Tungatĩra Jehova, no ti Shaitani
Ithuothe nĩ tũbataraga gũthuura. No tũthuure gũtungatĩra Jehova kana gũtungatĩra Shaitani na ndaimono ciake. Tũtingĩka maũndũ macio merĩ. Nĩ ũndũ wa ũũgĩ makĩria gũtungatĩra Jehova!
Jehova Nĩ Mwega
O ta ũrĩa tuona, ndaimono nĩ ikenaga rĩrĩa irarehera andũ ruo na rĩrĩa iramaheenia. Jehova ndahaana ũguo. Endete andũ o ta ũrĩa mũthuri endaga ciana ciake. “Kĩheo o gĩothe kĩega na gĩkinyanĩru” kiumaga kũrĩ We. (Jakubu 1:17) Gũtirĩ kĩndũ kĩega agiragĩrĩria andũ, o na rĩrĩa ũndũ ũcio ũramũrehera ruo rũnene.—Aefeso 2:4-7.
Jesu, Mũrũ wa Ngai, nĩ oonirie andũ wendo na njĩra ya kũmahonia mĩrimũ yao
Ta wĩcirie ũhoro wa maũndũ marĩa meekirũo gũkũ thĩ nĩ Jesu, Mũrũ wa Ngai. Nĩ aatũmire andũ maarĩ bubu marie na andũ maarĩ atumumu macoke kuona. Akĩhonia andũ maarĩ arwaru mangũ na angĩ maarĩ cionje. Nĩ aaingatire ndaimono na akĩhonia mĩrimũ ya mĩthemba yothe. Jesu, akĩhũthĩra hinya wa Ngai, o na nĩ aariũkirie andũ maakuĩte.—Mathayo 9:32-35; 15:30, 31; Luka 7:11-15.
Handũ ha kwaria maheeni nĩgetha atũhĩtithie-rĩ, Ngai aragia ma hingo ciothe. Ndarĩ hingo aheenagia mũndũ o na ũrĩkũ.—Ndari 23:19.
Wĩtheme Mĩtugo Ĩtarĩ Mĩtheru
O ta ũrĩa rũrenda rwa mbũmbũĩ rũnyitaga ngi rũrũmĩtie, no taguo andũ milioni nyingĩ makoragwo manyitĩtwo biũ nĩ maũndũ ma ndaimono na maheeni. Makoragwo metigĩrĩte andũ akuũ. Magetigĩra ndaimono. Magetigĩra irumi, nyoni njũru, ithitũ na mĩthaiga. Makoragwo mohetwo nĩ mawĩtĩkio na mĩtugo yumanĩte na maheeni ma Shaitani ũrĩa Mũcukani. Ndungata cia Ngai itikoragwo ciohetwo nĩ maũndũ macio.
Jehova akoragwo na hinya mũingĩ mũno gũkĩra Shaitani. Ũngĩtungatĩra Jehova, nĩ egũkũgitĩra kuuma kũrĩ ndaimono. (Jakubu 4:7) Mĩthaiga ndĩngĩgwĩka ũndũ. Kwa ngerekano-rĩ, bũrũri-inĩ wa Nigeria, arogi atatũ maageririe kũroga Mũira wa Jehova waregete kwehera taũni ĩmwe. Hĩndĩ ĩrĩa mĩthaiga yao yaagire kũruta wĩra, ũmwe wao nĩ eetigĩrire mũno, agĩthiĩ harĩ Mũira ũcio wa Jehova, na akĩhoya oherũo.
Andũ a Efeso nĩ maacinire mabuku mao marĩa maarĩ na maũndũ ma ũragũri
Ndaimono ingĩgũthumbũra-rĩ, no ũkaĩre Jehova ũkĩgwetaga rĩĩtwa rĩake na nĩ egũkũgitĩra. (Thimo 18:10) No nĩguo Ngai akũgitĩre-rĩ, no mũhaka ũtigane biũ na kĩndũ kana ũndũ o wothe ũhutanĩtie na ũgo na ũragũri na ũthathaiya wa ndaimono. Ũguo nĩguo athathaiya a Ngai thĩinĩ wa Efeso ya tene meekire. Maacokanĩrĩirie mabuku mao mothe marĩa maahutanĩtie na ũragũri na makĩmacina. (Atũmwo 19:19, 20) Ndungata cia Ngai ũmũthĩ no mũhaka ciĩke o ũguo. Eheria biũ mĩthaiga, ithitũ, mabuku marĩ na maũndũ ma ũragũri, na kĩndũ kĩngĩ o gĩothe kĩhutanĩtie na mĩtugo ya ũgo.
Wĩmenyerie Ũthathaiya wa Ma
Angĩkorũo nĩ ũkwenda gũkenia Ngai, gũtiga gwĩka maũndũ moru na gũtigana na ndini ya maheeni gwiki ti kũiganu. No mũhaka wĩmenyerie ũthathaiya wa ma. Bibilia nĩ yonanagia maũndũ marĩa marabatarania:
Thiaga mĩcemanio ya Gĩkristiano.—Ahibirania 10:24, 25
Wĩrutage Bibilia.—Johana 17:3
Hunjagĩria andũ arĩa angĩ.—Mathayo 24:14
Hoyaga Jehova.—Afilipi 4:6, 7
Batithio.—Atũmwo 2:41
Nyitanĩra na Aira a Jehova
Shaitani o hamwe na ndaimono nĩ makoragwo na andũ gũkũ thĩ arĩa marutanaga na mageka maũndũ moru. No ningĩ o nake Jehova nĩ akoragwo na andũ ake. Andũ acio nĩ Aira a Jehova. (Isaia 43:10) Thĩinĩ wa thĩ yothe, nĩ kũrĩ Aira a Jehova makĩria ma milioni inyanya. Othe mageragia mũno gwĩka maũndũ mega na kũruta andũ ũhoro ũrĩa wa ma. Thĩinĩ wa mabũrũri maingĩ, no ũmakore thĩinĩ wa Nyũmba cia Ũthamaki, na nĩ megũkũnyita ũgeni na njĩra ya wendo.
Wĩra wao nĩ gũteithia andũ arĩa angĩ matungatĩre Ngai. Nĩ megũkũruta Bibilia ũrĩ gwaku mũciĩ, magũteithie ũmenye gũthathaiya Jehova na njĩra ĩrĩa yagĩrĩire. Ndũrabatara kũrĩha nĩgetha ũrutwo. Aira a Jehova nĩ makenagĩra kũrutana ma tondũ nĩ mendete andũ na makenda Jehova Ngai.
Aira a Jehova nĩ megũgũteithia ũtungatĩre Ngai