Johana Arenda Kũigua Kuuma Kũrĩ Jesu

Johana Mũbatithania akoretwo njera ihinda ta rĩa mwaka ũmwe. Ĩndĩ no aiguaga maũndũ marĩa Jesu ekaga ma magegania. Ta geria gwĩciria ũrĩa Johana araigua thutha wa arutwo ake kũmwĩra atĩ Jesu nĩ ariũkĩtie mũriũ wa mũtumia wa ndigwa itũũra-inĩ rĩa Naini. O na kũrĩ ũguo, Johana arenda kwĩiguĩra we mwene kuuma kũrĩ Jesu kana we nĩwe Mesia. Nĩ ũndũ ũcio ageeta arutwo ake erĩ. Meke atĩa? Mathiĩ makorie Jesu ũũ: “Hihi wee nĩwe Ũrĩa Weranĩirũo, kana nĩ harĩ ũngĩ twetereire?”​—Luka 7:19.

Kĩũria kĩu hihi nĩ kĩagĩrĩire? Johana nĩ mũndũ wĩrutĩire harĩ Ngai, na rĩrĩa aabatithagia Jesu mĩaka ta ĩĩrĩ mĩhĩtũku, nĩ onire roho wa Ngai ũkĩũmba igũrũ rĩa Jesu na akĩigua mũgambo wa Ngai ũkiuga Jesu nĩ mũrũwe. Tũtirĩ na gĩtũmi gĩa gwĩciria atĩ wĩtĩkio wa Johana nĩ ũnyihĩte. Korũo nĩ ũnyihĩte, Jesu ndangĩgathĩrĩria Johana ta ũrĩa egwĩka. No angĩkorũo Johana ndarĩ na nganja-rĩ, nĩ kĩĩ kĩratũma orie Jesu kĩũria kĩu?

No kũhoteke Johana arenda o gũthererio ĩmwe kwa ĩmwe kuuma kũrĩ Jesu atĩ we nĩwe Mesia. Ũndũ ũcio nĩ ũkũmwĩkĩra hinya, tondũ arĩ o njera na nĩ aranyamarĩka. Na no kũhoteke kĩũria kĩu kĩa Johana kĩrĩ na ũndũ ũngĩ makĩria. Nĩ oĩ morathi ma Bibilia marĩa monanĩtie atĩ Ũrĩa Weranĩirũo nĩ Ngai nĩ angĩgaatuĩka mũthamaki na mũhonokania. Ĩndĩ, Johana arĩ o njera mĩeri mĩingĩ thutha wa Jesu kũbatithio. Kwoguo nĩ ta Johana aroria kana hihi harĩ na ũngĩ ũgooka thutha wa Jesu, ũrĩa ũkaahingia biũ maũndũ marĩa mothe Mesia eerĩtwo ageeka.

Handũ ha kwĩra arutwo a Johana, ‘Niĩ nĩ niĩ Ũrĩa Weranĩirũo,’ Jesu akonania atĩ atũmĩtwo nĩ Ngai na njĩra ya kũhonia andũ aingĩ mĩrimũ ya mĩthemba yothe. Agacoka akeera arutwo acio: “Thiĩi mwĩre Johana ũhoro wĩgiĩ maũndũ marĩa mũrona na mũkaigua: Arĩa atumumu nĩ marahota kuona, arĩa mathuaga magetwara wega, arĩa marĩ na mangũ makahonio, arĩa mataiguaga makaigua, akuũ makariũkio, nao arĩa athĩni nĩ maraheo ũhoro ũrĩa mwega.”​—Mathayo 11:4, 5.

Kĩũria kĩa Johana no kĩonanie atĩ nĩ arerĩgĩrĩra Jesu eke makĩria ma ũrĩa areka na atĩ hihi nĩ ekũmũteithia oime njera. O na kũrĩ ũguo, Jesu arera Johana ndakerĩgĩrĩre maũndũ makĩria ma ciama iria araringa.

Arutwo a Johana mathiĩ, Jesu akeera kĩrĩndĩ atĩ Johana nĩ akĩrĩte mũnabii. Nĩwe “mũrekio” wa Jehova, ũrĩa wĩranĩirũo thĩinĩ wa Malaki 3:1. Ningĩ nĩwe mũnabii Elija, ũrĩa wĩranĩirũo thĩinĩ wa Malaki 4:​5, 6. Jesu agataarĩria ũũ: “Ngũmwĩra na ma atĩrĩ, harĩ arĩa maanaciarũo nĩ atumia, gũtirĩ mũnene gũkĩra Johana Mũbatithania, no mũndũ mũnini thĩinĩ wa Ũthamaki wa igũrũ nĩ mũnene kũmũkĩra.”​—Mathayo 11:11.

Akiuga atĩ ũrĩa mũnini thĩinĩ wa Ũthamaki wa igũrũ nĩ mũnene gũkĩra Johana, Jesu arenda kuonania atĩ Johana ndagakorũo Ũthamaki-inĩ wa igũrũ. Johana nĩwe wahaarĩirie njĩra nĩ ũndũ wa Jesu, ĩndĩ egũcoka akue Kristo atahingũrĩte njĩra ya gũthiĩ igũrũ. (Ahibirania 10:​19, 20) O na kũrĩ ũguo, Johana nĩ mũnabii mwĩhokeku wa Ngai na agaakorũo arĩ raiya gũkũ thĩ rungu rwa Ũthamaki wa Ngai.