Gwĩkĩra Andũ Ngoro Mahũthĩre Bibilia

MUOROTO witũ nĩ kwerekeria andũ othe thĩinĩ wa Kiugo kĩa Ngai, Bibilia. Ibuku rĩu itheru nĩrĩo kĩhumo kĩa ũhoro ũrĩa tũhunjagia, na twendaga andũ mamenye atĩ ndũmĩrĩri ĩrĩa tũmaheaga yumanĩte na Ngai, no ti na ithuĩ ene. Andũ nĩ marabatara gũteithio mehoke Bibilia.

Ũtungata-inĩ. Hingo ciothe rĩrĩa ũrehaarĩria nĩ ũndũ wa ũtungata, thuura rĩandĩko rĩmwe kana makĩria ma kũhũthĩra ũkĩaria na andũ arĩa mangĩenda gũgũthikĩrĩria. O na angĩkorũo ũbangĩte kwaria na mũndũ na njĩra nguhĩ ũmũtigĩre kĩndũ gĩa gũthoma, kaingĩ nĩ wega kũmũthomera rĩandĩko rĩa Bibilia rĩrĩa rĩagĩrĩire. Bibilia nĩ ĩrĩ ũhoti mũnene wa kũgucĩrĩria arĩa a mũhaano wa ngʼondu gũkĩra ũndũ ũngĩ o wothe tũngĩmeera ithuĩ ene. Rĩrĩa kwaga kũhotekeka gũthoma Bibilia ĩmwe kwa ĩmwe, no ũgwete ũrĩa rĩandĩko rĩna riugĩte. Hĩndĩ ya karine ya mbere, ikũnjo cia Maandĩko itiarĩ nyingĩ. O na kũrĩ ũguo, Jesu na atũmwo ake nĩ maagwetaga maũndũ kuuma Maandĩko-inĩ. O na ithuĩ nĩ twagĩrĩirũo kwĩrutanĩria kũiga maandĩko meciria-inĩ na tũmahũthagĩre ũtungata-inĩ witũ ũrĩa kwagĩrĩire, rĩmwe na rĩmwe tũkagweta tu ũrĩa moigĩte.

Rĩrĩa wagĩa na mweke wa gũthomera mwene nyũmba Bibilia, mĩnyite ũndũ ekuona harĩa ũrathoma. Mwene nyũmba angĩtwarana nawe Bibilia-inĩ yake, kĩrĩa egũthoma no kĩmũhutie mũno.

O na kũrĩ ũguo, no mũhaka ũririkane atĩ ataũri amwe a Bibilia nĩ mathũkĩtie Kiugo kĩa Ngai. Ũrĩa mataũrĩte no wage kũringana biũ na ũrĩa waandĩkĩtwo thiomi-inĩ cia tene cia Bibilia. Bibilia imwe iria itaũrĩtwo mahinda-inĩ maya nĩ cieheretie biũ rĩĩtwa rĩa Ngai, ikaaga kwaria ũhoro wa ma wĩgiĩ ũrĩa akuũ matariĩ kũringana na ũrĩa Bibilia yoigĩte kĩambĩrĩria-inĩ, na ikahithĩrĩra ũrĩa Bibilia yugaga igũrũ rĩgiĩ muoroto wa Ngai harĩ thĩ. Nĩguo ũteithie mũndũ one mahĩtia macio, no ũbatare kũringithania mĩhari ĩrĩa ĩrĩ na morutani macio ũkĩhũthĩra Bibilia mwanya mwanya kana ũkĩhũthĩra Bibilia yataũrĩtwo tene ya rũthiomi o rũu. Thĩinĩ wa maũndũ matiganĩte, ibuku rĩa Kutoa Sababu kwa Kutumia Maandiko nĩ rĩonanĩtie ũrĩa Bibilia mwanya mwanya citaũrĩte ciugo iria cia bata thĩinĩ wa mĩhari ĩrĩa ĩhũthagĩrũo kaingĩ. Mũndũ o wothe wendete ma no akene mũno kũmenya maũndũ macio.

Mĩcemanio-inĩ ya Kĩũngano. Andũ othe nĩ magĩrĩirũo gwĩkĩrũo ngoro mahũthagĩre Bibilia ciao hĩndĩ ya mĩcemanio ya kĩũngano. Ũndũ ũcio nĩ ũteithagia harĩ maũndũ maigana ũna. Athikĩrĩria nĩ mahotaga gũtwarana na ũhoro ũrĩa ũrarĩrĩrio. Nĩ ũteithagia athikĩrĩria kũrikĩra biũ ũhoro-inĩ ũrĩa maraheo nĩ mwaria. Na nĩ ũtĩtĩrithagĩria ageni atĩ Bibilia kũna nĩyo kĩhumo kĩa wĩtĩkio witũ.

Nĩguo athikĩrĩria matwarane nawe Bibilia-inĩ ciao rĩrĩa ũrathoma Maandĩko, gũkũringana mũno na njĩra yaku ya kũmekĩra ngoro. Ĩmwe ya njĩra iria njega biũ nĩ kũmeera ĩmwe kwa ĩmwe matwarane nawe ũgĩthoma.

Nĩwe wagĩrĩirũo gũtua nĩ maandĩko marĩkũ ũrenda gũtĩtĩrithia na wĩre athikĩrĩria mahumbũrie. Nĩ wega gũthoma maandĩko marĩa megũgũteithia ũtĩtĩrithie maũndũ marĩa ma bata makĩria. Ũcoke mahinda mangĩgwĩtĩkĩria wongerere mangĩ manyinyi ma kũnyita mbaru kĩrĩa ũrarutana.

Ma nĩ atĩ, kũgweta rĩandĩko kana kwĩra athikĩrĩria matwarane nawe ũkĩrĩthoma ti hingo ciothe gũkoragwo kũrĩ kũiganu. Ũngĩthoma rĩandĩko rĩmwe ũcoke ũthiĩ harĩ rĩngĩ mbere ya athikĩrĩria aku maguũrĩtie rĩu rĩa mbere, thutha wa kahinda kanini nĩ megũkua ngoro na nĩ megũtiga gũtwarana nawe ũgĩthoma Bibilia. Baara wega. Wona atĩ andũ aingĩ nĩ marĩkĩtie kũhumbũria rĩandĩko, rĩthome.

Wĩcirie mbere. Gweta rĩandĩko maita maigana ũna mbere ya kũrĩthoma. Ũndũ ũcio nĩ ũkũnyihanyihia mahinda marĩa moraga mwaria etereire athikĩrĩria mahumbũrie. O na gũtuĩka weterera athikĩrĩria mahumbũrie rĩandĩko ndũgũkorũo na mahinda ma kũheana ũhoro mũingĩ-rĩ, nĩ mekũgunĩka.