ITHOMO RĨA 3
Rahabu nĩ Eetĩkĩtie Jehova
Tene tene mũno-rĩ, nĩ kwarĩ taũni yetagwo Jeriko. Taũni ĩyo yarĩ bũrũri-inĩ wa Kanaani, kũrĩa andũ aingĩ mateetĩkĩtie Jehova. Na nĩkuo mũtumia wetagwo Rahabu aaikaraga.
Rĩrĩa Rahabu aarĩ kairĩtu kanini, nĩ aaiguĩte ũrĩa Musa aagayũkanĩtie Iria Itune, na agatongoria Aisiraeli kuuma Misiri. Ningĩ nĩ aaiguĩte ũrĩa Jehova aamateithĩtie kũhoota thũ ciao mbaara-inĩ. Agĩcoka akĩigua atĩ Aisiraeli maarĩ hakuhĩ na Jeriko.
Rahabu aagitĩire atuĩria tondũ nĩ eetĩkĩtie Jehova
Hwaĩ-inĩ ũmwe, Aisiraeli erĩ magĩthiĩ Jeriko nĩguo magatuĩrie taũni ĩyo. Magĩkinya nyũmba kwa Rahabu. Akĩmeera maingĩre maikare kũu. Gwatuka, mũthamaki wa Jeriko akĩmenya atĩ nĩ kũrĩ andũ mokĩte gũtuĩria taũni ĩyo na maraikara kwa Rahabu. Kwoguo mũthamaki agĩtũmana andũ acio magĩrũo. Rahabu akĩhitha Aisiraeli acio igũrũ rĩa nyũmba yake, agĩcoka akĩra andũ acio maatũmĩtwo nĩ mũthamaki atĩrĩ: ‘Atuĩria acio moima gũkũ, no nĩ mathiĩ. Mũngĩmarũmĩrĩra o rĩu no mũmanyite!’ Hihi nĩ ũĩ kĩrĩa gĩatũmire Rahabu agitĩre atuĩria acio?— Nĩ tondũ nĩ eetĩkĩtie Jehova, na nĩ oĩ atĩ nĩ akaahe Aisiraeli bũrũri wa Kanaani.
Atuĩria acio matanoima kwa Rahabu, magĩtiga mamwĩra atĩ nĩ akaahonokio arĩ hamwe na famĩlĩ yao rĩrĩa Jeriko ĩkaanangwo. Hihi nĩ ũĩ maamwĩrire eke atĩa?— Maamwĩrire ũũ: ‘Oya mũkwa ũyũ mũtune, ũcuurie ndirica-inĩ yaku mwena wa nja. Weka ũguo, andũ arĩa othe magaakorũo gwaku nĩ makaahonokio.’ Rahabu agĩka o ũrĩa atuĩria acio maamwĩrire. Hihi nĩ ũĩ ũrĩa gwacokire gwĩkĩka?—
Jehova nĩ aahonokirie Rahabu na famĩlĩ yao
Thikũ nini thutha ũcio, Aisiraeli magĩthiũrũrũka taũni ĩyo makirĩte ki. Kwa ihinda rĩa thikũ ithathatũ makĩrĩthiũrũrũka rita rĩmwe o mũthenya. No mũthenya wa mũgwanja magĩthiũrũrũka maita mũgwanja. Magĩcoka makĩanĩrĩra na mũgambo mũnene marĩ othe. Nake Jehova agĩtũma thingo iria ciathiũrũrũkĩirie taũni ĩyo imomoke. No nyũmba ĩrĩa yarĩ na mũkwa mũtune ũcuurĩtio ndirica-inĩ ĩgĩtigwo ĩrũgamĩte! Hihi nĩ ũramĩona mbica-inĩ?— Rahabu na famĩlĩ yao makĩhonokio!
Wee ũreruta ũndũ ũrĩkũ kuumana na Rahabu?— Rahabu eetĩkĩtie Jehova nĩ ũndũ wa maũndũ marĩa mothe ma magegania aamenyete mamwĩgiĩ. O nawe nĩ ũkũmenya maũndũ maingĩ ma magegania megiĩ Jehova. Hihi wee nĩ ũmwĩtĩkĩtie ta ũrĩa Rahabu aamwĩtĩkĩtie?— Hatarĩ nganja nĩ ũmwĩtĩkĩtie!