GĨCUNJĨ KĨA 37
Hihi nĩ Njagĩrĩirũo Kũbatithio?
Ĩkĩra rũũri rwa kuonania nĩ ma kana ti ma harĩ sentensi ici irũmĩrĩire:
No mũhaka Akristiano mabatithio.
□ Nĩ ma
□ Ti ma
Gĩtũmi kĩnene gĩa kũbatithio nĩ gũkũgitĩra ndũkagwe mehia-inĩ.
□ Nĩ ma
□ Ti ma
Kũbatithio nĩ gũgaatũma ũhonokio.
□ Nĩ ma
□ Ti ma
Angĩkorũo ndũrĩ mũbatithie, Ngai ndangĩkũũria nĩ ũndũ wa maũndũ marĩa wĩkaga.
□ Nĩ ma
□ Ti ma
Angĩkorũo arata aku nĩ mabatithĩtio, nĩ kuuga o nawe nĩ wagĩrĩire kũbatithio.
□ Nĩ ma
□ Ti ma
ANGĨKORŨO nĩ wathĩkagĩra ithimi cia Ngai, ũgakũria ũrata wa hakuhĩ nake, na nĩ wĩraga andũ arĩa angĩ ũhoro wa wĩtĩkio waku, no ũkorũo ũrĩ ũndũ wa bata gwĩciria ũhoro wa kũbatithio. No ũngĩmenya atĩa kana nĩ wĩhaarĩirie kuoya ikinya rĩu? Nĩguo tuone macokio ma kĩũria kĩu, reke twarĩrĩrie ciũria icio ciũrĩtio hau igũrũ.
● No mũhaka Akristiano mabatithio.
Nĩ ma. Jesu aathire arũmĩrĩri ake mabatithio. (Mathayo 28:19, 20) O nake we mwene nĩ aabatithirio. Nĩguo ũrũmĩrĩre Kristo, nĩ wagĩrĩire kũbatithio thutha wa kũgimara ũndũ ũngĩhota gwĩtuĩra itua rĩu, na ũkorũo na wendi wa kuuma ngoro wa gwĩka ũguo.
● Gĩtũmi kĩnene gĩa kũbatithio nĩ gũkũgitĩra ndũkagwe mehia-inĩ.
Ti ma. Kũbatithio nĩ rũũri rwa kuonania atĩ nĩ wĩyamũrĩire Jehova. Kwĩyamũrĩra Jehova ti kuuga atĩ nĩ waingĩra watho-inĩ wa gũkũhinyĩrĩria wa gũkũgirĩrĩria gwĩkaga maũndũ marĩa ũngĩenda wĩhithĩte. No wĩyamũragĩra Jehova tondũ nĩ ũrenda gũtũũra kũringana na ithimi ciake.
● Kũbatithio nĩ gũgaatũma ũhonokio.
Nĩ ma. Bibilia yugaga atĩ kũbatithio nĩ ikinya rĩa bata mũno nĩguo tũkaahonokio. (1 Petero 3:21) O na kũrĩ ũguo, kũbatithio gũtihaanaine na kũgata marũa ma insurance marĩa magitagĩra mũndũ rĩrĩa agĩa na ũgwati. Mũndũ abatithagio tondũ nĩ endete Jehova na ngoro yake yothe na nĩ arenda kũmũtungatĩra ũtũũro-inĩ wake wothe.—Mariko 12:29, 30.
● Angĩkorũo ndũrĩ mũbatithie, Ngai ndangĩkũũria nĩ ũndũ wa maũndũ marĩa wĩkaga.
Ti ma. Jakubu 4:17 yugaga atĩ, “angĩkorũo mũndũ nĩ oĩ gwĩka ũndũ ũrĩa wagĩrĩire no ndawĩkaga, ũndũ ũcio nĩ mehia harĩ we,” gũtekũmakania kana nĩ mũbatithie kana ti mũbatithie. Kwoguo angĩkorũo nĩ ũĩ ũndũ ũrĩa wagĩrĩire na ũrĩ mũgima ũndũ ũngĩhota gwĩcũrania ũhoro wa ũtũũro waku, no gũkorũo rĩrĩ nĩrĩo ihinda rĩa kwaria na mũciari waku kana Mũkristiano ũngĩ mũgimaru kĩĩroho. Na njĩra ĩyo, no ũhote kũmenya ũrĩa ũngĩkinyĩra itua rĩa kũbatithio.
● Angĩkorũo arata aku nĩ mabatithĩtio, nĩ kuuga o nawe nĩ wagĩrĩire kũbatithio.
Ti ma. Itua rĩa kũbatithio rĩagĩrĩirũo kuuma ngoro-inĩ wĩyendeire. (Thaburi 110:3) Wagĩrĩirũo kũbatithio thutha wa gũtaũkĩrũo biũ nĩ maũndũ marĩa mahutĩtie gũtuĩka Mũira wa Jehova na gũkorũo na ma biũ atĩ nĩ wĩhaarĩirie kũmahingia.—Kohelethu 5:4, 5.
Kũbatithio nĩ Kũgarũraga Mũtũũrĩre Waku
Kũbatithio nĩ kũgarũraga mũtũũrĩre waku, na gũgatũma ũgĩe na irathimo nyingĩ. O na kũrĩ ũguo, nĩ gũtũmaga ũgĩe na ũigĩrĩrĩki wa gũtũũra kũringana na wĩyamũrĩri waku harĩ Jehova.
Hihi ũrĩ hakuhĩ kwĩyamũrĩra Jehova? Angĩkorũo nĩguo, ũrĩ na itũmi nyingĩ cia gũtũma ũkene. Ũkũgĩa na mweke ũrĩa wa bata mũno, wa gũtungatĩra Jehova na ngoro yaku yothe na gũtũũra na njĩra ĩronania atĩ nĩ ũmwĩyamũrĩire biũ.—Mathayo 22:36, 37.
RĨANDĨKO RĨA MŨTHINGI
‘Rutai mĩĩrĩ yanyu ĩrĩ igongona rĩrĩ muoyo, itheru na rĩretĩkĩrĩka nĩ Ngai, ũtungata mũtheru mũkĩhũthĩra ũhoti wanyu wa gwĩciria.’—Aroma 12:1.
GERIA ŨŨ
Ĩra aciari aku magũteithie kuona mũndũ ũngĩgũteithia gũkũra kĩĩroho thĩinĩ wa kĩũngano. —Atũmwo 16:1-3.
HIHI NĨ ŨĨ . . . ?
Ikinya rĩa kũbatithio nĩ gĩcunjĩ kĩa bata kĩa “rũũri” rwa gũgaatũma ũhonokio.—Ezekieli 9:4-6.
ŨRĨA INGĨKA!
Nĩguo hote gũkinyĩrĩra kũbatithio, nĩ ngũthuthuria makĩria morutani maya ma Bibilia: ․․․․․
Ũndũ ũrĩa ingĩenda kũũria aciari akwa wĩgiĩ ũhoro ũyũ nĩ ․․․․․
ŨGWĨCIRIA ATĨA?
● Nĩkĩ kũbatithio nĩ ikinya rĩbatiĩ kuoywo na ũritũ?
● Nĩ kĩĩ kĩngĩtũma mũndũ mwĩthĩ atengʼerere kũbatithio?
● Nĩ kĩĩ kĩngĩtũma mũndũ mwĩthĩ atue itua rĩtarĩ rĩa ũũgĩ rĩa kũgonderera kwĩyamũrĩra Jehova na kũbatithio?
Kũmenya atĩ ndĩ mũbatithie nĩ kwandeithirie gũtua matua ma ũũgĩ na gwĩthema gwĩka maũndũ mangĩatũmire ngĩe na moimĩrĩro moru.’’—Holly
[Gathandũkũ]
Ciũria Ciũragio Kaingĩ Ciĩgiĩ Kũbatithio
Kũbatithio kuonanagia ũndũ ũrĩkũ? Kũrikio na kũrutwo maĩ-inĩ kuonanagia atĩ nĩ wakua na njĩra ya mũhaano ũhoro-inĩ wĩgiĩ gũthingata ũtũũro wa mwĩyendo, na rĩu wĩ muoyo nĩguo wĩkage wendi wa Jehova.
Kwĩyamũrĩra Jehova nĩ kuuga atĩa? Nĩ kuuga atĩ nĩ wĩregete ũkeneana kũrĩ we, na atĩ gwĩka wendi wake nĩguo ũndũ ũrĩa ũrĩigaga mbere ũtũũro-inĩ. (Mathayo 16:24) Kwoguo nĩ wagĩrĩirũo gũkorũo na ihoya rĩa kwĩyamũrĩra Jehova ihinda rĩna ũtanabatithio.
Wagĩrĩirũo gũkorũo ũgĩka atĩa na ũtũũro waku ũtanabatithio? Wagĩrĩirũo gũkorũo ũgĩtũũra kũringana na ũrĩa Kiugo kĩa Ngai kiugĩte na ũkera andũ arĩa angĩ ũhoro wa wĩtĩkio waku. Wagĩrĩirũo gũkũria ũrata hamwe na Ngai kũgerera mahoya na kwĩruta Kiugo gĩake. Wagĩrĩirũo gũkorũo ũgĩtungatĩra Jehova tondũ wee mwene nĩ ũrenda gwĩka ũguo, no ti tondũ andũ angĩ nĩ maragũtindĩkĩrĩria.
Nĩ harĩ mĩaka ĩrĩa mũndũ abatiĩ gũkorũo nayo nĩguo abatithio? Mĩaka ya mũndũ tiyo ũndũ ũrĩa mũnene. No ningĩ nĩ wega gũkorũo ũgimarĩte wega, nginya kĩĩmeciria, ũũ atĩ no ũhote gũtaũkĩrũo ũrĩa kwĩyamũrĩra Jehova kuugĩte.
Ĩ angĩkorũo nĩ ũrenda kũbatithio no aciari aku marakwĩra wambe weterere? No gũkorũo marenda wambe wagagĩrie ũtũũro waku wĩ Mũkristiano. Rũmĩrĩra ũtaaro wao, na ũhũthĩre ihinda rĩu kũgĩa ũrata wa hakuhĩ hamwe na Jehova.—1 Samueli 2:26.
[Gathandũkũ]
Hihi nĩ Ũreciria Kũbatithio?
Hũthĩra ciũria na ũhoro ũyũ ũrĩ haha thĩ gwĩthuthuria kana nĩ ũrakinyũkia makinya mangĩgũteithia ũkinyĩrĩre kũbatithio. Tigĩrĩra nĩ wathoma maandĩko marĩa monanĩtio mbere ya kwandĩka macokio maku.
Nĩ njĩra irĩkũ ũronania nacio ihinda-inĩ rĩrĩ atĩ nĩ wĩhokete Jehova?—Thaburi 71:5. ․․․․․
Wonanĩtie atĩa atĩ meciria maku nĩ mamenyeretio gũkũũrana wega na ũũru?—Ahibirania 5:14. ․․․․․
Ũhoyaga maita maigana o mũthenya? ․․․․․
Nĩ ũgwetagĩra Jehova maũndũ cara-rũkũ ũkĩhoya, na mahoya maku monanagia wendo waku kũmwerekera ũhaana atĩa?—Thaburi 17:6. ․․․․․
Andĩka haha thĩ mĩoroto ĩrĩa ũngĩenda kwĩigĩra ĩgiĩ mahoya maku. ․․․․․
Nĩ ũkoragwo na wĩruti waku kĩũmbe wa Bibilia ũtaratĩrĩrio? —Joshua 1:8. ․․․․․
Nĩ maũndũ marĩkũ wĩkaga hĩndĩ ya wĩruti waku kĩũmbe? ․․․․․
Andĩka haha thĩ mĩoroto ĩrĩa ũngĩenda kwĩigĩra ĩgiĩ wĩruti waku kĩũmbe. ․․․․․
Ũtungata waku ũkoragwo ũhaana atĩa? (Ngerekano: No ũhote gũtaarĩria andũ angĩ morutani ma Bibilia ma mũthingi? Nĩ ũcokagĩra arĩa makenio nĩ ũhoro? Nĩ ũrerutanĩria kũgĩa na mũrutwo wa Bibilia?)
□ Ĩĩ □ Aca
Nĩ ũthiaga ũtungata o na aciari aku maga gũthiĩ?—Atũmwo 5:42.
□ Ĩĩ □ Aca
Andĩka haha thĩ mĩoroto ĩrĩa ũngĩenda kwĩigĩra ĩgiĩ ũtungata waku.—2 Timotheo 2:15. ․․․․․
Ũthiaga mĩcemanio ya Gĩkristiano ũtegũtĩrĩria kana rĩmwe na rĩmwe?—Ahibirania 10:25. ․․․․․
Ũnyitanagĩra mĩcemanio-inĩ na njĩra irĩkũ?
Nĩ ũthiaga rĩrĩa aciari aku matarathiĩ (angĩkorũo nĩ makũheete rũtha rwa gwĩka ũguo)?
□ Ĩĩ □ Aca
No uuge na ma biũ atĩ nĩ ũkenagio nĩ gwĩka wendi wa Ngai? —Thaburi 40:8.
□ Ĩĩ □ Aca
No ũgwete maita maigana ũna wareganire na hatĩka cia riika?—Aroma 12:2. ․․․․․
Ũbangĩte gwĩka atĩa nĩguo ũtũũrie wendo mũnene kwerekera Jehova?—Judasi 20, 21. ․․․․․
No ũthiĩ na mbere gũtungatĩra Jehova o na aciari kana arata aku mangĩtiga gwĩka ũguo?—Mathayo 10:36, 37.
□ Ĩĩ □ Aca
O ta kĩhiko, kũbatithio nĩ kũgarũraga mũtũũrĩre waku, na kwagĩrĩire kuoywo na ũritũ