Ithomo Rĩa 2

Ngai Nĩwe Mũrata Ũrĩa Mwega Makĩria Ũngĩgĩa Nake

Gũtuĩka mũrata wa Ngai nĩguo ũndũ ũrĩa mwega makĩria ũngĩĩkĩka kũrĩ wee o rĩ o rĩ. Ngai nĩegũkũruta ũrĩa ũngĩgĩa na gĩkeno na ũgitĩri; nĩegũkuohora ũtigane na wĩtĩkio mũingĩ wĩ mahĩtia na maũndũ memenyeretio mathũkagia andũ. We nĩarĩthikagĩrĩria mahoya maku. Nĩarĩgũteithagia ũkenagĩre thayũ wa na kũu thĩinĩ na wĩhoko ũtarĩ nganja. (Thaburi 71:5; 73:28) Ngai nĩarĩgũtiiragĩrĩra mahinda-inĩ ma thĩna. (Thaburi 18:18) Na no wamũkĩre kĩheo kĩa Ngai kĩa muoyo wa tene na tene.—Aroma 6:23.

O ũrĩa ũrakuhĩrĩria Ngai, nĩũgũkuhĩrĩria arata angĩ a Ngai. O nao nĩmegũtuĩka arata aku. Ma nĩ atĩ, megũtuĩka o ta ariũ na aarĩ a nyũkwa. Nĩmegũkenera gũkũruta ũhoro ũkoniĩ Ngai na nĩmarĩgũteithagia na magwĩkĩrage ngoro.

Tũtiiganaine na Ngai. Ũgĩcaria ũrata wa Ngai-rĩ, no mũhaka ũtaũkĩrũo nĩ ũndũ ũmwe wa bata. Ũrata na Ngai ti ũrata wa andũ maiganaine. We nĩ mũkũrũ na mũũgĩ makĩria na arĩ na hinya makĩria gũtũkĩra. Nĩwe wagĩrĩirũo gũtuĩka Mwathi witũ. Kwoguo-rĩ, tũngĩenda gũtuĩka arata ake, no mũhaka tũmũthikĩrĩrie na twĩke ũrĩa atwĩraga twĩke. Ũguo ũrĩtũgunaga hingo ciothe.—Isaia 48:18.