Gwathĩkĩra aciari aku nĩ ta kũrĩha thiirĩ wa bengi. O ũrĩa ũronania atĩ ũrĩ mwĩhokeku, noguo ũrĩĩhokagwo makĩria
KŨRĨ ANDŨ ETHĨ
10 Kwĩhokeka
ŨGUO NĨ KUUGA ATĨA?
Andũ arĩa ehokeku nĩ mehokagwo nĩ aciari, arata, na andũ arĩa mamandĩkĩte wĩra. Nĩ mathĩkagĩra mawatho, makahingia ciĩranĩro ciao, na maragia ma hingo ciothe.
ŨNDŨ ŨCIO NĨ WA BATA NĨKĨ?
Hakuhĩ maũndũ-inĩ mothe, gĩkĩro kĩa wĩyathi ũrĩa mũndũ aheagwo kĩringanaga na wĩhokeku ũrĩa akoragwo onanĩtie kwa ihinda rĩigana ũna.
“Ũndũ ũrĩa mwega biũ ũngĩka nĩguo aciari aku makwĩhoke, nĩ kuonania atĩ nĩ ũgimarĩte na atĩ no ũhote kũrũmbũiya maũndũ na njĩra njega nginya rĩrĩa aciari aku matarĩ hakuhĩ.”—Sarahi.
ŨTAARO WA BIBILIA: “Ikaragai mũgĩĩthuthuragia ũrĩa mũtariĩ kũna.”—2 Akorintho 13:5.
ŨRĨA ŨNGĨKA
Ũkorũo ũrenda andũ makwĩhoke makĩria, kana ũrenda mambĩrĩrie gũkwĩhoka rĩngĩ, makinya maya marũmĩrĩire no magũteithie.
Aragia ma. Andũ nĩ matigaga gũkwĩhoka o na ihenya ũngĩaria maheeni. No ũngĩaragia ma, na makĩria ũhoro-inĩ wĩgiĩ mahĩtia maku, andũ nĩ makwĩhokaga.
“Nĩ ũndũ mũhũthũ kwaria ma rĩrĩa maũndũ marathiĩ wega. Ĩndĩ ũngĩaria ma maũndũ-inĩ maronania mawathe maku, andũ nĩ makwĩhokaga makĩria.”—Caiman.
ŨTAARO WA BIBILIA: “Twendaga gũikara tũrĩ ehokeku maũndũ-inĩ mothe.”—Ahibirania 13:18.
Tuĩka mũndũ ũngĩĩhokwo. Ũthuthuria ũmwe wekirũo thĩinĩ wa Amerika (US) woonanirie atĩ gĩcunjĩ kĩa 78 harĩ 100 kĩa andũ arĩa mathomeire maũndũ megiĩ kũhiũrania na aruti a wĩra moigaga atĩ gũtuĩka mũndũ ũngĩĩhokwo nĩ “ũmwe wa maũndũ matatũ marĩa ma bata mũno harĩ mũndũ kwandĩkwo wĩra-inĩ mũna.” Ũngĩĩruta gũtuĩka mũndũ ũngĩĩhokwo ihinda-inĩ rĩrĩ, ũndũ ũcio nĩ ũgagũteithia watuĩka mũndũ mũgima.
“Aciari akwa nĩ mamenyaga no manjĩhoke rĩrĩa ndaruta mawĩra makwa mategũtinda makĩndirikania. O ũrĩa ndĩronania atĩ ndireterera manjĩre ndute wĩra, noguo manjĩhokaga makĩria.”—Sarah.
ŨTAARO WA BIBILIA: “Ndĩ na ma atĩ nĩ ũgwĩka ũguo, . . . atĩ o na ũgwĩka makĩria ma ũguo ndoiga.”—Filemona 21.
Koragwo na wetereri. Ngũrani na gũkũra kĩĩmwĩrĩ kũrĩa andũ monaga na ihenya, kũgimara na gũtuĩka mũndũ ũngĩĩhokwo no kwage kuoneka na ihenya.
“Kwĩhokeka riita rĩmwe gũtingĩtũma aciari aku na andũ arĩa angĩ makwĩhoke. Ĩndĩ no mambĩrĩrie gũkwĩhoka kahora kahora ũngĩthiĩ na mbere gũkorũo ũrĩ mũndũ ũngĩĩhokwo.”—Brandon.
ŨTAARO WA BIBILIA: “Mwĩhumbei . . . wetereri.”—Akolosai 3:12.