Tũũria Mwerekera wa Gũtua Andũ Arutwo
1. Nĩ kĩĩ kĩrabatarania nĩguo andũ makaahonoka?
1 Riboti ya mwaka wa ũtungata wa 2014 ĩronania kĩyo na kwĩrutanĩria kwa andũ a Ngai wĩra-inĩ wa kũhunjia ũhoro ũrĩa mwega wa Ũthamaki. (Mat. 24:14) Na njĩra ya kũhunjia nyũmba kwa nyũmba, kambĩini cia kũheana trakti na cia kũnyita andũ ũgeni, na njĩra cia kwambĩrĩria kũhunjia, nĩ tũrakinyĩria andũ aingĩ ndũmĩrĩri ya Bibilia gũkĩra hau kabere. O na kũrĩ ũguo, nĩguo o mũndũ akaahonoka, no mũhaka tũmũteithie atuĩke mũrutwo wa Jesu na njĩra ya kwĩruta Bibilia nake.—1 Tim. 2:4.
2. Nĩ ciũria irĩkũ tũngĩĩyũria iria ingĩtũteithia gũkoragwo twĩhaarĩirie kwambĩrĩria kwĩruta Bibilia na mũndũ?
2 Koragwo Wĩhaarĩirie Kwambĩrĩria Kwĩruta Bibilia na Mũndũ: Rĩrĩa mũndũ akenio nĩ ũhoro-rĩ, nĩ wĩrutanagĩria kuoya namba ciake cia thimũ na ũkamũcokera o na ihenya ũrĩ na muoroto wa kwambĩrĩria kwĩruta Bibilia nake? Nĩ rĩ wĩrĩgĩte kũgeria kwambĩrĩria kwĩruta Bibilia na mũndũ wamũhunjĩria rita rĩa mbere? Nĩ rĩ wĩrĩgĩte kũgeria kwambĩrĩria kwĩruta Bibilia na mũndũ ũrĩa ũtwaragĩra ngathĩti? Hihi nĩ wonetie arĩa mũrutaga wĩra nao, arĩa mũthomaga nao, andũ a famĩlĩ, na andũ angĩ video Wagĩrĩirũo Kwĩruta Bibilia Nĩkĩ? na Wĩruti wa Bibilia Wĩkagwo Atĩa? Rĩrĩa ũrahũthĩra gakaari kana kametha ga kũigĩrĩra mabuku-rĩ, hihi nĩ wĩrutanagĩria kwĩra arĩa moya mabuku ma kwĩruta atĩ nĩ twĩrutaga Bibilia na mũndũ hatarĩ marĩhi?
3. Nĩkĩ kĩrabatarania nĩguo tũrutane ũhoro ũrĩa wa ma na njĩra ĩrĩa yagĩrĩire?
3 Ũteithio Kuuma Kũrĩ Jehova na Jesu: Rĩrĩa aathanire atĩ “mũgatũme andũ matuĩke arutwo” na akĩhũthĩra kiugo “thiĩi,” Jesu eendaga kuonania atĩ nĩ tũrabatara kwĩrutanĩria na tuoe ikinya rĩa mbere gwĩka ũguo. O na kũrĩ ũguo ndaatũtiganĩirie, ĩndĩ oigire atĩ nĩ arĩkoragwo hamwe na ithuĩ. (Mat. 28:19, 20) Makĩria ma ũguo, Jehova nĩ atũheete roho wake mũtheru na indo cia kũhũthĩra na agatũmenyeria ũrĩa tũngĩrutana ũhoro wa ma. (Zek. 4:6; 2 Kor. 4:7) No tũmũhoyage ‘atwendithagie maũndũ make, na agatũma tũmekage’ wĩra-inĩ ũyũ wa bata mũno.—Afil. 2:13.
4. Nĩkĩ nĩ twagĩrĩirũo gũtũũria mwerekera wa gũtua andũ arutwo?
4 Kũhunjia ũhoro ũrĩa mwega nĩ gũtũheaga gĩkeno kĩingĩ. O na kũrĩ ũguo, gĩkeno gitũ nĩ kĩongererekaga rĩrĩa twaruta mũndũ ũhoro wa ma na kũmũteithia aingĩre ‘njĩra-inĩ ĩrĩa ĩkinyagia mũndũ muoyo-inĩ.’ (Mat. 7:14; 1 Thes. 2:19, 20) Ũndũ ũngĩ nĩ atĩ, twatũũria mwerekera wa gũtua andũ arutwo, nĩ tũgũkenia Jehova “nĩ ũndũ ndendaga mũndũ o na ũmwe ore, no atĩ othe matuĩke a kwĩrira.”—2 Pet. 3:9.