Gũkũũrũo kwa Ihinda Rĩũkĩte Gũkaahoteka nĩ Ũndũ wa Ngai na Kristo

Nĩ maũndũ marĩkũ ũhiũranagia namo o mũthenya? Hihi wĩ kĩongo kĩa famĩlĩ na wĩ na maũndũ maingĩ ũbataraga kũhingia? Hihi ũreraga ciana ũrĩ mũciari ũmwe na ti ũndũ mũhũthũ kuona mabataro? Hihi wĩ mũndũ mwĩthĩ na nĩ wĩkagwo maũndũ moru nĩ arĩa mũthomaga nao? Hihi nĩ ũrathumbũrũo nĩ mwĩrĩ nĩ ũndũ wa kũrwara kana ũkũrũ? Ithuothe twĩ na thĩna tũhiũranagia naguo. Akristiano aingĩ mahiũranagia na mathĩna maingĩ ihinda-inĩ rĩmwe. No nĩ tũĩ atĩ ica ikuhĩ nĩ tũgũkũũrũo kuuma harĩ magerio macio.​—2Ko 4:16-18.

O tũgĩetagĩrĩra ihinda rĩu rĩkinye, nĩ tũũmagĩrĩrio nĩ kũmenya atĩ Jehova nĩ amenyaga maũndũ marĩa tũragerera, nĩ akenaga kuona tũgĩtũũria wĩhokeku na tũgĩkirĩrĩria, na nĩ atũigĩire irathimo nyingĩ. (Je 29:11, 12) O na Jesu nĩ atũrũmbũyagia. Rĩrĩa tũrahingia maũndũ marĩa twĩhokeirũo tũrĩ Akristiano, nĩ tũkoragwo na ma na ciugo ici aaugire: “Nĩ ndĩkoragwo hamwe na inyuĩ.” (Mat 28:20) Rĩrĩa twatithia na twecũrania gũkũũrũo kwa ihinda rĩũkĩte rungu rwa Ũthamaki wa Ngai, kĩĩrĩgĩrĩro gitũ nĩ gĩĩkĩragwo hinya na tũkahota gũkirĩrĩria o na makĩria magerio marĩa tũragerera.​—Ro 8:19-21.

WĨRORERE VIDEO YA O ŨRĨA KĨHUHŨKANIO KĨRAKUHĨRĨRIA, IKARAGAI MŨCŨTHĨRĨIRIE JESU!​—MAŨNDŨ MEGA MARĨA MARĨ MBERE, ŨCOKE ŨCOKIE CIŨRIA ICI:

• Nĩ kĩĩ gĩatũmire andũ mamũranio na Ngai, na moimĩrĩro maarĩ marĩkũ?

• Nĩ irathimo irĩkũ cia ihinda rĩũkĩte igaakenerũo nĩ arĩa ehokeku harĩ Jehova?

• Irathimo icio njega ikaahoteka atĩa?

• Nĩ irathimo irĩkũ wĩriragĩria mũno gũkoona thĩinĩ wa thĩ njerũ?