩ, tondũ nĩ ĩkoragwo ĩrikĩire ngoro-inĩ mũno. (2 Kor. 10:5) Ĩ angĩkorũo mũrutwo ndaretĩkania kana ndarahũthĩra maũndũ marĩa akoretwo akĩĩruta? Nĩ tũbataraga gũkorũo na ũkirĩrĩria nĩguo ihinda rĩa kũigana rĩhĩtũke rĩa Kiugo kĩa Ngai na roho mũtheru kũruta wĩra thĩinĩ wa ngoro ya mũrutwo. (1 Kor. 3:6, 7; Ahib. 4:12) Handũ ha kũmũtindĩkĩrĩria, kaingĩ nĩ wega gũthiĩ gĩcunjĩ-inĩ kĩngĩ angĩkorũo hihi nĩ arona arĩ ũndũ mũritũ gũtaũkĩrũo kana kũhũthĩra ũrutani wa Bibilia. Twathiĩ na mbere kũmũruta Bibilia tũrĩ na wetereri na wendo, thutha wa ihinda no atindĩkwo gwĩka ũgarũrũku ũrĩa ũrabatarania.