ITHOMO RĨA 11
Nĩ Maandĩkire Ũhoro Wĩgiĩ Jesu
Nĩ ũrona athuri aya marĩ mbica-inĩ?— Nĩ Mathayo, Mariko, Luka, Johana, Petero, Jakubu, Judasi, na Paulo. Athuri acio maatũũraga ihinda-inĩ rĩmwe na Jesu, na nĩ maandĩkire ũhoro wake. Ta reke twĩrute ũhoro wao makĩria.
Nĩ ũndũ ũrĩkũ ũĩ wĩgiĩ athuri aya?
Atatũ ao maarĩ a gĩkundi kĩa andũ arĩa Jesu aathuurĩte kuuma harĩ arũmĩrĩri ake, arĩa meetagwo atũmwo. Nĩ ũĩ acio atatũ nĩ arĩkũ?— Nĩ Mathayo, Johana, na Petero. Mathayo na Johana nĩ moĩ Jesu wega biũ, na o ũmwe wao nĩ aandĩkire ibuku rĩgiĩ ũtũũro wa Jesu. Mũtũmwo Johana ningĩ nĩ aandĩkire ibuku rĩĩtagwo Kũguũrĩrio na marũa matatũ metagwo Johana wa Mbere, Johana wa Kerĩ, na Johana wa Gatatũ. Mũtũmwo Petero nĩ aandĩkire marũa merĩ marĩ thĩinĩ wa Bibilia. Metagwo Petero wa Mbere na Petero wa Kerĩ. Thĩinĩ wa marũa make ma kerĩ, Petero nĩ aandĩkire ũhoro wa rĩrĩa Jehova aaririe kuuma igũrũ akiuga ũũ igũrũ rĩgiĩ Jesu: ‘Ũyũ nĩ mũrũ wakwa. Nĩ ndĩmwendete, na nĩ ngenagio nĩwe.’
Athuri acio angĩ marĩ thĩinĩ wa mbica o nao nĩ matũrutaga ũhoro wĩgiĩ Jesu mabuku-inĩ marĩa maandĩkire. Ũmwe wao nĩ Mariko. No kũhoteke aarĩ ho rĩrĩa Jesu aanyitirũo na akĩona ũrĩa wothe gwathiire. Ũngĩ nake nĩ Luka ũrĩa warĩ ndagĩtarĩ, na no kũhoteke aatuĩkire Mũkristiano thutha wa Jesu gũkua.
Andĩki angĩ erĩ a Bibilia arĩa ũrona mbica-inĩ maarĩ ariũ a nyina na Jesu anyinyi kũmũkĩra. Nĩ ũĩ ũrĩa meetagwo?— Meetagwo Jakubu na Judasi. Kĩambĩrĩria-inĩ, matietĩkirie Jesu. O na meeciragia atĩ nĩ aagũrũkĩte. No thutha-inĩ nĩ maamwĩtĩkirie na magĩtuĩka Akristiano.
Mwandĩki ũcio ũngĩ wa Bibilia ũrona mbica-inĩ nĩ Paulo. Atanatuĩka Mũkristiano, eetagwo Saulu. Nĩ aathũire Akristiano na nĩ aamekaga maũndũ moru. Nĩ ũĩ nĩ kĩĩ gĩatũmire Paulo ende gũtuĩka Mũkristiano?—Mũthenya ũmwe arĩ njĩra-inĩ agĩthiĩ, nĩ aaiguire o rĩmwe mũndũ akĩmwarĩria kuuma igũrũ. Mũndũ ũcio aarĩ Jesu! Oririe Paulo atĩrĩrĩ, ‘Nĩ kĩĩ gĩtũmaga wĩke andũ arĩa manjĩtĩkĩtie maũndũ moru?’ Thutha ũcio, Paulo akĩgarũrũka agĩtuĩka Mũkristiano. Paulo aandĩkire mabuku ikũmi na mana ma Bibilia, kuuma Aroma nginya Ahibirania.
Tũthomaga Bibilia o mũthenya, githĩ tiguo?— Twathoma Bibilia, nĩ twĩrutaga maũndũ maingĩ megiĩ Jesu. Wee no wende kwĩruta ũhoro wa Jesu makĩria?—