ŨTŨŨRO WA GĨKRISTIANO
Kenagĩra Kũhunjia Ũhoro Ũrĩa Mwega
Hihi nĩ ũrĩ waigua ũkĩritũhĩrũo nĩ kũhunjia? Aingĩ aitũ mangiuga ĩĩ. Gĩtũmi nĩ kĩĩ? No gũkorũo gĩcigo-inĩ gitũ andũ nĩ magaga gũtindanĩra na ũhoro ũrĩa tũramahe kana magatũkararia, kana akorũo nĩ twĩtigagĩra kwaria na andũ tũtoĩ. Maũndũ ta macio no matũme gĩkeno gitũ kĩnyihe. Ĩndĩ tũthathayagia Ngai ũrĩ gĩkeno ũrĩa wendaga tũmũtungatĩre tũrĩ na gĩkeno. (Thab 100:2; 1Ti 1:11) Rekei tuone itũmi ithatũ cia gũtũma tũkenagĩre kũhunjia.
Kĩa mbere nĩ atĩ, tũhunjagia ndũmĩrĩri ya kũhe andũ mwĩhoko. O na gũtuĩka andũ marathiĩ magĩte mwĩhoko, ithuĩ no tũmahe “ũhoro mwega wa maũndũ maagĩrĩru.” (Isa 52:7) Ningĩ ũhoro mwega wa Ũthamaki wa Ngai no ũtũme o na ithuĩ tũiyũrũo nĩ gĩkeno. Mbere ya gũthiĩ kũhunjia, amba wĩcũranie ũhoro wa irathimo iria Ũthamaki wa Ngai ũkaarehe gũkũ thĩ.
Gĩa kerĩ nĩ atĩ, ũhoro mwega ũrĩa tũhunjagia ũteithagia andũ kĩĩmwĩrĩ na kĩĩroho. Nĩ matigaga gwĩka maũndũ mangĩmathũkia na makagĩa na kĩĩrĩgĩrĩro kĩa muoyo wa tene na tene. (Isa 48:17, 18; Ro 1:16) No tũhũũre mbica tũkĩruta wĩra wa gwetha na kũhonokia andũ marĩ ũgwati-inĩ. O na gũtuĩka andũ amwe matiendaga kũhonokio, tũthiaga na mbere gũcaria arĩa marenda kũhonokio.—Mat 10:11-14.
Gĩtũmi gĩa gatatũ na nĩkĩo kĩa bata mũno nĩ atĩ, wĩra witũ wa kũhunjia nĩ ũgoocithagia Jehova. Nĩ onaga wĩra ũcio witũ ũrĩ wa bata mũno. (Isa 43:10; Ahi 6:10) Makĩria ma ũguo, nĩ atũheaga roho wake mũtheru nĩguo tũhote kũhunjia. Kwoguo, thaitha Jehova akũhe gĩkeno, kĩrĩa nĩ maciaro ma roho mũtheru. (Ga 5:22) Tũgĩteithio nĩwe, no tũhote gũtooria guoya na tũhunjie tũrĩ na ũcamba. (Atũ 4:31) Nĩ ũndũ ũcio, gũtekũmakania ũrĩa gĩcigo gitũ kĩhaana, nĩ tũrĩkenagĩra wĩra witũ wa kũhunjia.—Ezk 3:3.
Nĩ mwerekera ũrĩkũ ũngĩenda gũkoragwo naguo rĩrĩa ũrĩ ũtungata-inĩ?
WĨRORERE VIDEO COKIA GĨKENO GĨAKU KŨGERERA KWĨRUTA NA GWĨCŨRANIA, ŨCOKE ŨCOKIE CIŨRIA ICI:
Nĩkĩ no mũhaka twĩkĩrĩre mũno kũrĩa irio cia kĩĩroho o na angĩkorũo o mweri nĩ tũhũthagĩra mathaa maingĩ tũkĩhunjia?
Tũngĩĩgerekania atĩa na Mariamu?
Nĩ ihinda rĩrĩkũ wĩcũranagia Kiugo kĩa Ngai?
Nĩ kĩĩ gĩkũrehagĩra gĩkeno hĩndĩ ĩrĩa ũrahunjia ũhoro ũrĩa mwega?