Ruo rwa Gũkuĩrũo

“Thutha wa gũkorũo tũhikanĩtie na Sophiaa makĩria ma mĩaka 39, nĩ aarwarire mũrimũ wa ihinda iraihu agĩcoka agĩkua. Nĩ ndateithirio mũno nĩ arata, na ndaarĩ na maũndũ maingĩ ma gwĩka. No kwa ihinda rĩa mwaka ũmwe, ndaiguaga ndĩ na ruo rũnene mũno. Ndaiguaga ndukanĩirũo, na nginya ndiataũkagĩrũo nĩ ũrĩa ndaiguaga. O na rĩu, hakuhĩ mĩaka ĩtatũ thutha wake gũkua, njiguaga ruo rũnene rũrĩa rũũkaga rĩmwe nginya iterĩgĩrĩire.”—Kostas.

Wanakuĩrũo nĩ mũndũ wendete? Angĩkorũo wanakuĩrũo, no ũtaũkĩrũo nĩ ũrĩa Kostas aaiguaga. Ti maũndũ maingĩ marehagĩra mũndũ ruo rwa ngoro ta gũkuĩrũo nĩ mũndũ ũrĩa mahikanĩtie nake, mũndũ wa famĩlĩ, kana mũrata endete. Ataaramu arĩa mathuthuragia ruo rũrĩa rumanaga na gũkuĩrũo nĩ metĩkanagia na ũndũ ũcio. Gĩcunjĩ kĩmwe kĩrĩ ibuku-inĩ rĩa The American Journal of Psychiatry kiugĩte atĩ “rĩrĩa andũ aingĩ makuĩrũo, monaga ta matakona mwendwa wao rĩngĩ na magakorũo na ruo rũnene mũno.” Mũndũ ũragerera ruo ta rũu no eyũrie ũũ: ‘Hihi ngũtũũra njiguaga ũũ nginya rĩ? Hihi nĩ ngaakorũo na gĩkeno rĩngĩ? Ingĩruta kũ ũteithio?’

Macokio ma ciũria icio nĩ marĩrĩirio ngathĩti-inĩ ĩno ya Arahũkai! Gĩcunjĩ kĩrĩa kĩrũmĩrĩire nĩ kĩarĩrĩirie maũndũ marĩa ũngĩĩrĩgĩrĩra angĩkorũo nĩ wĩrĩga gũkuĩrũo nĩ mũndũ wendete. Icunjĩ icio ingĩ irũmĩrĩire nĩ cionanĩtie maũndũ mangĩgũteithia kũnyihanyihĩrũo nĩ kĩeha gĩaku.

Tũrehoka atĩ ũhoro ũrĩa ũrũmĩrĩire nĩ ũkũũmĩrĩria na ũteithie mũndũ o wothe ũragerera ruo rwa gũkuĩrũo.