Ndũmĩrĩri ya Bibilia

Rĩrĩa Icabe

Jehova Ngai nĩwe wĩna kĩhooto gĩa gwathana. Njĩra yake ya gwathana nĩyo njega biũ. Muoroto wake harĩ thĩ na harĩ andũ nĩ ũkaahinga.

Adamu na Hawa Mũgũnda-inĩ wa Edeni na nyoka hau hakuhĩ

Thutha wa 4026 M.M.M.

“Nyoka” ĩgĩĩkĩrĩra nganja kĩhooto kĩa Jehova gĩa gwathana o na njĩra yake ya gwathana. Jehova akiuga atĩ nĩ akaarehe “mbeũ” kana “rũciaro” rũrĩa rũkaaniina nyoka ĩyo, nĩyo Shaitani. (Kĩambĩrĩria 3:1-5, 15, kohoro ka magũrũ-inĩ) O na kũrĩ ũguo, Jehova nĩ aheete andũ ihinda meyathe marĩ rungu rwa Shaitani.

1943 M.M.M.

Jehova akĩra Iburahimu atĩ ũrĩa ũngĩgakorũo arĩ “mbeũ” ĩyo yeranĩirũo angĩkoimana na njiarũa ciake.—Kĩambĩrĩria 22:18.

Thutha wa 1070 M.M.M.

Jehova akĩra Mũthamaki Daudi na thutha-inĩ mũrũ wake Suleimani atĩ “mbeũ” ĩrĩa yeranĩirũo ĩngĩkoima famĩlĩ-inĩ yao.—2 Samueli 7:12, 16; 1 Athamaki 9:3-5; Isaia 9:6, 7.

29 M.M.

Jehova akĩonania atĩ Jesu nĩwe “mbeũ” ĩrĩa yeranĩirũo, na nĩwe Mũgai wa gĩtĩ kĩa Daudi.—Agalatia 3:16; Luka 1:31-33; 3:21, 22.

33 M.M.

Nyoka ĩyo, nĩyo Shaitani, ĩkĩguraria “mbeũ” ĩyo kwa ihinda inyinyi rĩrĩa yoragithirie Jesu. Jehova akĩriũkia Jesu, akĩmũhe muoyo kũrĩa igũrũ, na agĩtĩkĩra thogora wa muoyo wake mũkinyanĩru. Ũndũ ũcio ũgĩtuĩka mũthingi wa andũ kuoherũo mehia na kũhotithia njiarũa cia Adamu gũkagĩa na muoyo wa tene na tene.—Kĩambĩrĩria 3:15; Atũmwo 2:32-36; 1 Akorintho 15:21, 22.

Nyoka, Shaitani, akĩharũrũkio gũkũ thĩ ta ũrĩa kweranĩirũo thĩinĩ wa Kũguũrĩrio

Kĩndũ mwaka wa 1914 M.M.

Jesu akĩharũrũkia nyoka ĩyo gũkũ thĩ, nĩyo Shaitani, na akĩmũhingĩrĩria kuo kwa ihinda inyinyi.—Kũguũrĩrio 12:7-9, 12.

Jesu agĩathana thĩ arĩ igũrũ ta ũrĩa kweranĩirũo thĩinĩ wa Kũguũrĩrio

Ihinda rĩrĩa rĩũkĩte

Jesu nĩ akaahingĩra Shaitani mĩaka 1,000 acoke amũniine, na njĩra ĩyo ahaane ta amũhehenja mũtwe. Muoroto wa Jehova wa kuuma o kĩambĩrĩria wĩgiĩ thĩ na andũ nĩ ũkaahinga, rĩĩtwa rĩake rĩtherio, na wathani wake woneke atĩ nĩ wa kĩhooto.—Kũguũrĩrio 20:1-3, 10; 21:3, 4.