Samueli Aathiire na Mbere Gwĩka Ũrĩa Kwagĩrĩire

Kuuma rĩrĩa Samueli aarĩ mũnini mũno, aaikaraga na akaruta wĩra hekarũ-inĩ, kũrĩa andũ maathiaga kũhoya Jehova. Hihi nĩ ũĩ ũrĩa gwathiĩte nĩguo Samueli aikarage hekarũ-inĩ? Ta reke twambe twĩrute ũhoro wa Hana, nyina wa Samueli.

Kwa ihinda iraihu, Hana ndangĩahotire kũgĩa mwana o na gũtuĩka nĩ eendaga mũno kũgĩa. Nĩ ũndũ ũcio, akĩhoya Jehova na akĩmũthaitha amũteithie. Akĩmwĩra atĩ angĩamũhotithirie kũgĩa mwana wa kahĩĩ, nĩ angĩamũheanire aikarage hekarũ-inĩ na arutage wĩra kuo. Jehova agĩcokia mahoya make, na Hana akĩgĩa kahĩĩ. Agĩgeeta Samueli. Na o ta ũrĩa Hana eerĩire Ngai, rĩrĩa Samueli aarĩ na mĩaka ĩtatũ kana ĩna, akĩmũtwara hekarũ-inĩ atungatagĩre Ngai.

Eli nĩwe warĩ mũthĩnjĩri-Ngai ũrĩa mũnene hekarũ-inĩ. O na ciana ciake igĩrĩ ciarutaga wĩra kũu. Ririkana atĩ hekarũ yarĩ nyũmba ya kũhoera Ngai, na andũ magĩrĩirũo gwĩka maũndũ mega kũu. No ciana cia Eli ciekaga maũndũ moru mũno na Samueli nĩ onaga ũrĩa ciekaga. Hihi Samueli nĩ aambĩrĩirie gwĩka maũndũ moru ta marĩa ciana cia Eli ciekaga?​— Aca, aathiire na mbere gwĩka ũrĩa kwagĩrĩire ta ũrĩa aciari ake maamũrutĩte.

Ũgwĩciria Eli aagĩrĩirũo gwĩka ciana icio ciake atĩa?​— Aagĩrĩirũo gũciherithia. Ndaabatiĩ kũreka ithiĩ na mbere kũruta wĩra rĩngĩ thĩinĩ wa nyũmba ya Ngai. No Eli ndeekire ũguo, nĩ ũndũ ũcio Jehova akĩrakario nĩwe na ciana icio ciake. Jehova agĩtua itua rĩa kũmaherithia.

Ũtukũ ũmwe Samueli arĩ toro, nĩ aaiguire mũndũ akĩmwĩta: ‘Samueli!’ Agĩtengʼera kũrĩ Eli, no Eli akĩmwĩra: ‘Niĩ ndigwĩtĩte.’ Ũndũ ũcio ũgĩkĩka maita mangĩ merĩ. Thutha wa rita rĩa gatatũ, Eli akĩra Samueli atĩ angĩigua mũgambo ũcio rĩngĩ, oige: ‘Njarĩria Jehova, nĩ ndĩrathikĩrĩria.’ Na ũguo nĩguo Samueli eekire. Jehova agĩcoka akĩra Samueli ũũ: ‘Ĩra Eli atĩ nĩ ngũherithia famĩlĩ yake nĩ ũndũ wa maũndũ moru marĩa mekĩte.’ Nĩ ũgwĩciria warĩ ũndũ mũhũthũ harĩ Samueli kwĩra Eli ũguo?​— Aca, ndwarĩ ũndũ mũhũthũ. No o na gũtuĩka Samueli aarĩ na guoya, nĩ eekire ũrĩa Jehova aamwĩrire eke. Ũndũ ũrĩa Jehova oigĩte nĩ wahingire. Ciana icio igĩrĩ cia Eli nĩ cioragirũo, na Eli o nake agĩkua.

Samueli nĩ kĩonereria kĩega harĩ ithuĩ. Nĩ eekire ũrĩa kwagĩrĩire o na gũtuĩka nĩ onaga andũ angĩ magĩka maũndũ moru. Ĩ wee nawe? Hihi nĩ ũgũtuĩka ta Samueli wĩkage ũrĩa kwagĩrĩire? Weka ũguo, nĩ ũgũkenia Jehova na ũkenie aciari aku.