Ciũria Kuuma Kũrĩ Athomi
Nĩ kĩĩ gĩtũmĩte Bibilia ya New World Translation ĩtaũre ciugo cia Thaburi 12:7 na njĩra ĩronania atĩ ciaragĩrĩria “andũ arĩa matarĩ hinya” (mũhari wa 5) no ti “ciugo cia Jehova” (mũhari wa 6)?
Nĩ tondũ ũhoro ũrĩa ũthiũrũrũkĩirie wonanagia atĩ mũhari ũcio waragĩrĩria andũ.
Thaburi 12:1-4 yugaga atĩ “andũ ehokeku nĩ mathirĩte gatagatĩ-inĩ ka andũ.” Ĩgacoka ĩkauga ũũ thĩinĩ wa Thaburi 12:5-7:
“‘Tondũ andũ arĩa matarĩ hinya nĩ mahinyĩrĩirio,
Tondũ arĩa athĩni nĩ maracaya,
Nĩ ngwarahũka njoe ikinya,’ ũguo nĩguo Jehova ekuuga.
‘Nĩ ngũmahonokia kuuma harĩ arĩa mamanyararaga.’
Ciugo cia Jehova nĩ theru;
Ihaana ta betha ĩthereirio riiko-inĩ rĩa rĩũmba, ĩgatherio maita mũgwanja.
Wee Jehova nĩ ũkũmagitĩra;
Ũkũgitĩra o ũmwe wao kuuma harĩ rũciaro rũrũ nginya tene na tene.”
Mũhari wa 5 ũronania ũrĩa Ngai egwĩkĩra “arĩa matarĩ hinya.” Nĩ ekũmahonokia.
Naguo mũhari wa 6 ũkongerera atĩ “ciugo cia Jehova nĩ theru,” ‘ihaana ta betha ĩtheretio.’ Hatarĩ nganja ũguo nĩguo tuonaga kiugo kĩa Ngai gĩtariĩ.—Thab. 18:30; 119:140.
Reke rĩu twĩcirie ũhoro wa ciugo ici cia Thaburi 12:7: “Wee Jehova nĩ ũkũmagitĩra; ũkũgitĩra o ũmwe wao kuuma harĩ rũciaro rũrũ nginya tene na tene.” Nĩ kĩĩ gĩtũteithagia kũmenya atĩ ciugo cia Kĩhibirania iria ciahũthĩrirũo mũhari-inĩ ũcio ciaragĩrĩria “andũ arĩa matarĩ hinya” no ti “ciugo cia Jehova”?
Andũ amwe no mecirie atĩ mũhari wa 7 wendaga kuonania atĩ Ngai nĩ ‘agitagĩra’ ciugo ciake, tondũ nĩcio ciakorũo ciarĩrĩrio mũhari-inĩ wa 6. Na nĩ ma Ngai nĩ agitĩrĩte Bibilia o na akararia aingĩ mageretie kũmĩniina.—Isa. 40:8; 1 Pet. 1:25.
No ningĩ Jehova nĩ agitagĩra andũ arĩa magwetetwo mũhari-inĩ wa 5. Nĩ ateithagia na akahonokia “arĩa matarĩ hinya” na “marahinyĩrĩrio,” na nĩ egũthiĩ na mbere gwĩka ũguo.—Ayub. 36:15; Thab. 6:4; 31:1, 2; 54:7; 145:20.
Gũkĩrĩ ũguo-rĩ, nĩ kĩĩ kĩngĩtũma tuuge atĩ mũhari wa 7 ũrarĩrĩria andũ?
Ũhoro ũrĩa ũthiũrũrũkĩirie mũhari ũcio nĩguo ũratũteithia kũmenya ũguo.
Thaburi 12:1, 2 yaragia ũhoro wa “andũ ehokeku” arĩa mangĩkorũo maheetwo ũhoro wa maheeni. Naguo mũhari ũrĩa ũrũmĩrĩire wonanagia atĩ Jehova nĩ agookĩrĩra arĩa mahũthagĩra rũrĩmĩ rwao ũũru. Thaburi ĩyo ĩtũteithagia gũkorũo na ma atĩ Ngai nĩ arĩrũagĩrĩra andũ ake tondũ ciugo ciake nĩ theru.
Kwoguo mũhari wa 7 ũkoragwo ũkĩonania atĩ Jehova nĩ arĩgitagĩra arĩa mahinyagĩrĩrio nĩ andũ aganu.
Ũrĩa Bibilia ya New World Translation ĩtaũrĩte mũhari ũcio nĩ ũratwarana na maandĩko ma Kĩhibirania ma Masoreti. Septuagint ya Kĩngiriki ĩhũthĩrĩte kiugo “ithuĩ” maita merĩ mũhari-inĩ ũcio wa 7, ũndũ ũrĩa wonanagia atĩ ũkoragwo ũkĩarĩrĩria andũ ehokeku arĩa matarĩ hinya na mahinyĩrĩirio. Makĩria ma ũguo, mũhari ũcio uugaga atĩ “o ũmwe” wa andũ acio ehokeku nĩ arĩgitagĩrũo kuumana na “rũciaro rũrũ,” na nĩruo andũ arĩa manyitaga mbaru maũndũ ma waganu. (Thab. 12:7, 8) Bibilia ĩmwe ya rũthiomi rwa Kĩaramu ĩtaũrĩte ũũ gĩcunjĩ kĩa mbere kĩa mũhari ũcio wa 7: “Wee MWATHANI, nĩ ũrĩgitagĩra andũ arĩa athingu, nĩ ũrĩmagitagĩra kuuma kũrĩ rũciaro rũrũ rwaganu tene na tene.” Ũcio nĩ ũira ũngĩ wa kuonania atĩ Thaburi 12:7 ndĩkoragwo ĩkĩarĩrĩria ciugo cia Jehova.
Nĩ ũndũ ũcio, mũhari ũcio nĩ ũheaga “andũ ehokeku” mwĩhoko atĩ Ngai nĩ arĩmarũagĩrĩra.