Ithomo rĩa 16

Itua Rĩaku rĩa Gũtungatĩra Ngai

No mũhaka wĩke atĩa nĩguo ũtuĩke mũrata wa Ngai? (1, 2)

Ũngĩĩamũrĩra Ngai atĩa? (1)

Nĩ rĩ wagĩrĩirũo nĩ kũbatithio? (2)

Ũngĩgĩa na hinya atĩa wa gũthiĩ na mbere ũrĩ mwĩhokeku harĩ Ngai? (3)

1. Nĩguo ũtuĩke mũrata wa Ngai, no mũhaka ũgĩe na ũmenyo wa kũigana wa ma ya Bibilia (1 Timotheo 2:3, 4), wĩtĩkie maũndũ marĩa wĩrutĩte (Ahibirania 11:6), wĩrire mehia maku (Atũmwo 17:30, 31), na ũgarũrĩre mũthiĩre waku wa mũtũũrĩre. (Atũmwo 3:19) Nĩguo wendo waku harĩ Ngai ũngĩgũikaikia ũmwĩamũrĩre. Ũguo wĩ na gĩtũmi gĩa atĩ mahoya-inĩ maku wee mwene, ma hitho-inĩ nĩũkũmwĩra atĩ nĩũreheana harĩ we nĩguo wĩke wendi wake.—Mathayo 16:24; 22:37.

2. Thutha wa kwĩamũrĩra Ngai, wagĩrĩirũo ũbatithio. (Mathayo 28:19, 20) Kũbatithio kũmenyithagia andũ othe atĩ nĩwĩamũrĩire Jehova. Kwoguo kũbatithagio arĩa tu me na ũkũrũ wa kũigana gũtua itua rĩa gũtungatĩra Ngai. Rĩrĩa mũndũ arabatithio-rĩ, mwĩrĩ wake wothe wagĩrĩire kũrindwo maĩ-inĩ ihinda inini.a—Mariko 1:9, 10; Atũmwo 8:36.

3. Thutha wa kwĩamũrĩra, Jehova ekwĩrĩgĩrĩra ũtũũre kũringana na kĩĩranĩro gĩaku. (Thaburi 50:14; Kohelethu 5:4, 5) Mũcukani nĩekũgeria gũkũgiria ndũgatungatĩre Jehova. (1 Petero 5:8) No kuhĩhĩria Ngai mahoya-inĩ. (Afilipi 4:6, 7) Wĩrute Kiugo gĩake o mũthenya. (Thaburi 1:1-3) Wĩgwatanie mũno na gĩkundi. (Ahibirania 13:17) Weka ũguo wothe-rĩ, nĩũkũgĩa na hinya wa gũthiĩ na mbere ũrĩ mwĩhokeku harĩ Ngai. No ũhote na njĩra ĩo gwĩka tene na tene maũndũ mothe marĩa Ngai endaga wĩke!

[Ũhoro wa magũrũ-inĩ]