Gwĩkĩra Athikĩrĩria Ngoro na Kũmomĩrĩria

NDUNGATA cia Ngai ciagĩrĩirũo kwĩigua ciĩkĩrĩtwo hinya thĩinĩ wa kĩũngano gĩa Gĩkristiano o na angĩkorũo irĩ na mathĩna mahaana atĩa. Kwoguo, no mũhaka makĩria athuri a kĩũngano matigagĩrĩre atĩ mĩario na ũtaaro wao nĩ cia gwĩkĩrana ngoro. Athuri magĩrĩirũo gũtuĩka “ta handũ ha kwĩhitha rũhuho, o na ta handũ ha kwĩũa mbura ya kĩhuhũkanio, . . . ta njũĩ cia maĩ irĩ kũndũ kũũmũ, o na ta kĩĩruru kĩa rũaro rũa ihiga inene rĩrĩ werũ mũhĩnju.”—Isa. 32:2.

Angĩkorũo wĩ mũthuri wa kĩũngano, hihi mĩario yaku nĩ ĩcanjamũraga na ĩkomĩrĩria? Hihi nĩ ĩrurumũraga arĩa marerutanĩria gũtungatĩra Jehova na wĩhokeku? Hihi nĩ ĩkagĩra andũ hinya makirĩrĩrie harĩ gwĩka wendi wa Ngai o na kũrĩ na mĩnyamaro kana ũkararia? Ĩ angĩkorũo thĩinĩ wa athikĩrĩria aku nĩ harĩ amwe mathuthĩkĩte ngoro, marĩ na moritũ ma kĩĩmbeca, kana marahiũrania na mũrimũ mũru ũtarĩ kĩhonia? No wĩkĩre Akristiano hinya na ‘ciugo cia kanua gaku.’—Ayub. 16:5.

Hũthĩra mweke ũrĩa ũrĩ naguo wĩ mwaria gũteithia Akristiano arĩa angĩ macarie ũteithio harĩ Jehova na harĩ indo iria aheanĩte nĩguo magĩe na hinya na mwĩhoko.—Rom. 15:13; Ef. 6:10.

Ririkania Athikĩrĩria Maũndũ Marĩa Jehova Aneka. Njĩra ĩmwe ya bata harĩ kũũmĩrĩria andũ nĩ kũmonia ũrĩa mahinda mahĩtũku Jehova aateithirie andũ ake hĩndĩ ya moritũ.—Rom. 15:4.

Isiraeli matanaingĩra Bũrũri wa Kĩĩranĩro ũrĩa watũũragũo nĩ ndũrĩrĩ iria ciarĩ thũ ciao, Jehova eerire Musa ‘omĩrĩrie na ekĩre Joshua hinya.’ Musa eekire ũguo atĩa? Joshua akĩĩigũagĩra, Musa nĩ aaririkanirie Aisiraeli othe maũndũ marĩa Jehova aamekĩire hingo ĩrĩa moimaga Misiri. (Gũcok. 3:28; 7:18) Ningĩ nĩ aamaririkanirie ũhootani mũingĩ ũrĩa Jehova aamahotanĩire makĩrũa na Aamori. Musa agĩcoka agĩkĩra Joshua ngoro ũũ: “Gĩa na hinya, na ũũmĩrĩrie.” (Gũcok. 31:1-8) Hingo ĩrĩa ũrekĩra aarĩ na ariũ a Ithe witũ ngoro-rĩ, hihi nĩ ũmateithagia magĩe na hinya na njĩra ya kũmaririkania maũndũ marĩa Jehova amekĩire?

Rĩmwe na rĩmwe andũ marĩ mũndũ ũmwe ũmwe nĩ maritũhagĩrũo mũno nĩ mathĩna mao nginya makarigwo kana kũrĩ hĩndĩ makaagĩa na irathimo cia Ũthamaki. Maririkanie ũrĩa ciĩranĩro cia Jehova irĩ cia kwĩhokeka.—Josh. 23:14.

Thĩinĩ wa mabũrũri mamwe, ariũ a Ithe witũ nĩ magirĩtio nĩ thirikari kũhunjia ũhoro ũrĩa mwega. Kũndũ ta kũu, athuri a kĩũngano no mahũthĩre maũndũ marĩa atũmwo a Jesu Kristo meeyoneire gwĩkĩra Akristiano hinya. (Atũm. 4:1–5:42) Gũtaarĩria ũrĩa Ngai aatongoririe maũndũ ta ũrĩa ibuku rĩa Esiteri rĩonanĩtie hatarĩ nganja nĩ gũkũhe ariũ a Ithe witũ ũmĩrĩru.

Rĩmwe na rĩmwe kũrĩ andũ mathiaga mĩcemanio-inĩ ya kĩũngano ĩndĩ makaga gũthiĩ na mbere kĩĩroho. No makorũo magĩciria atĩ Ngai ndangĩmohera atĩ tondũ mĩthiĩre yao ya hau kabere yarĩ mĩũru mũno. No ũtaarĩrie ũrĩa Jehova aaiguĩrĩire Mũthamaki Manase tha. (2 Maũ. 33:1-16) Kana warie ũhoro wa andũ thĩinĩ wa Korintho ya tene arĩa maagarũrĩire mĩthiĩre yao, magĩtuĩka Akristiano, na Ngai akĩmatua athingu.—1 Kor. 6:9-11.

Hihi nĩ harĩ amwe mareciria atĩ mathĩna marĩa marahiũrania namo maronania atĩ nĩ matigĩte gwĩtĩkĩrĩka nĩ Ngai? No ũmaririkanie mĩnyamaro ĩrĩa Ayubu aacemanirie nayo na ũrĩa aarathimirũo na njĩra nene nĩ ũndũ wa kũrũmia wĩkindĩru wake harĩ Jehova. (Ayub. 1:1-22; 10:1; 42:12, 13; Thab. 34:19) Ahorerania a maheeni a Ayubu moigĩte atĩ no mũhaka akorũo nĩ eehĩtie. (Ayub. 4:7, 8; 8:5, 6) Ngũrani nao, rĩrĩa Paulo na Baranaba moomagĩrĩria arutwo na ‘makamataara marũmagie wĩtĩkio,’ maamerire ũũ: “Ũthamaki wa Ngai ndũngĩtonyeka nĩ ithuĩ tiga o twambire kuona mathĩna maingĩ.” (Atũm. 14:21, 22) O na ũmũthĩ, no wĩkĩre hinya arĩa marahiũrania na magerio na njĩra ya kuonania atĩ ũkirĩrĩria hĩndĩ ya mĩnyamaro nĩ ũbataranagia harĩ Akristiano othe na nĩ wa bata mũno maitho-inĩ ma Ngai.—Thim. 27:11; Mat. 24:13; Rom. 5:3, 4; 2 Tim. 3:12.

Ĩkĩra athikĩrĩria aku ngoro mecirie ũrĩa Jehova ahingĩtie ciĩranĩro ciake mĩtũũrĩre-inĩ yao. Na njĩra ya kũmaririkania ũrĩa Jehova amekĩire, mahota kuona ũrĩa amateithĩtie marĩ mũndũ ũmwe ũmwe o ta ũrĩa eranĩire. Thaburi 32:8 yugaga ũũ: “Nĩngũkũũhĩgia, nguonererie njĩra ĩrĩa ũrĩgeraga; ndĩĩgũtaaraga o ngĩkũbaraga na riitho rĩakwa.” Ũngĩririkania athikĩrĩria aku ũrĩa Jehova anamatongoria kana akamekĩra hinya, nĩ ũkũmateithia meyonere atĩ nĩ amarũmbũyagia na atĩ nĩ arĩmateithagia hĩndĩ ya magerio o mothe marĩa maracemania namo mahinda-inĩ maya.—Isa. 41:10, 13; 1 Pet. 5:7.

Teithia Athikĩrĩria Makenere Maũndũ Marĩa Ngai Areka. Rĩrĩa ũrenda gwĩkĩra ariũ a Ithe witũ ngoro, tĩtĩrithia maũndũ marĩa Jehova areka mahinda-inĩ maya. Kwaria maũndũ macio na njĩra ĩronania atĩ o nawe nĩ ũrakenio nĩmo nĩ gũgũtethia athikĩrĩria aku magĩe na muonere ta ũcio.

Wĩcirie ũrĩa Jehova atũteithagia kũhiũrania na mĩtangĩko ya ũtũũro. Atuonagĩrĩria njĩra ĩrĩa njega biũ ya kũrũmĩrĩra ũtũũro-inĩ. (Isa. 30:21) Agatũtarĩria gĩtũmi kĩa wĩki-naĩ, wagi wa kĩhooto, ũkĩa, mĩrimũ, na gĩkuũ na agatwĩra ũrĩa arĩnina maũndũ macio mothe. Agatũhe aarĩ na ariũ a Ithe witũ aingĩ matwendete. Agatũhe mweke wa goro mũno wa kwaria nake mahoya-inĩ. Agatũhe mweke wa gũtuĩka Aira ake. Agatũguũrĩria atĩ Kristo nĩ arĩkĩtie gũikarĩra gĩtĩ kĩa Ũthamaki kũrĩa igũrũ na atĩ matukũ ma kũrigĩrĩria ma mũtabarĩre ũyũ marĩ hakuhĩ mũno gũthira.—Kũg. 12:1-12.

Makĩria ma irathimo icio, nĩ atũheete mĩcemanio ya kĩũngano, igomano, na irũrũngano. Ũngĩaria ũhoro wa maũndũ macio na njĩra ĩronania ngatho cia kuuma ngoro nĩ ũndũ wamo, nĩ ũgũteithia arĩa angĩ matikanahũthie kũũngana na aarĩ na ariũ a Ithe witũ.—Ahib. 10:23-25.

Maũndũ monetwo ma kuonania atĩ Jehova nĩ ararathima kĩyo gitũ wĩra-inĩ wa kũhunjia o namo nĩ kĩhumo gĩa gwĩkĩra andũ hinya. Hĩndĩ ya karine ya mbere rĩrĩa Paulo na Baranaba maathiaga Jerusalemu, nĩ maatũmire ‘ariũ a Ithe witũ othe makene mũno’ nĩ ũndũ wa kũmaganĩra ũrĩa andũ a ndũrĩrĩ maagarũrũkĩire Ngai. (Atũm. 15:3) O nawe no ũtũme ariũ a Ithe witũ magĩe na gĩkeno na njĩra ya kũmataarĩria maũndũ mega marĩa monetwo.

Makĩria ma ũguo, andũ nĩ mekagĩrũo ngoro rĩrĩa mateithio mone atĩ maũndũ marĩa marahingia nĩ ma bata. Magathĩrĩrie nĩ ũndũ wa itemi rĩao thĩinĩ wa ũtungata wa Gĩkristiano. Gathĩrĩria arĩa matahotaga kũhingia maũndũ maingĩ nĩ ũndũ wa ndwari kana ũkũrũ ĩndĩ no maronania ũkirĩrĩria marĩ na wĩhokeku. Maririkanie atĩ Jehova ndariganagĩrũo nĩ wendani ũrĩa manonania nĩ ũndũ wa rĩĩtwa rĩake. (Ahib. 6:10) Wĩtĩkio ũgereire magerio-inĩ nĩ kĩndũ kĩa goro mũno. (1 Pet. 1:6, 7) Ariũ a Ithe witũ nĩ mabataraga kũririkanio ũndũ ũcio.

Aria Kuuma Ngoro Ũhoro wa Kĩĩrĩgĩrĩro Kĩrĩa Kĩrĩ Mbere. Ciĩranĩro cia Bibilia ciĩgiĩ maũndũ marĩa maroka nĩ kĩhumo kĩnene mũno gĩa gwĩkĩra hinya andũ arĩa mendete Ngai. No kũhoteke aingĩ thĩinĩ wa athikĩrĩria aku nĩ maiguĩte maũndũ macio maita maingĩ. No ũngĩarĩrĩria ciĩranĩro icio na njĩra ĩronania ũrĩa irĩ cia bata, no ũtũme athikĩrĩria mahũre mbica wega, magĩe na ũũma biũ atĩ nĩ ikaahinga, na ngoro ciao igĩe na ngatho mũno harĩ Jehova. Kũhũthĩra maũndũ marĩa wĩrutĩte thĩinĩ wa Cukuru ya Ũtungata wa Gĩtheokrasi no gũgũteithie gwĩka ũguo.

Jehova we mwene nĩwe kĩhumo kĩrĩa kĩnene gĩa gwĩkĩra ngoro na kũhe andũ ake hinya. O na kũrĩ ũguo, no ũnyitanĩre nake harĩ gwĩkĩra andũ ngoro na kũmomĩrĩria. Ũkĩarĩria kĩũngano, hũthĩra biũ mweke ũcio gwĩka ũguo.