Ithomo rĩa 3

Jesu Kristo Nũũ?

Nĩũndũ kĩ Jesu etagwo Mũriũ wa “irigithathi” wa Ngai? (1)

Nĩũndũ kĩ etagwo “Ũhoro”? (1)

Nĩũndũ kĩ Jesu okire gũkũ thĩ arĩ mũndũ? (2-4)

Nĩũndũ kĩ aaringire ciama? (5)

Nĩ atĩa Jesu arĩĩka o ica ikuhĩ? (6)

1. Jesu aatũũraga igũrũ arĩ mũndũ wa kĩĩroho mbere ya gũũka gũkũ thĩ. Nĩwe warĩ kĩũmbe kĩa mbere kĩa Ngai, na kwoguo etagwo Mũriũ wa “irigithathi” wa Ngai. (Akolosai 1:15; Kũguũrĩrio 3:14) Jesu nĩwe Mũriũ ũrĩa wiki tu Ngai ombire we mwene. Jehova aahũthĩrire Jesu atanatuĩka mũndũ, arĩ “njorua ya wĩra” yake harĩ kũũmba indo iria ingĩ ciothe igũrũ o na gũkũ thĩ. (Thimo 8:22-31, NW; Akolosai 1:16, 17) O na ningĩ Ngai nĩaamũhũthĩrire arĩ mwaria mũnene Wake. Nĩkĩo Jesu etagwo “Ũhoro.”—Johana 1:1-3; Kũguũrĩrio 19:13.

2. Ngai nĩaatũmire Mũriũ Wake gũkũ thĩ na njĩra ya gũthamia muoyo wake akĩũingĩria thĩinĩ wa nda ya Mariamu. Kwoguo Jesu ndaarĩ na ithe wa kĩĩmũndũ. Kĩu nĩkĩo gĩtũmi we ndaagaire mehia kana kwaga gũkinyanĩra o na kũrĩkũ. Ngai aatũmire Jesu gũkũ thĩ nĩũndũ wa itũmi ithatũ: (1) Atũrute ũhoro wa ma ũkoniĩ Ngai (Johana 18:37), (2) arũmie wĩhokeku mũkinyanĩru wa ũthingu, na atũhe kĩonereria gĩa kũrũmĩrĩra (1 Petero 2:21), na (3) arute muoyo wake ũtuĩke ihaki nĩguo tuohorũo kuuma mehia-inĩ na gĩkuũ-inĩ. Ũndũ ũcio wabatarainie nĩkĩ?—Mathayo 20:28.

3. Nĩũndũ wa kwaga gwathĩkĩra watho wa Ngai, mũndũ wa mbere, Adamu, nĩekire ũrĩa Bibilia ĩĩtaga “mehia.” Kwoguo Ngai akĩmũtuĩra ituĩro rĩa gĩkuũ. (Kĩambĩrĩria 3:17-19) We ndaacokire gũkinyĩra rĩngĩ ithimi cia Ngai, kwoguo ndaigana gũcoka gũtuĩka mũkinyanĩru. Kahora kahora agĩkũra na agĩkua. Adamu akinyĩirie ciana ciake ciothe mehia. Nĩkĩo ithuĩ na ithuĩ tũkũraga, tũrũaraga, na nĩtũkuaga. Andũ mangĩhonokio atĩa?—Aroma 3:23; 5:12.

4. Jesu aarĩ mũndũ mũkinyanĩru o ta Adamu. No ũtiganu na Adamu-rĩ, Jesu aarĩ mwathĩki biũ harĩ Ngai o na ruungu rwa igerio rĩrĩa inene kũrĩ mothe. Kwoguo we nĩangĩahotire kũruta muoyo wake mũkinyanĩru wa kĩĩmũndũ ũtuĩke ihaki nĩguo arĩhĩre mehia ma Adamu. Ũguo nĩguo Bibilia ĩĩtaga “ũkũũri.” Na njĩra ĩo nĩkũngĩahotekire ciana cia Adamu ciohorũo kuuma ituĩro-inĩ rĩa gĩkuũ. Othe arĩa maigaga wĩtĩkio wao harĩ Jesu no mahote kuoherũo mehia mao na maheo muoyo wa gũtũũra tene na tene.—1 Timotheo 2:5, 6; Johana 3:16; Aroma 5:18, 19.

5. Rĩrĩa aarĩ gũkũ thĩ Jesu nĩaahonirie mĩrimũ, nĩaaheire irio arĩa maahũtiĩ, agĩkiria ihuhũkanio. O na akĩriũkia akuũ. Nĩũndũ kĩ aaringire ciama? (1) Nĩaaiguĩrĩire tha andũ arĩa maanyamarĩkaga, na akĩenda kũmateithia. (2) Ciama ciake ciarĩ ũira wa atĩ aarĩ Mũriũ wa Ngai. (3) Cionanirie ũrĩa agekĩra andũ arĩa aathĩki hingo ĩrĩa agaathana thĩ arĩ Mũthamaki.—Mathayo 14:14; Mariko 2:10-12; Johana 5:28, 29.

6. Jesu nĩaakuire na akĩriũkio nĩ Ngai arĩ kĩũmbe kĩa roho, na agĩcoka igũrũ. (1 Petero 3:18) Kuumagia hingo ĩo, Ngai nĩamũtuĩte Mũthamaki. O ica ikuhĩ Jesu nĩarĩeheria waganu na gũthĩnĩka guothe kuuma thĩ ĩno.—Thaburi 37:9-11; Thimo 2:21, 22.

[Pictures on page 7]

Ũtungati wa Jesu waingĩrĩtie thĩinĩ, kũrutana, kũringa ciama, o na kũruta muoyo wake nĩũndũ witũ