Mũtongoria wa Ndini Kũgĩa na Macokio

Mũthenya ũmwe rĩrĩa Mũira wa Jehova ũmwe wĩtagwo Eliso eerutaga Bibilia na mũtumia ũmwe, mũtumia ũcio nĩ aaceereirũo nĩ ageni aterĩgagĩrĩra. Ageni acio maarĩ mũtongoria ũmwe wa ndini na mũtumia wake. Hĩndĩ ĩyo Eliso akĩmenya atĩ ciumia igĩrĩ mbere ĩyo, mũrũ wa mũtongoria ũcio wa ndini nĩ aarwarĩte na agakua.

Hĩndĩ ĩrĩa Eliso aameerire ũrĩa aigua kĩeha nĩ ũndũ wao gũkuĩrũo, mũtongoria ũcio na mũtumia wake maambĩrĩirie kũrĩra. Mũtongoria ũcio wa ndini agĩcoka akiuga ũũ arĩ na marakara: “Ndingĩtaũkĩrũo nĩ kĩrĩa kĩratũmire Ngai etĩkĩrie igerio ta rĩrĩ! Angĩoya atĩa mũrũ wakwa wa mũmwe? Ndungatĩire Ngai ihinda rĩa mĩaka 28, na ngeka maũndũ maingĩ mega, na ũũ nĩguo andĩha! Ngai aroragire mũrũ wakwa nĩkĩ?”

Eliso nĩ aamataarĩirie atĩ Ngai ndoire mũriũ wao. Agĩcoka akĩarĩrĩria nao maũndũ ta ũkũũri, ũriũkio, na kĩrĩa gĩtũmaga Ngai etĩkĩrie maũndũ moru mekĩke. Mũtongoria ũcio wa ndini na mũtumia wake makĩra Eliso atĩ nĩ aamaheire macokio marĩa maakoretwo makĩhoya kũgĩa namo.

Kiumia kĩrĩa kĩarũmĩrĩire mũtongoria ũcio wa ndini na mũtumia wake nĩ maathiire kwĩruta Bibilia rĩngĩ hamwe na mũtumia ũcio werutaga na Eliso. Eliso na mũtumia ũcio maaragĩrĩria gĩcunjĩ gĩa “Kĩĩrĩgĩrĩro kĩa Ma Harĩ Endwa Aku Arĩa Makuĩte,” ibuku-inĩ rĩa Bibilia Ĩrutanaga Atĩa Kũna? Mũtongoria ũcio wa ndini na mũtumia wake nĩ maanyitanĩire ndeereti-inĩ ĩyo makenete.

Thutha-inĩ eerĩ nĩ maathiire kĩgomano kĩa mwanya kĩa Aira a Jehova kĩrĩa gĩekĩirũo Tbilisi, Georgia, na makĩhutio mũno nĩ wendo na ũrũmwe ũrĩa moonire—ngumo iria maageretie kũruta arũmĩrĩri a kanitha yao kwa ihinda iraya no makaremwo.