Ma Ĩkoniĩ Muoyo nĩ Ũndũ wa Bata
“Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.”—JOHANA 8:32.
1. Nĩ kĩ nĩ ũndũ wa bata gũtuĩria wĩtĩkio witũ igũrũ rĩa muoyo na gĩkuũ?
MŨNO makĩria-rĩ, wĩtĩkio igũrũ rĩa gĩkuũ na muoyo thutha wa gĩkuũ nĩ moimĩrĩro ma mũrerere wa mũndũ wa kĩndini na wa mĩikarĩre. Ta ũrĩa tũrĩkĩtie kuona-rĩ, wĩtĩkio ũcio ũingĩrĩtie thĩinĩ wĩtĩkio mũingĩ kuuma wĩtĩkio wa atĩ muoyo ũkinyagĩra muoroto waguo wa mũico thutha tu wa gũciarũo rĩngĩ kaingĩ kaingĩ gũkinya wĩtĩkio wa atĩ maica ma ihinda rĩmwe matuaga ũrĩa gũgatuĩka kwĩ mũndũ thutha-inĩ. Nĩũndũ ũcio-rĩ, hihi mũndũ ũmwe aahota kwĩigua atĩ e na ma ya gũtukana thutha-inĩ na muoyo mũnene wa ngai mũnene thutha wa gũkua, ũngĩ akorũo na ma ya gũkinyĩra Nirvana, na ũngĩ nake akorũo na ma ya kũgĩa na kĩheo kĩa igũrũ. Kwoguo-rĩ, ma nĩ ĩrĩkũ? Tondũ wĩtĩkio witũ nĩũgarũraga mawoni maitũ, ciĩko, na matua maitũ-rĩ, githĩ tũtikĩagĩrĩirũo nĩ kũhangaĩkĩra kũgĩa na macokio ma kĩũria kĩu?
2, 3. (a) Nĩũndũ kĩ no tũgĩe na ma ya ũrĩa Bibilia yugaga igũrũ rĩa muoyo? (b) Ta ũrĩa kwĩrĩtwo thĩinĩ wa Bibilia-rĩ, ma nĩ ĩrĩkũ igũrũ rĩa muoyo?
2 Ibuku rĩa tene makĩria thĩinĩ wa thĩ, Bibilia, rĩrĩ na historia ya mũndũ kuuma o hingo ya kũũmbwo kwa muoyo wa mbere wa mũndũ. Morutani marĩo matirĩ filosifia na irĩra cia andũ. Bibilia ĩheanaga ũhoro wa ma ĩtheretie igũrũ rĩa muoyo: Muoyo waku nĩ we, akuũ matithiaga na mbere gũtũũra o na hanini, na arĩa marĩ thĩinĩ wa kĩririkano kĩa Ngai nĩmakariũkio hingo yake yakinya. Kũmenya ũguo kwahota gũkorũo na gĩtũmi kĩrĩkũ harĩ we?
3 “Nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ,” Jesu Kristo akĩĩra arũmĩrĩri ake. (Johana 8:32) Ĩĩ-ni, ũhoro-wa-ma nĩũkũũraga andũ ũkombo-inĩ. No ma ĩkoniĩ muoyo ĩngĩmakũũra ũkombo-inĩ wa kĩĩ?
Gũkũũrũo Kuuma Kwaga Gwĩtigĩra na Kwaga Gũte Mwĩhoko
4, 5. (a) Ma igũrũ rĩa muoyo yeheragia gwĩtigĩra kũrĩkũ? (b) Kĩĩrĩgĩrĩro gĩa kũriũka kĩomĩrĩirie atĩa mũirĩtu woragagwo nĩ mũrimũ?
4 “Andũ aingĩ nĩmetigagĩra gĩkuũ na mageragia kwaga gwĩciria ũhoro wakĩo,” riugaga ibuku The World Book Encyclopedia. “Kiugo ‘gĩkuũ’ kĩo kĩene gĩkuhĩhĩirie gũtuĩka kiugo gĩtangĩgweteka na kũu Ithũĩro,” oigaga mũhistoria ũmwe. Na thĩinĩ wa mĩikarĩre ĩmwe ciugo ta “nĩaretirũo” na “nĩarambatire” ihũthagĩrũo hingo ciothe kuuga atĩ mũndũ nĩakuĩte. Gwĩtigĩra gĩkuũ ũguo na ma nĩ gwĩtigĩra ũrĩa ũtoĩkaine, tondũ gĩkuũ nĩ kĩriga harĩ andũ aingĩ. Kũmenya ma ĩkoniĩ ũrĩa gũtuĩkaga rĩrĩa twakua kweheragia gwĩtigĩra kũu.
5 Ta kĩonereria-rĩ, ta cũrania mwĩcirĩrie wa Michaelyn wa mĩaka 15. Aarĩ na mũrimũ wa thakame nake erekeire gũkua gĩkuũ gĩa kũiguithia tha mũno. Nyina, Paula, aririkanaga ũũ: “Michaelyn oigire atĩ ndaramaka o na angĩkua tondũ nĩoĩ atĩ gĩkuũ no kĩa ihinda tu. Nĩtwarĩtie maũndũ maingĩ makoniĩ thĩ njerũ ya Ngai na arĩa othe makariũkio thĩinĩ wayo. Michaelyn aarĩ na wĩtĩkio mũnene thĩinĩ wa Jehova Ngai na thĩinĩ wa kũriũka—nake ndaarĩ na nganja o na hanini.” Kĩĩrĩgĩrĩro gĩa kũriũka nĩkĩehereirie mũirĩtu ũcio mũnyinyi warĩ mũmĩrĩru gwĩtigĩra gĩkuũ.
6, 7. Ma igũrũ rĩa muoyo ĩtũmaga twage gũte mwĩhoko igũrũ rĩa kĩĩ? Heana kĩonereria.
6 Ma yahutirie atĩa aciari a Michaelyn? “Gĩkuũ kĩa mũirĩtu witũ mũnyinyi nĩgĩatũiguithirie ruo mũno gũkĩra kĩndũ kĩngĩ o gĩothe,” oigaga Jeff, ithe wake. “No nĩtwĩrĩgĩrĩire biũ kĩĩranĩro kĩa Jehova gĩa kũriũka, na ithuĩ twĩrĩgagĩrĩra kũmũnyita Michaelyn witũ mwende moko-inĩ maitũ rĩngĩ. Kũu gũgaagĩkorũo kũrĩ kuonana rĩngĩ ta kũrĩkũ!”
7 Ĩĩ-ni, ma ĩkoniĩ muoyo yahota gũtũma mũndũ aage gũte mwĩhoko tondũ wa gĩkuũ kĩa mwendwa. Hatirĩ nganja atĩ gũtirĩ kĩndũ kĩngĩhota kweheria biũ ruo na kĩeha kĩrĩa kĩgĩaga rĩrĩa mwendwa witũ aakua. O na kũrĩ ũguo-rĩ, kĩĩrĩgĩrĩro gĩa kũriũka nĩ kĩnyiha-nyihagia kĩrĩro na gĩgatũma ũkorũo arĩ ũndũ mũhũthũ makĩria gũkirĩrĩria.
8, 9. Ma igũrũ rĩa mũikarĩre wa akuũ ĩtũmaga twage gwĩtigĩra kĩ?
8 Ma ya Kĩmaandĩko igũrũ rĩa mũikarĩre wa akuũ o na ningĩ nĩtũmaga twage gwĩtigĩra akuũ. Kuuma merute ma ĩo, andũ aingĩ arĩa hingo ĩmwe maarĩ ũkombo-inĩ wa mĩtugo ya ũrigiti ũhoro-inĩ wĩgiĩ akuũ rĩu matimakagio nĩ kĩrumi, nyoni njũru, ithitũ, kana makaruta mahaki ma goro mũno nĩguo mahoroherie aciari ao a tene akuũ nĩguo atĩ magirie magacoka na gũthumbũra arĩa me muoyo. Ma nĩ atĩ, tondũ akuũ “matirĩ ũndũ moĩ,” maũndũ macio nĩ ma tũhũ.—Kohelethu 9:5.
9 Ma ĩrĩa yonekaga thĩinĩ wa Bibilia igũrũ rĩa muoyo kũna nĩĩkũũraga andũ ũkombo-inĩ na nĩ ya kwĩhokwo. No tecirie ũhoro wa itanya rĩa mwanya rĩrĩa Bibilia ĩkũheaga.
[Mbica karatathi ka 29]
Ma igũrũ rĩa muoyo ĩtũkũũraga kuuma ũkombo-inĩ wa gwĩtigĩra gĩkuũ, gwĩtigĩra akuũ, Gũte mwĩhoko tondũ wa gĩkuũ kĩa mwendwa