Maũndũ Maya Marekĩka Nĩkĩ?

JESU KRISTO oigire ũũ: “Ithirĩro rĩa mahinda maya” nĩgũgakorũo na mbaara, ngʼaragu, mĩrimũ ya mũthiro, na ithingithia.—Mathayo 24:1-8; Luka 21:10, 11.

Kuuma mwaka wa 1914 nĩgũkoretwo na mbaara gatagatĩ-inĩ ka ndũrĩrĩ na gatagatĩ-inĩ ka makabira. Kaingĩ haaro icio ciumanaga na atongoria a ndini kũingĩrĩra ũteti, na matukũ-inĩ maya nĩ ũndũ wa ũtoi ũrĩa ũingĩhĩte.

Ona gũtuĩka ũrĩmi nĩũthiĩte na mbere, andũ aingĩ mũno thĩ yothe mationaga irio cia kũigana. O mwaka andũ aingĩ nĩmakuaga nĩ ũndũ wa ngʼaragu.

Kĩmenyithia kĩngĩ Jesu agwetire nĩ mĩrimũ mĩũru ĩrĩa ĩrehaga mũthiro. Thutha wa Mbaara ya Mbere ya Thĩ, kĩhuti kĩnene nĩkĩoragire andũ milioni 21. Ngũrani na mĩrimũ ĩrĩa yakoragwo o icigo-inĩ imwe tene, kĩhuti kĩu gĩatheremire kũndũ guothe o nginya tũcigĩrĩra-inĩ twa iria. Ũmũthĩ mũkingo nĩũgwatĩte andũ aingĩ thĩ yothe, na mĩrimũ ĩngĩ ta TB na malaria no ĩrathumbũra andũ thĩini wa mabũrũri marĩa marakũra.

Gũtuĩkaga atĩ o mwaka nĩ gũkoragwo na ithingithia nene o na nini ngiri nyingĩ. Ona akorũo kũrĩ na macini cia kĩĩrĩu cia gũthima ithingithia, andũ aingĩ nĩmakuaga hĩndĩ ĩrĩa kwagĩa na ithingithia kũrĩa gũkoragũo na andũ aingĩ.

Bibilia ona ningĩ nĩ yarathĩte ũũ: “No rĩrĩ, ũndũ ũyũ ũmenye wega, atĩ matukũ marĩa ma kũrigĩrĩria nĩgũkagĩa mahinda ma ũgwati. Tondũ andũ nĩmagatuĩka eendi, na endi mbia, na egani, na egathi, na arumani, andũ matangĩigua aciari ao, na matarĩ ngatho, na matarĩ atheru; ningĩ makorũo maagĩte wendani ũrĩa wa ndũire, andũ matangĩteithũrĩkana, na magacambanagia, na arĩa matoĩ kwĩgirĩrĩria, andũ eĩ, na arĩa matenda maũndũ mega, na arĩa makunyanagĩra andũ arĩa angĩ, na arũũgĩrĩri, na eĩkĩrĩri, o na arĩa mendaga gwĩkenia gũkĩra ũrĩa mendaga Ngai; nĩo metuaga ta meamũrĩire Ngai, no kũrega nĩmaregaga hinya ũrĩa uumaga ũhoro-inĩ ũcio: acio nao ũmathemage.”—2 Timotheo 3:1-5.

We ndũkuona atĩ twĩ “mahinda ma ũgwati”?

Nĩwonete atĩ andũ, mũno makĩria, nĩ eendi, endi mbia, na etĩi?

Nũũ ũngĩkaana atĩ thĩ ndĩiyũrĩte andũ mateciragia ũhoro wa andũ arĩa angĩ, na matarĩ ngatho, matangĩteithũrĩkana, mataiguithanagia, ona matarĩ atheru?

Wee nĩũĩ atĩ kwaga gwathĩkĩra aciari na kwaga wendo nĩkũongererekete mũno thĩ yothe?

Hatarĩ nganja nĩ wonete atĩ thĩ nĩ ĩiyũirũo nĩ andũ mendete gwĩkenia no matiendete maũndũ mega. Ũguo nĩguo Bibilia ĩtarĩirie ũrĩa andũ magakorũo mahaana “matukũ marĩa ma kũrigĩrĩria.”

Nĩ kũrendekana kĩhooto kĩngĩ gĩa kuonania mahinda marĩa tũratũũra? Jesu ningĩ nĩarathire atĩ mahinda o macio ũhoro mwega wa Ũthamaki wa Ngai nĩũkahunjio thĩ yothe. (Mathayo 24:14) Ũndũ ũyũ nĩũrekĩka?

Ngathĩti ya gũtaarĩria Bibilia ĩĩtagwo Mnara wa Mlinzi ĩrĩa yanagĩrĩra ũhoro mwega wa Ũthamaki wa Jehova, ĩcabagwo na thiomi nyingĩ gũkĩra ngathĩti iria ingĩ ciothe.

Aira a Jehova mahũthagĩra makĩria ma mathaa bilioni ĩmwe o mwaka makĩhunjĩria andũ arĩa angĩ ũhoro wa Ũthamaki wa Ngai.

Mabuku ma gũtaarĩria Bibilia rĩu nĩmacabagwo nĩo na thiomi hakuhĩ 400, ingĩ ciacio ciaragio nĩ andũ matarĩ aingĩ kuuma icigo cia kũraihu. Aira a Jehova nĩmakinyĩirie ndũrĩrĩ ciothe ũhoro-ũyũ-mwega; ningĩ nĩmahunjĩtie icigĩrĩra-inĩ ona icigo ingĩ itoĩkaine mũno. Kũndũ kũingĩ nĩmakoragwo na mũtaratara wa kũrutana Bibilia.

Ũũma nĩ atĩ, ũhoro mwega wa Ũthamaki wa Ngai nĩũrahunjio thĩ yothe, ti andũ magarũrũke, no nĩ getha ũtuĩke ũira. Andũ kũndũ guothe nĩmaraheo mweke wa kuonania kana nĩmerũmbũyagia nũũ wombire igũrũ na thĩ, na gũtĩĩa watho wake na kwenda andũ arĩa angĩ.—Luka 10:25-27; Kũguũrĩrio 4:11.

Ũthamaki wa Ngai wĩ hakuhĩ kweheria andũ arĩa othe oru na kwerũhia thĩ ĩtuĩke paradiso.—Luka 23:43, NW.

[Gathandũkũ karatathi ka 6]

Nĩ Matukũ ma Mũthia wa Kĩĩ?

Ti matukũ ma mũthia wa andũ othe. Nĩ gũkorũo arĩa mekaga wendi wa Ngai mena kĩĩrĩgĩrĩro gĩa gũgatũũra tene na tene ta ũrĩa Bibilia ĩranĩire.—Johana 3:16, 36; 1 Johana 2:17.

Ti matukũ ma mũthia wa thĩ. Kiugo kĩa Ngai kĩranĩire atĩ thĩ nĩ ĩgatũũrũo tene na tene.—Thaburi 37:29; 104:5; Isaia 45:18.

No nĩ matukũ ma mũthia wa mũtabarĩre ũyũ mũthũku, ũtarĩ na wendo na wa arĩa megwatithanĩtie naguo.—Thimo 2:21, 22.

[Mbica/Gathandũkũ karatathi ka 7]

Bibilia-rĩ, Nĩ Kiugo Kĩa Ngai Nama?

Anabii a Bibilia nĩmaandĩkire ũũ maita maingĩ: “Jehova ekuuga ũũ.” (Jeremia 2:2; Isaia 43:14) Ona Jesu Kristo, Mũrũ wa Ngai, nĩekĩrĩire hinya atĩ ‘ndoigaga eĩrĩte we mwene.’ (Johana 14:10) Bibilia yo nyene yugaga wega ũũ: “Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki.”—2 Timotheo 3:16.

Kũringana na Kĩama kĩa Ũrũmwe wa Ciama cia Bibilia, Bibilia ĩcabĩtwo na thiomi makĩria ma 2,200. Gũtirĩ ibuku rĩngĩ o na rĩrĩkũ rĩcabĩtwo na thiomi nyingĩ ũguo, na kobĩ makĩria ma bilioni inya irĩ moko-inĩ ma andũ. Ũguo githĩ ti guo ũngĩtanya harĩ ndũmĩrĩri ya Ngai kũrĩ andũ othe?

Ũngĩenda kũmenya makĩria atĩ Bibilia nĩ kiugo kĩa Ngai, thoma ibuku rĩĩtagwo Biblia—Neno la Mungu au la Binadamu?, rĩrĩa rĩcabĩtwo nĩ Aira a Jehova.

Ũngĩthoma Bibilia wĩtĩkĩtie nama atĩ nĩ Kiugo kĩa Ngai, nĩũkũgunĩka mũno.

[Mbica karatathi ka 8]

Ũthamaki wa Ngai Nĩ Kĩĩ?

Nĩ thirikari ya mwanya ĩrĩ igũrũ ya Ngai ũrĩa wa ma, Jehova, Mũũmbi wa igũrũ na thĩ.—Jeremia 10:10, 12.

Bibilia yugaga atĩ Jesu Kristo nĩwe ũheetwo wathani ũcio nĩ Ngai. (Kũguũrĩrio 11:15) Rĩrĩa Jesu arĩ gũkũ thĩ nĩonanirie atĩ aarĩ na hinya mũingĩ kuuma kũrĩ Ngai. Hinya ũcio nĩwamũhotithagia kũhoreria makũmbĩ ma iria, na kũhonia mĩrimũ yothe, o na nginya kũriũkia akuũ. (Mathayo 9:2-8; Mariko 4:37-41; Johana 11:11-44) Ũrathi wa Bibilia woigĩte atĩ Ngai nĩakamũhee “wathani, na riri, o na ũthamaki, nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre.” (Danieli 7:13, 14) Thirikari ĩyo ĩĩtagwo Ũthamaki wa igũrũ, tondũ Jesu Kristo aathanaga kuuma igũrũ.

[Mbica karatathi ka 7]

Ũhoro mwega nĩ ũrahunjio thĩ yothe