Mikaeli, Mũraika Ũrĩa Mũnene Nũũ?

MŨRAIKA ũrĩa wĩtagwo Mikaeli ndagwetetwo maita maingĩ thĩinĩ wa Bibilia. No rĩrĩa agwetwo-rĩ, akoragwo agĩka ũndũ mũna. Thĩinĩ wa ibuku rĩa Danieli-rĩ, Mikaeli onanĩtio akĩrũa na ndaimono; thĩinĩ wa marũa ma Judasi-rĩ, agĩkararania na Shaitani; na thĩinĩ wa Kũguũrĩrio, akĩrũa na Mũcukani na ndaimono ciake. Tondũ wa gũtetera waathani wa Jehova na kũrũa na thũ cia Ngai-rĩ, Mikaeli ekaga kũringana na rĩĩtwa rĩake rĩrĩa riugĩte ũũ: “Nũũ Ũtariĩ Ta Ngai? ” No Mikaeli nũũ?

Rĩngĩ na rĩngĩ andũ nĩmakoragwo na marĩĩtwa maingĩ. Kwa ngerekano-rĩ, mũthuri wa tene Jakubu no etagwo Isiraeli, nake mũtũmwo Petero no etagwo Simoni. (Kĩambĩrĩria 49:1, 2; Mathayo 10:2) Na njĩra o ta ĩo-rĩ, Bibilia yonanagia atĩ Mikaeli nĩ rĩĩtwa rĩngĩ rĩa Jesu Kristo, ataanoka gũkũ thĩ na thutha wa gũcoka matu-inĩ. Reke tũtuĩrie itũmi cia Maandĩko iria itũmaga tuuge ũguo.

Mũraika Ũrĩa Mũnene. Kiugo kĩa Ngai gĩĩtaga Mikaeli “mũraika ũrĩa mũnene.” (Judasi 9) Ta rora wone atĩ Mikaeli etĩtwo mũraika ũrĩa mũnene. Ũguo nĩ kuuga atĩ kũrĩ mũraika o ũmwe tu ta ũcio. Rĩĩtwa “mũraika ũrĩa mũnene” rĩhũthĩrĩtwo thĩinĩ wa Bibilia kuonania o mũndũ ũmwe tu, ti aingĩ. Ningĩ-rĩ, Jesu akuruhanĩtio na wĩra wa mũraika ũrĩa mũnene. Ha ũhoro wĩgiĩ Mwathani Jesu Kristo thutha wa kũriũka-rĩ, 1 Athesalonike 4:16 yugaga ũũ: “Mwathani we mwene nĩagaikũrũka oime Igũrũ agĩĩtanaga na kayũ, o na mũgambo wa mũraika ũrĩa mũnene.” Nĩ ũndũ ũcio mũgambo wa Jesu ũtaarĩirio atĩ nĩ wa mũraika ũrĩa mũnene. Kwoguo rĩandĩko rĩu rĩronania atĩ Jesu we mwene nĩwe Mikaeli, mũraika ũrĩa mũnene.

Mũtongoria wa Mbũtũ. Bibilia yugaga atĩ “Mikaeli na araika ake magĩthiĩ kũrũa na ndamathia ĩo . . . na araika ayo.” (Kũguũrĩrio 12:7) Kwoguo Mikaeli nĩwe Mũtongoria wa mbũtũ ya araika ehokeku. Ibuku rĩa Kũguũrĩrio ningĩ rĩtaaragĩria Jesu arĩ Mũtongoria wa mbũtũ ya araika ehokeku. (Kũguũrĩrio 19:14-16) Nake mũtũmwo Paulo agwetete wega “Mwathani witũ Jesu” na “araika ake arĩa me na ũhoti.” (2 Athesalonike 1:7) Kwoguo Bibilia yaragia ũhoro wĩgiĩ Mikaeli na “araika ake” na Jesu na “araika ake.” (Mathayo 13:41; 16:27; 24:31; 1 Petero 3:22) Tondũ hatirĩ handũ Kiugo kĩa Ngai kĩonanagia atĩ kũrĩ mbũtũ igĩrĩ cia araika ehokeku matu-inĩ, ĩmwe ĩgĩtongorio nĩ Mikaeli na ĩrĩa ĩngĩ ĩgĩtongorio nĩ Jesu-rĩ, hatarĩ nganja Mikaeli ti ũngĩ tiga Jesu Kristo arĩ wĩra-inĩ wake kũu matu-inĩ.a