Gĩthomo kĩa Ũthamaki​—Kũmenyeria Ndungata cia Mũthamaki

TA HŨŨRA mbica ũrĩ kĩgomano-inĩ. Ũkarora ũrĩa ũraruta mĩario harĩa mbere na ũkainia mũtwe ũcanjamũkĩte. Nĩ mũrũ wa Ithe witũ mwĩthĩ wa kĩũngano kĩanyu, na araruta mĩario yake ya mbere thĩinĩ wa kĩgomano. Wathikĩrĩria mĩario yake, ũkagega mũno nĩ ũrĩa Ngai amenyeragia andũ ake. Na waririkana ũrĩa aaritũhĩirũo akĩruta mĩario yake ya mbere kĩũngano-inĩ, ũkona atĩ nĩ athiĩte na mbere! Nĩ eekire mogarũrũku manene thutha wa gũthiĩ Cukuru ya Ũtungata wa Ũpainia. Ica ikuhĩ, marĩ na mũtumia wake nĩ merĩga gũthiĩ Cukuru ya Ahunjia a Ũthamaki. Ũkĩmũhũũrĩra hĩ thutha wa kũruta mĩario yake mĩega, ũkarora andũ arĩa angĩ marĩ kĩgomano-inĩ na ũgeciria ũhoro wĩgiĩ ũrĩa Ngai arutaga andũ ake.

Bibilia nĩ yarathĩte hĩndĩ andũ a Ngai othe ‘mangĩkaarutwo maũndũ nĩ Jehova.’ (Isa. 54:13) Ihinda rĩu nĩrĩo rĩrĩ. Tũrutagwo kũgerera mabuku maitũ, ningĩ kũgerera mĩcemanio, igomano, na cukuru mwanya mwanya iria ihaarĩirio nĩguo itũteithie kũhingia wĩra mũna ũrĩa tũngĩĩhokerũo ithondeka-inĩ rĩa Jehova. Gĩcigo-inĩ gĩkĩ, nĩ tũkuona ũrĩa gĩthomo kĩu gĩothe kĩonanagia na ma atĩ Ũthamaki wa Ngai nĩ ũrathana.