Timotheo nĩ Eendete Gũteithia Andũ

Timotheo aarĩ mũndũ mũnyinyi wakenagĩra gũteithia andũ, na nĩ aathiaga kũndũ kũingĩ kũmateithia. Nĩ ũndũ ũcio, nĩ aakeneire ũtũũro wake mũno. No wende kũmenya ũhoro wa ũtũũro wake?​—

Timotheo aarereirũo thĩinĩ wa taũni yetagwo Lusitera. Rĩrĩa aarĩ mũnini, cũwe Loisi, na nyina Eunike, nĩ maambĩrĩirie kũmũruta ũhoro wĩgiĩ Jehova. O ũrĩa Timotheo aanenehaga, nĩ eendaga gũteithia andũ arĩa angĩ merute ũhoro wĩgiĩ Jehova.

Timotheo arĩ o mũndũ mwĩthĩ, nĩ oririo nĩ Paulo kana no mathiĩ nake makahunjie kũndũ kũngĩ, na agĩtĩkĩra. Nĩ eeharĩirie gũthiĩ agateithie andũ arĩa angĩ.

Timotheo magĩthiĩ na Paulo Thesalonike, taũni yarĩ kũndũ gwetagwo Makedonia. Nĩguo makinye kũu, maathiire kũndũ kũraihu magũrũ, magĩcoka magĩthiĩ na gatarũ. Na rĩrĩa maakinyire, magĩteithia andũ aingĩ merute ũhoro wa Jehova. No andũ amwe nĩ maarakarire na makĩgeria kũmeka maũndũ moru. Nĩ ũndũ ũcio Paulo na Timotheo makiuma kũu, magĩthiĩ kũhunjia kũndũ kũngĩ.

Mĩeri mĩnini yathira, Paulo akĩra Timotheo acoke Thesalonike akarore ũrĩa aarĩ na ariũ a Ithe witũ maathiaga na mbere. Nĩ aabataraga gũkorũo na ũcamba mũno nĩguo acoke thĩinĩ wa taũni ĩyo njũru! No Timotheo nĩ aathiire tondũ nĩ eeciragia mũno ũhoro wa aarĩ na ariũ a Ithe witũ arĩa maarĩ kũu. Agĩcoka kũrĩ Paulo arĩ na ũhoro mwega. Aarĩ na ariũ a Ithe witũ a Thesalonike nĩ maathiaga na mbere wega mũno!

Timotheo maarutithanirie wĩra na Paulo mĩaka mĩingĩ. Hĩndĩ ĩmwe Paulo aandĩkire atĩ Timotheo nĩwe warĩ mũndũ ũrĩa wagĩrĩire biũ angĩatũmire agateithie ciũngano. Timotheo nĩ eendete Jehova na akenda andũ.

Hihi wee nĩ wendete andũ na ũkenda kũmateithia merute ũhoro wĩgiĩ Jehova?​—Angĩkorũo nĩguo, no ũkorũo na ũtũũro mwega mũno ũgũkenera o ta Timotheo!