GĨCUNJĨ GĨA 16
‘Ĩkaga Maũndũ ma Kĩhooto’ Ũgĩtwarana na Ngai
1-3. (a) Twagĩrĩirũo gũcokeria Jehova ngatho nĩkĩ? (b) Jehova endaga twĩke atĩa?
TA HŨŨRA mbica ũrĩ thĩinĩ wa meri ĩrarikĩra. O rĩrĩ wona ta hatarĩ na mwĩhoko, hagoka mũndũ agakũhonokia. Ũgakena mũno akũhonokia na agakwĩra: “Rĩu ndũrĩ ũgwati-inĩ”! Githĩ to ũcokerie mũndũ ũcio ngatho mũno? No ũigue ta ũngĩhũthĩra ũtũũro waku wothe gwĩka wendi wa mũndũ ũcio.
2 No tũhũthĩre ngerekano ĩyo gũtaarĩria ũndũ ũrĩa Jehova atwĩkĩire. Hatarĩ nganja nĩ twagĩrĩirũo kũmũcokeria ngatho. Nĩ aheanĩte ũkũũri, ũrĩa ũtũhotithĩtie gũkũũrũo kuuma harĩ mehia na gĩkuũ. Nĩ tũiguaga tũrĩ na ũgitĩri nĩ kũmenya atĩ tũngĩtĩkia igongona rĩu rĩa goro, nĩ tũrĩohagĩrũo mehia maitũ, na nĩ tũkoona muoyo wa tene na tene. (1 Johana 1:7; 4:9) O ta ũrĩa Gĩcunjĩ gĩa 14 kĩonanĩtie, njĩra ĩrĩa nene Jehova onanĩtie wendo na kĩhooto nayo nĩ kũheana ũkũũri. Ũndũ ũcio wagĩrĩirũo gũtũhutia atĩa?
3 Harĩ bata tũthuthurie maũndũ marĩa Mũhonokia witũ endaga twĩke. Jehova ooigire ũũ kũgerera mũnabii Mika: “Nĩ akwĩrĩte ũndũ ũrĩa mwega, wee mũndũ ũyũ. Na hihi nĩ atĩa Jehova endaga kuuma harĩ wee? Tiga o wĩkage maũndũ ma kĩhooto, wendage wĩhokeku, na ũtwaranage na Ngai waku ũrĩ na wĩnyihia!” (Mika 6:8) Ta rora wone atĩ ũndũ ũmwe Jehova endaga kuuma kũrĩ ithuĩ nĩ ‘gwĩka maũndũ ma kĩhooto.ʼ Tũngĩka ũguo atĩa?
Ũrĩa Tũngĩthingata “Ũthingu wa Ma”
4. Tũmenyaga atĩa atĩ Jehova nĩ erĩgagĩrĩra tũrũmĩrĩre ithimi ciake cia ũthingu?
4 Jehova erĩgagĩrĩra tũrũmagĩrĩre ithimi ciake cia wega na ũũru. Rĩrĩa tweka ũguo, tũkoragwo tũgĩthingata kĩhooto na ũthingu, tondũ ithimi ciake nĩ cia kĩhooto na ũthingu. Rĩandĩko rĩa Isaia 1:17 riugaga ũũ: “Mwĩrutei gwĩka maũndũ mega, caragiai kĩhooto.” Kiugo kĩa Ngai ningĩ gĩtwĩraga ‘tũcarie ũthingu.’ (Zefania 2:3) Na nĩ gĩtwĩraga ‘twĩhumbe ũmũndũ mwerũ ũrĩa wombirũo kũringana na wendi wa Ngai, na ũthingu wa ma.’ (Aefeso 4:24) Ũthingu wa ma nĩ wĩthemaga maũndũ ma ũhinya, maũndũ matarĩ matheru, na ma ũũra thoni, tondũ nĩ mathũkagia maũndũ marĩa matheru.—Thaburi 11:5; Aefeso 5:3-5.
5, 6. (a) Nĩkĩ ti mũrigo harĩ ithuĩ kũrũmĩrĩra ithimi cia Jehova? (b) Bibilia yonanagia atĩa atĩ gũthingata ũthingu nĩ ũndũ wagĩrĩirũo gũthiĩ na mbere?
5 Hihi kũrũmĩrĩra ithimi cia Jehova cia ũthingu nĩ mũrigo harĩ ithuĩ? Aca. Mũndũ wendete Jehova ndonaga mawatho make marĩ maritũ. Tondũ nĩ twendete Ngai witũ na ngumo ciake, twendaga gũtũũra na njĩra ĩkũmũkenia. (1 Johana 5:3) Ririkana atĩ Jehova nĩ “endete ciĩko cia ũthingu.” (Thaburi 11:7) Nĩguo twĩgerekanie na kĩhooto kĩa Ngai kana ũthingu wake, no mũhaka twende maũndũ marĩa endete na tũthũũre marĩa athũire.—Thaburi 97:10.
6 Ti ũndũ mũhũthũ harĩ andũ matarĩ akinyanĩru gũthingata ũthingu. No mũhaka twĩyaũre ũmũndũ ũrĩa wa tene na mĩtugo yaguo mĩũru tũcoke twĩhumbe ũrĩa mwerũ. Bibilia yugaga atĩ ũmũndũ ũrĩa mwerũ ‘ũtuagwo mwerũ’ kũgerera ũmenyo wa ma. (Akolosai 3:9, 10) Ciugo ‘ũtuagwo mwerũ’ cionanagia atĩ kwĩhumba ũmũndũ mwerũ nĩ ũndũ wa gũthiĩ na mbere, na kũbataraga kĩyo kĩnene. O na tũngĩgeria atĩa gwĩka wega, rĩmwe na rĩmwe kwaga gũkinyanĩra gwitũ nĩ gũtũmaga twĩcirie, twarie, kana twĩke ũrĩa gũtagĩrĩire.—Aroma 7:14-20; Jakubu 3:2.
7. Twagĩrĩirũo kuona atĩa mĩhĩnga ĩrĩa tũcemanagia nayo tũkĩĩrutanĩria gũthingata ũthingu?
7 Twagĩrĩirũo kuona atĩa mĩhĩnga ĩrĩa tũcemanagia nayo tũkĩĩrutanĩria gũthingata ũthingu? Hatarĩ nganja, tũtingĩenda kũhũthia ũritũ wa mehia. No ningĩ tũtiagĩrĩirũo gũkua ngoro, tuone ta tũtangĩagĩrĩra gũtungatĩra Jehova nĩ ũndũ wa mawathe maitũ. Ngai witũ mũtugi nĩ aigĩte mĩbango ya gũteithia arĩa merirĩte kuuma ngoro gwĩtĩkĩrĩka nĩwe rĩngĩ. Ta wĩcirie ciugo ici cia gwĩkĩra ngoro cia mũtũmwo Johana: “Ndĩramwandĩkĩra maũndũ maya nĩgetha mũtikehie.” Aacokire akiuga ũũ: “No rĩrĩ, mũndũ angĩhia [nĩ ũndũ wa kwaga gũkinyanĩra kũrĩa twagaire], tũrĩ na mũteithia ũrĩ hamwe na Ithe witũ, nĩwe Jesu Kristo.” (1 Johana 2:1) Jehova nĩ aheanĩte ũkũũri kũgerera Jesu nĩguo tũhote kũmũtungatĩra o na tũrĩ ehia. Na githĩ ũndũ ũcio ndũtũmaga twende gwĩka ũrĩa wothe tũngĩhota nĩguo tũkenie Jehova?
Ũhoro Ũrĩa Mwega na Kĩhooto kĩa Ngai
8, 9. Wĩra wa kũhunjia ũhoro ũrĩa mwega wonanagia atĩa kĩhooto kĩa Jehova?
8 No twĩke maũndũ ma kĩhooto, ũguo nĩ kuuga twĩgerekanie na kĩhooto kĩa Ngai na njĩra ya kũhunjia na kĩyo ũhoro ũrĩa mwega wa Ũthamaki wa Ngai. Kĩhooto kĩa Jehova kĩhutanĩtie atĩa na ũhoro ũrĩa mwega?
9 Jehova ndakaaniina mũtabarĩre ũyũ mũũru atambĩte kũhe andũ mũkaana. Jesu ooigire ũũ akĩheana ũrathi wĩgiĩ ũrĩa gũgekĩka matukũ-inĩ ma kũrigĩrĩria: “Ũhoro ũrĩa mwega no mũhaka ũkaamba kũhunjio kũrĩ ndũrĩrĩ ciothe.” (Mariko 13:10; Mathayo 24:3) Kiugo “ũkaamba” kĩhũthĩrĩtwo kuonania atĩ nĩ kũrĩ maũndũ mangĩ mageekĩka thutha wa wĩra wa kũhunjia. Ũmwe wa maũndũ macio nĩ thĩna mũnene ũrĩa warathĩtwo, rĩrĩa andũ aganu makaaniinwo nĩguo kũgĩe na thĩ njerũ ĩrĩ na ũthingu. (Mathayo 24:14, 21, 22) Kwoguo, gũtirĩ mũndũ ũngiuga atĩ Jehova nĩ aimĩte andũ arĩa aganu kĩhooto. Kũgerera mũkaana ũrĩa athanĩte ũheanwo, nĩ kũmahe aramahe mweke mwega wa kũgarũrĩra mĩthiĩre yao nĩgetha matikaananiinwo.—Jona 3:1-10.
10, 11. Tuonanagia atĩa kĩhooto ta kĩa Ngai rĩrĩa tũrahunjia ũhoro ũrĩa mwega?
10 Tuonanagia atĩa kĩhooto ta kĩa Ngai rĩrĩa tũrahunjia ũhoro ũrĩa mwega? Wa mbere, nĩ twagĩrĩirũo gwĩka ũrĩa wothe tũngĩhota gũteithia arĩa angĩ gũkaahonoka. Ta wĩcirie o rĩngĩ ũhoro wa ngerekano ĩrĩa ĩgiĩ kũhonokio kuuma meri-inĩ ĩrarikĩra. Thutha wa kũhonokio, hatarĩ nganja no wende gũteithia arĩa matarĩ marahota kuuma maĩ-inĩ. O na ithuĩ nĩ twagĩrĩirũo kwĩrutanĩria gũteithia arĩa marĩ ũgwati-inĩ wa kũũrũo nĩ mĩoyo yao. Nĩ ma, ti andũ aingĩ mathikagĩrĩria ndũmĩrĩri itũ. No tondũ Jehova no akirĩrĩirie-rĩ, o na ithuĩ nĩ twagĩrĩirũo kũmateithia “merire” nĩguo makaahonokio.—2 Petero 3:9.
11 Rĩrĩa twahunjĩria andũ othe ũhoro ũrĩa mwega, tuonanagia kĩhooto na njĩra ĩngĩ ya bata: Kwaga mũthutũkanio. Ririkana atĩ “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.” (Atũmwo 10:34, 35) Nĩguo twĩgerekanie Nake harĩ kuonania kĩhooto, nĩ tũrabatara gwĩthema gũtuagĩra arĩa angĩ. Tũbatiĩ kũmahunjĩria ũhoro ũrĩa mwega tũtekũrora rũrĩrĩ rwao, ũrĩa monagwo nĩ andũ, kana ũhoti wao wa kĩĩmbeca. Na njĩra ĩyo, nĩ tũrĩheaga andũ othe arĩa megũtũthikĩrĩria mweke wa kũigua ũhoro ũrĩa mwega na kuoya ikinya.—Aroma 10:11-13.
Ũrĩa Tũrũmbũyanagia na Andũ Arĩa Angĩ
12, 13. (a) Twagĩrĩirũo gwĩthema gũtuagĩra arĩa angĩ nĩkĩ? (b) Jesu eendaga kuuga atĩa rĩrĩa ooigire “tigai gũtuagĩra andũ arĩa angĩ” na “mũtige kũrutaga arĩa angĩ mahĩtia”? (Rora nginya kohoro ka magũrũ-inĩ.)
12 Ningĩ no tuonanie kĩhooto tũngĩrũmbũyania na andũ arĩa angĩ o ta ũrĩa Jehova arũmbũyanagia na ithuĩ. Nĩ ũndũ mũhũthũ mũno gũtuĩra arĩa angĩ na njĩra ya gũtindanĩrĩra na mawathe mao, na gwĩkĩrĩra nganja mĩoroto yao. No gũtirĩ mũndũ o na ũmwe witũ ũngĩenda Jehova aroranie mawathe make na mĩoroto yake na njĩra ĩtarĩ na tha. Ũguo tiguo Jehova ekaga. Mwandĩki wa Thaburi ooigire ũũ: “Atĩrĩrĩ Ja, korũo mahĩtia nĩmo ũroraga-rĩ, nũũ ũngĩkĩhota kũrũgama, wee Jehova?” (Thaburi 130:3) Githĩ tũtiagĩrĩirũo gũcokia ngatho tondũ Ngai witũ mwendi kĩhooto na mũigua tha ndatindanagĩrĩra mũno na mawathe maitũ? (Thaburi 103:8-10) Nĩ ũndũ ũcio-rĩ, twagĩrĩirũo kũrũmbũyania na arĩa angĩ atĩa?
13 Twataũkĩrũo atĩ Ngai onanagia kĩhooto arĩ na tha, tũtirĩhiũhaga gũtuĩra andũ maũndũ-inĩ matatũkoniĩ kana matarĩ ma bata. Jesu aaheanire mũkaana ũyũ Mahunjio-inĩ make ma Kĩrĩma-inĩ: “Tigai gũtuagĩra andũ arĩa angĩ nĩguo mũtikanatuĩrũo.” (Mathayo 7:1) Ibuku rĩa Luka rĩonanagia atĩ Jesu oongereire akiuga: “[Tigai] kũrutaga arĩa angĩ mahĩtia na gũtirĩ hĩndĩ mũkaarutwo mahĩtia.”a (Luka 6:37) Kũringana na ciugo icio, Jesu nĩ oĩ atĩ andũ matarĩ akinyanĩru nĩ marĩ mwerekera wa gũtuanĩra. Mũndũ wothe wathikagĩrĩria Jesu na aarĩ na mũtugo ũcio wa gũtuĩra arĩa angĩ aagĩrĩirũo kũũtiga.
Tuonanagia kĩhooto ta kĩa Ngai rĩrĩa twahunjĩria arĩa angĩ ũhoro ũrĩa mwega tũtarĩ na mũthutũkanio
14. Twagĩrĩirũo ‘gũtiga gũtuagĩra’ arĩa angĩ nĩkĩ?
14 Twagĩrĩirũo gũtiga “gũtuagĩra” arĩa angĩ nĩkĩ? Gĩtũmi kĩmwe nĩ tondũ tũtirĩ na kĩhooto gĩa gwĩka ũguo. Mũtũmwo Jakubu atũririkanĩtie ũũ: “Mũheani Watho na Mũtuanĩri Ciira no ũmwe tu”—Jehova. Nĩkĩo acokete akoria ũũ: “Ũkĩrĩ ũ nĩguo ũtuagĩre mũndũ ũrĩa ũngĩ?” (Jakubu 4:12; Aroma 14:1-4) Makĩria ma ũguo, kwaga gũkinyanĩra gwitũ no gũtũme tũtuĩre andũ na njĩra ĩrĩa ĩtagĩrĩire. Mĩoroto mĩũru na mĩerekera ta gũthutũkania, kuona ta tũtekĩtwo ũndũ wa kĩhooto, ũiru, na kwĩyona tũrĩ athingu, no ĩthũkie mawoni maitũ kwerekera andũ arĩa angĩ. Harĩ maũndũ mangĩ tũtakoragwo na ũhoti wa gwĩka, na gwĩciria ũhoro wamo kwagĩrĩirũo gũtũma twĩtheme gũcarĩria arĩa angĩ mahĩtia. Tũtingĩhota gũthoma ngoro cia andũ kana kũmenya maũndũ mothe marĩa mangĩkorũo makĩgerera. Nĩ ũndũ ũcio-rĩ, ithuĩ tũkĩrĩ a, atĩ nĩguo twĩkĩrĩre nganja mĩoroto ya Akristiano arĩa angĩ kana kĩyo kĩao magĩtungatĩra Ngai? Githĩ ti wega makĩria twĩgerekanie na Jehova harĩ gũcaria maũndũ mega thĩinĩ wa aarĩ na ariũ a Ithe witũ handũ ha gũtindĩrĩra mawathe mao!
15. Nĩ ciugo na ciĩko irĩkũ itetĩkĩrĩtio gatagatĩ-inĩ ka athathaiya a Ngai, na nĩkĩ?
15 Ĩ nao andũ aitũ a famĩlĩ? Ũndũ wa kĩeha nĩ atĩ, ũmũthĩ maũndũ maingĩ moru matarĩ ma kĩhooto mekagwo mĩciĩ-inĩ, o ĩrĩa yagĩrĩirũo gũkorũo ĩrĩ kũndũ kũrĩ na thayũ. Kaingĩ nĩ tũiguaga ũhoro wa athuri, atumia, kana aciari arĩa maikaraga makĩhũũraga andũ ao a famĩlĩ kana kũmaruma. No athathaiya a Ngai matiĩtĩkĩrĩtio kũrumana, kana gũcinũrana. (Aefeso 4:29, 31; 5:33; 6:4) Ũtaaro wa Jesu wĩgiĩ “[gũtiga] gũtuagĩra andũ arĩa angĩ” na “[gũtiga] kũrutaga arĩa angĩ mahĩtia” wagĩrĩirũo kũhũthĩrũo nginya tũrĩ mĩciĩ. Ririkana atĩ kuonania kĩhooto nĩ kũhutanĩtie na kũrũmbũyania na arĩa angĩ o ta ũrĩa Jehova arũmbũyanagia na ithuĩ. Ngai witũ ndatwĩkaga maũndũ matarĩ ma tha. Handũ ha ũguo, nĩ “arĩ wendo muororo mũno” kwerekera arĩa mamwendete. (Jakubu 5:11) Na githĩ ndakĩrĩ kĩonereria kĩega tũngĩgerekania nakĩo!
Athuri a Kĩũngano Matungataga “Kũringana na Kĩhooto”
16, 17. (a) Jehova erĩgagĩrĩra athuri a kĩũngano meke atĩa? (b) Nĩ ikinya rĩrĩkũ mũndũ wĩhĩtie agĩrĩire kuoerũo angĩaga kuonania kwĩrira kwa ma, na nĩkĩ?
16 Ithuothe nĩ twagĩrĩirũo kuonania kĩhooto, no athuri a kĩũngano magĩrĩirũo gwĩka ũguo na njĩra nene makĩria. Ciugo cia ũrathi iria ciaandĩkirũo nĩ Isaia ciugaga ũũ igũrũ rĩgiĩ “anene,” kana athuri a kĩũngano: “Na rĩrĩ, mũthamaki nĩ agaathamaka kũringana na ũthingu, na anene maathane kũringana na kĩhooto.” (Isaia 32:1) Kwoguo, Jehova erĩgagĩrĩra athuri a kĩũngano matungate na njĩra ya kĩhooto. Mangĩka ũguo atĩa?
17 Athuri acio agimaru kĩĩroho, nĩ moĩ atĩ kĩhooto nĩ kĩbataranagia nĩguo maige kĩũngano kĩrĩ gĩtheru. Rĩmwe na rĩmwe, athuri a kĩũngano nĩ mabataraga gũtua maciira megiĩ andũ mekĩte mehia maritũ. Magĩĩka ũguo, nĩ maririkanaga atĩ kĩhooto kĩa Ngai nĩ kĩbataranagia nĩguo monanie tha angĩkorũo nĩ kwagĩrĩire. Kwoguo, nĩ mageragia gũteithia ũrĩa wĩhĩtie erire. Ĩ hihi ũrĩa wĩhĩtie angĩaga kuonania atĩ nĩ erirĩte kuuma ngoro o na maageria kũmũteithia? Kiugo kĩa Jehova kĩonanagia atĩ nĩ ũndũ wa kĩhooto kuoya ikinya irũmu. Kiugaga: “Eheriai mũndũ ũcio mwaganu gatagatĩ-inĩ kanyu.” Ũguo nĩ kuuga eherio kĩũngano-inĩ. (1 Akorintho 5:11-13; 2 Johana 9-11) O na gũtuĩka athuri matikenaga kuoya ikinya rĩu, nĩ mamenyaga atĩ nĩ rĩa bata nĩguo kĩũngano gĩikare kĩrĩ gĩtheru kĩĩmĩtugo na kĩĩroho. No nĩ merĩgagĩrĩra atĩ mũthenya ũmwe ũcio wĩhĩtie nĩ arĩĩrira na acoke kĩũngano-inĩ.—Luka 15:17, 18.
18. Nĩ ũndũ ũrĩkũ athuri maririkanaga makĩhe andũ arĩa angĩ ũtaaro wa Kĩĩmaandĩko?
18 Kũhe mũndũ ũtaaro wa Maandĩko rĩrĩa kwabatarania nĩ njĩra ĩngĩ ya kuonania kĩhooto. Hatarĩ nganja, athuri a kĩũngano maticaragĩrĩria arĩa angĩ mahĩtia. Ningĩ matiethagĩrĩra mĩeke ya kũmahe ũtaaro. No thĩinĩ wa kĩũngano kwahota kũgĩa ‘mũndũ ũngĩthiĩ na njĩra ĩtagĩrĩire atekũmenya.’ Athuri a kĩũngano nĩ maririkanaga atĩ Jehova ndonanagia kĩhooto na njĩra ĩtarĩ ya tha. Kwoguo nĩ ‘mageragia kũmũrũnga marĩ na roho wa ũhooreri.’ (Agalatia 6:1) Nĩ ũndũ ũcio, athuri a kĩũngano nĩ methemaga kũgũthũkĩra ũcio ũhĩtĩtie kana kũhũthĩra ciugo ingĩmũtuurithia. Magĩrĩirũo kũmũtaara marĩ na wendo, tondũ gwĩka ũguo no kũmwĩkĩre ngoro. O na rĩrĩa marataara mũndũ ĩmwe kwa ĩmwe na kũmuonia cara-rũkũ moimĩrĩro moru ma mĩthiĩre yake, nĩ maririkanaga atĩ ũcio ũhĩtĩtie nĩ ngʼondu ya Jehova.b (Luka 15:7) Athuri mangĩhe mũndũ ũhĩtĩtie ũtaaro makĩenda kũmũteithia, na meke ũguo na njĩra ya wendo, nĩ ũndũ mũhũthũ agarũrĩre mĩthiĩre yake.
19. Nĩ matua marĩkũ athuri mabataraga gũtua, na mũthingi wa matua macio wagĩrĩire gũkorũo ũrĩ ũrĩkũ?
19 Kaingĩ athuri a kĩũngano nĩ mabataraga gũtua matua marahutia Akristiano arĩa angĩ. Kwa mũhaano, rĩmwe na rĩmwe nĩ macemanagia kwarĩrĩria kana thĩinĩ wa kĩũngano nĩ kũrĩ ariũ a Ithe witũ mangĩagĩrĩra gũtuwo athuri a kĩũngano kana ndungata cia kĩũngano. Athuri nĩ moĩ bata wa kwaga mũthutũkanio. Rĩrĩa maratua matua ta macio, marũmagĩrĩra ithimi iria Ngai aigĩte ciĩgiĩ arĩa mangĩagĩrĩra kwĩhokerũo mĩeke ta ĩyo, handũ ha kwĩhoka mawoni mao. Na njĩra ĩyo, makonania ‘matirĩ na kĩmenyano kana mũthutũkanio.’—1 Timotheo 5:21.
20, 21. (a) Athuri merutanagĩria gũtuĩka kĩ, na nĩkĩ? (b) Athuri mangĩka atĩa nĩguo mateithie “arĩa mathuthĩkĩte ngoro”?
20 Nĩ harĩ njĩra ingĩ athuri monanagia kĩhooto nacio. Thutha wa kũratha atĩ athuri nĩ mangĩgaatungata “kũringana na kĩhooto,” Isaia ooigire ũũ: “O ũmwe wao agaakoragwo atariĩ ta handũ ha kwĩhitha rũhuho, handũ ha kwĩgitia mbura ya kĩhuhũkanio, o ta tũrũũĩ twa maĩ bũrũri-inĩ ũtarĩ maĩ, o ta kĩĩruru kĩa ndũmba nene ya ihiga bũrũri-inĩ mũngʼaru.” (Isaia 32:1, 2) Nĩ ũndũ ũcio, athuri nĩ merutanagĩria kũũmĩrĩria na kũhooreria Akristiano arĩa angĩ.
21 Andũ aingĩ ũmũthĩ nĩ mabataraga kũũmĩrĩrio nĩ ũndũ wa mathĩna maingĩ marĩa matũmaga makue ngoro. Inyuĩ athuri a kĩũngano, nĩ atĩa mũngĩka nĩguo mũteithie “arĩa mathuthĩkĩte ngoro”? (1 Athesalonike 5:14) Mathikagĩrĩriei mũrĩ na ũcayanĩri. (Jakubu 1:19) No makorũo makĩenda kwĩra mũndũ mehokete mĩtangĩko ĩrĩa ĩrĩ ngoro-inĩ ciao. (Thimo 12:25) Mamenyithagiei atĩ nĩ mendetwo, na nĩ monagwo marĩ a bata nĩ Jehova o hamwe na aarĩ na ariũ a Ithe wao. (1 Petero 1:22; 5:6, 7) Makĩria ma ũguo, no mũhoe hamwe nao kana mũmahoere. No mekĩrũo ngoro mũno kũigua mũthuri akĩhoya mahoya ma kuuma ngoro nĩ ũndũ wao. (Jakubu 5:14, 15) Ngai witũ mwendi kĩhooto ndangĩaga kũrathima kĩyo kĩanyu gĩa gũteithia arĩa mathuthĩkĩte ngoro.
Athuri a kĩũngano monanagia kĩhooto ta kĩa Jehova rĩrĩa momĩrĩria arĩa makuĩte ngoro
22. Tũngĩĩgerekania atĩa na Jehova harĩ kuonania kĩhooto, na moimĩrĩro mangĩkorũo marĩ marĩkũ?
22 Hatarĩ nganja, rĩrĩa twegerekania na Jehova harĩ kuonania kĩhooto, nĩ tũmũkuhagĩrĩria makĩria. Rĩrĩa twarũmia ithimi ciake cia ũthingu, twahunjĩria arĩa angĩ ũhoro mwega wa kũhonokia mĩoyo yao, na twarora ngumo njega cia andũ handũ ha mawathe mao, tũkoragwo tũkĩonania kĩhooto ta kĩa Ngai. Inyuĩ athuri a kĩũngano, rĩrĩa mwaiga kĩũngano kĩrĩ gĩtheru, mwaheana ũtaaro wa Kĩĩmaandĩko, mwatua matua mũtarĩ na mũthutũkanio, na mwomĩrĩria arĩa makuĩte ngoro-rĩ, mũkoragwo mũkĩonania kĩhooto ta kĩa Ngai. No nginya Jehova akorũo nĩ akenaga mũno arĩ igũrũ kuona andũ ake makĩĩrutanĩria biũ ‘gwĩka maũndũ ma kĩhooto’ magĩtwarana nake!
a Bibilia imwe ciugaga “mũtigatuanagĩre” na “mũtikarutanage mahĩtia.” Ciugo ta icio ironania andũ matiagĩrĩirũo kwambĩrĩria gwĩka ũguo. No ciugo iria andĩki a Bibilia mahũthĩrĩte mĩhari-inĩ ĩyo cionanĩtie ũndũ ũrathiĩ na mbere. Kwoguo ciĩko icio nĩ ciathiaga na mbere no andũ nĩ maabatiĩ gũcitiga.
b Thĩinĩ wa 2 Timotheo 4:2, Bibilia yugaga atĩ rĩmwe na rĩmwe athuri nĩ mabataraga ‘kũrũnga andũ, kũmakaania, na kũmataara.’ Kiugo gĩa Kĩngiriki kĩrĩa gĩtaũrĩtwo ‘gũtaaraʼ (pa·ra·ka·leʹo) ningĩ no gĩtaũrũo “gwĩkĩra ngoro.” Kiugo gĩa Kĩngiriki pa·raʹkle·tos kĩrĩa gĩkonainie na kĩu, no kĩhũthĩrũo kuuga wakiri maũndũ-inĩ ma kĩĩwatho. Kwoguo, o na rĩrĩa athuri maraheana ũtaaro mũrũmu, muoroto wao wagĩrĩirũo gũkorũo ũrĩ gũteithia mũndũ ũcio gũkuhĩrĩria Jehova.