Arori a Kũrĩithia Rũũru

HĨNDĨ ya ũtungata wa Jesu gũkũ thĩ, nĩ oonanirie atĩ nĩwe “mũrĩithi ũrĩa mwega.” (Joh. 10:11) Rĩrĩa oonire kĩrĩndĩ kĩrĩa kĩamũrũmĩrĩire, nĩ aakĩiguĩrĩire “tha tondũ kĩarĩ kĩnyamarie na gĩkahurunjwo ta ngʼondu itarĩ na mũrĩithi.” (Mat. 9:36) Petero na atũmwo arĩa angĩ nĩ meeyoneire wendo ũrĩa Jesu aarĩ naguo. Jesu aarĩ ngũrani mũno na arĩithi a Isiraeli arĩa maatiganĩirie rũũru na nĩ ũndũ ũcio rũkĩhurunjũka na rũkĩhũta kĩĩroho. (Ezek. 34:7, 8) Kĩonereria kĩega kĩa Jesu gĩa kũrutana na kũrũmbũiya ngʼondu, nginya akĩruta muoyo wake nĩ ũndũ wao, nĩ kĩarutire atũmwo ũrĩa mangĩateithirie andũ arĩa maarĩ na wĩtĩkio macokerere Jehova, “mũrĩithi na mũrori wa mĩoyo” yao.​—1 Pet. 2:25.

² Hĩndĩ ĩmwe Jesu akĩaria na Petero, nĩ aatĩtĩrithirie bata wa kũhe ngʼondu irio na gũcirĩithia. (Joh. 21:15-17) Hatarĩ nganja Petero nĩ aahutirio ngoro mũno nĩ ũndũ ũcio na thutha-inĩ agĩtaara athuri a kĩũngano gĩa Gĩkristiano gĩa tene ũũ: “Rĩithagiai rũũru rwa Ngai rũrĩa mwĩhokeirũo, mũgĩtungataga mũrĩ arori, ti tondũ wa kũringĩrĩrio, no nĩ tondũ wa kwĩyendera mũrĩ mbere ya Ngai; ti tondũ wa kwenda uumithio ũtarĩ wa kĩhooto, ĩndĩ nĩ mũrĩ na wendi; ti gwĩtua anene igũrũ rĩa andũ arĩa matuĩkĩte igai rĩa Ngai, ĩndĩ mũtuĩke cionereria harĩ rũũru.” (1 Pet. 5:1-3) Ciugo cia Petero no ihũthĩkaga kũrĩ arori thĩinĩ wa kĩũngano ũmũthĩ. Athuri a kĩũngano nĩ megerekanagia na Jesu harĩ gũtungata rũũru meyendeire na kwoguo makaiga kĩonereria ũtungata-inĩ wa Jehova.​—Ahib. 13:7.

³ Nĩ tũcokagia ngatho mũno nĩ ũndũ wa arori thĩinĩ wa kĩũngano arĩa mamũragwo nĩ roho wa Ngai. Nĩ tũgunĩkaga mũno nĩ ũndũ wao gũtũrũmbũiya. Kwa ngerekano, arori nĩ mekĩraga hinya na makarũmbũiya o mũndũ thĩinĩ wa kĩũngano. O kiumia nĩ matongoragia na kĩyo mĩcemanio ya kĩũngano, ĩrĩa ĩĩkĩraga andũ othe hinya. (Rom. 12:8) Wĩrutĩri wao harĩ kũgitĩra rũũru kuumana na ũgwati, ta wa andũ oru, nĩ ũtũmaga tũgĩe na ũgitĩri. (Isa. 32:2; Tit. 1:9-11) Gũkorũo marĩ kĩonereria kĩega ũtungata-inĩ nĩ gũtwĩkagĩra ngoro tũkorũo na kĩyo harĩ kũhunjia ũhoro ũrĩa mwega o mweri tũtegũtĩrĩria. (Ahib. 13:15-17) Jehova nĩ atũheete “arũme [acio] marĩ ta iheo” nĩguo kĩũngano gĩthiĩ na mbere gwakwo.​—Ef. 4:8, 11, 12.

ITHIMI CIA KĨĨMANDĨKO CIA ARORI

⁴ Nĩguo kĩũngano kĩrũmbũiyo na njĩra ĩrĩa yagĩrĩire, arũme arĩa mamũragwo matungate marĩ arori no mũhaka mahingie maũndũ marĩa monanĩtio thĩinĩ wa Kiugo kĩa Ngai. Maahingia maũndũ macio norĩo kũngĩrũo atĩ mamũrĩtwo nĩ roho mũtheru. (Atũm. 20:28) Ma nĩ atĩ, ithimi cia Kĩĩmandĩko cia arori a kĩũngano nĩ cia igũrũ tondũ wĩra wa arori nĩ wagĩrĩire kuoywo na ũritũ. No ithimi icio ti cia igũrũ mũno ũndũ itangĩkinyĩrũo nĩ arũme Akristiano arĩa marĩ na wendo wa ma harĩ Jehova na mehaarĩirie kũhũthĩrũo nĩwe. Arori nĩ magĩrĩire kuoneka nĩ andũ othe atĩ nĩ mahũthagĩra ũtaaro wa Bibilia mũtũũrĩre-inĩ wao wa o mũthenya.

⁵ Thĩinĩ wa marũa ma mbere marĩa mũtũmwo Paulo aandĩkĩire Timotheo na marĩa aandĩkĩire Tito, nĩ oonanirie maũndũ ma mũthingi marĩa arori merĩgagĩrĩrũo mahingie kũringana na Maandĩko. Thĩinĩ wa 1 Timotheo 3:1-7, tũthomaga ũũ: “Mũndũrũme angĩkorũo nĩ arerutanĩria gũtuĩka mũrori, nĩ arerirĩria wĩra mwega. Nĩ ũndũ ũcio mũrori agĩrĩirũo gũkorũo atarĩ ũcuke, mũthuri wa mũtumia ũmwe, mũndũ wĩkaga maũndũ na ũigananĩru, ũrĩ na meciria mega, ũrĩ mĩbango mĩega, mũnyitani ũgeni, ũrĩ ũhoti wa kũrutana, ũtakoragwo arĩ mũrĩĩu, ũtarĩ wa mbaara, mũndũ ũtanyitagĩrĩra mawoni make, ũtarĩ wa ngũĩ, ũtendete mbeca, mũndũ ũrũgamagĩrĩra nyũmba yake mwene na njĩra njega, ũkoragwo na ciana irathĩka na cioyaga maũndũ na ũritũ (tondũ mũndũ angĩkorũo ndoĩ kũrũgamĩrĩra nyũmba yake mwene-rĩ, angĩkĩhota atĩa kũrũmbũiya kĩũngano kĩa Ngai?), ti mũndũ ũratuĩkire Mũkristiano ica ikuhĩ, nĩgetha ndakae kũgĩa na mwĩtĩo akinyĩrũo nĩ ituĩro rĩrĩa rĩatuĩrĩirũo Mũcukani. Ningĩ-rĩ, agĩrĩirũo gũkorũo na ũira mwega kuuma harĩ andũ arĩa marĩ nja, nĩgetha ndagatuĩke wa kũnyũrũrio na agwe mũtego-inĩ wa Mũcukani.”

⁶ Paulo aandĩkĩire Tito ũũ: “Ndagũtigire Kirete nĩgetha ũrũnge maũndũ marĩa maahĩtanĩte na wamũre athuri thĩinĩ wa itũũra rĩmwe nginya rĩrĩa rĩngĩ, o ta ũrĩa ndagũtaarĩte: angĩkorũo nĩ harĩ mũndũrũme ũtarĩ ũndũ angĩĩcukĩrũo, mũthuri wa mũtumia ũmwe, ũrĩ na ciana ciĩtĩkĩtie, citathitangagĩrũo waganu kana ũremi. Nĩ gũkorũo mũrori nĩ mũramati wamũrĩtwo nĩ Ngai, na agĩrĩirũo gũkorũo atarĩ na ũndũ angĩĩcukĩrũo, atarĩ na mwĩĩkĩrĩro, mũndũ ũtarakaraga na ihenya, ũtakoragwo arĩ mũrĩĩu, ũtarĩ wa ngũĩ, ũtakorokagĩra uumithio ũtarĩ wa kĩhooto, ĩndĩ agĩrĩirũo gũkorũo arĩ mũnyitani ũgeni, wendete maũndũ mega, ũrĩ na meciria mega, mũthingu, mwĩhokeku, wĩgiragĩrĩria, ũrũmagia kiugo kĩrĩa kĩa wĩhokeku ũhoro-inĩ wĩgiĩ ũhoti wake wa kũrutana, nĩgetha ahotage gwĩkĩrana ngoro kũgerera ũrutani ũrĩa wagĩrĩire na gũkaania arĩa mareganaga naguo.”​—Tito 1:5-9.

⁷ O na gũtuĩka maũndũ marĩa arori merĩgagĩrĩrũo mahingie nĩ Maandĩko no moneke ta marĩ maingĩ mũno, arũme Akristiano matiagĩrĩirũo gwĩtigĩra gũtuĩka arori. Rĩrĩa monania ngumo njega cia Gĩkristiano iria ibataranagia harĩ arori, nĩ mekĩraga ngoro arĩa angĩ thĩinĩ wa kĩũngano meke o taguo. Paulo aandĩkire atĩ “arũme [acio] marĩ ta iheo” maheanĩtwo “nĩ ũndũ wa kũrũnga arĩa aamũre, kũruta wĩra wa gũtungata, na gwaka mwĩrĩ wa Kristo, o nginya ithuothe tũkinyĩre ũrũmwe wa wĩtĩkio na wa ũmenyo wa ma wĩgiĩ Mũrũ wa Ngai, tũtuĩke mũndũ mũgima biũ, tũkinyĩre gĩthimi kĩa ũgima kĩa ũiyũru wa Kristo.”​—Ef. 4:8, 12, 13.

⁸ Arori matikoragwo marĩ tũmwana tũnini kana andũ maratuĩkire Akristiano ica ikuhĩ. Handũ ha ũguo, makoragwo marĩ andũ marĩ na ũmenyeru mũtũũrĩre-inĩ wa Gĩkristiano, marĩ na ũmenyo mũingĩ wa Bibilia, ũtaũku mũrikĩru wa Maandĩko, na wendo wa ma harĩ kĩũngano. Nĩ makoragwo na ũmĩrĩru wa kwarĩria na kũrũnga arĩa mehĩtie, na nĩ ũndũ ũcio makagitĩra ngʼondu kuumana na mũndũ ũngĩenda gũcihũthĩra ũũru nĩguo egune. (Isa. 32:2) Arori makoragwo moĩkaine nĩ andũ othe thĩinĩ wa kĩũngano atĩ nĩ arũme agima kĩĩroho na marĩ wendo wa ma kwerekera rũũru rwa Ngai.

⁹ Arĩa mamũragwo gũtuĩka arori, nĩ monanagia ũũgĩ ũtũũro-inĩ wao. Angĩkorũo nĩ ahikanĩtie, mũrori agĩrĩire gũtũũra kũringana na ithimi cia Gĩkristiano ciĩgiĩ kĩhiko, ta gũkorũo arĩ mũthuri wa mũtumia ũmwe, na mũndũ ũrũgamagĩrĩra nyũmba yake mwene na njĩra njega. Mũrori angĩkorũo na ciana ciĩtĩkĩtie na ciathĩkaga na ikoya maũndũ na ũritũ na citathitangagĩrũo waganu kana ũremi, arĩa angĩ thĩinĩ wa kĩũngano no mamũhoe ũtaaro wĩgiĩ mũtũũrĩre wa famĩlĩ na wa Gĩkristiano marĩ na ma nĩ megũteithĩka. Ningĩ mũrori agĩrĩire gũkorũo atarĩ ũcuke, atarĩ ũndũ angĩĩcukĩrũo, na akorũo na ũira mwega nginya kuuma harĩ andũ arĩa marĩ nja. Ndagĩrĩire gũkorũo agĩcukĩrũo mĩtugo mĩũru ĩngĩthũkia ngumo njega ya kĩũngano. Ndagĩrĩire gũkorũo arũithĩtio ica ikuhĩ nĩ ũndũ wa mehia maritũ. Arĩa angĩ thĩinĩ wa kĩũngano nĩ mekagĩrũo ngoro kwĩgerekania na kĩonereria gĩake kĩega na magakena akĩmarũmbũiya kĩĩroho.​—1 Kor. 11:1; 16:15, 16.

¹⁰ Arũme ta acio arĩa mamũrĩtwo nĩ matungatagĩra kĩũngano gĩa Gĩkristiano o ta athuri thĩinĩ wa Isiraeli arĩa mataaragĩrio atĩ maarĩ “na ũũgĩ, ũtaũku, na ũmenyeru.” (Gũcok. 1:13) O na gũtuĩka athuri Akristiano ti akinyanĩru, nĩ moĩkaine thĩinĩ wa kĩũngano na itũũra-inĩ atĩ nĩ marĩ mĩtugo mĩega na nĩ metigĩrĩte Ngai na nĩ monanĩtie kwa ihinda atĩ nĩ marũmagĩrĩra motaaro ma Bibilia. Gũkorũo matarĩ na ũcuke nĩ kũmaheaga wĩyathi wa kwaria marĩ mbere ya kĩũngano.​—Rom. 3:23.

¹¹ Arume arĩa mamũragwo marĩ arori nĩ monanagia atĩ nĩ mekaga maũndũ na ũigananĩru, nginya rĩrĩa mararũmbũyania na andũ arĩa angĩ. Matinyitagĩrĩra mawoni mao. Handũ ha ũguo, makoragwo na ũigananĩru na nĩ megiragĩrĩria. Ũigananĩru wao nĩ wonekaga thĩinĩ wa maũndũ ta kũrĩa, kũnyua, na maũndũ-inĩ ma gwĩkenia. Makoragwo na ũigananĩru harĩ ũhũthĩri wa njohi nĩguo matigacukĩrũo kũrĩo kana gũtuĩka arĩĩu. Mũndũ ũrĩĩtwo nĩ aremagwo nĩ kwĩgirĩrĩria na ndangĩhota kũrũmbũiya mabataro ma kĩĩroho ma kĩũngano.

¹² Nĩguo mũndũ ahote kũrora kĩũngano nĩ abataraga gũkorũo na mĩbango mĩega. Ũndũ ũcio nĩ wonekaga kũgerera ũrĩa atariĩ, mũciĩ wake, na maũndũ make ma o mũthenya. Nĩ ethemaga gũtĩratĩrĩria maũndũ; nĩ amenyaga maũndũ marĩa marabatarania na akamabangĩra ũrĩa kwagĩrĩire. Arũmagĩrĩra motaaro ma Bibilia.

¹³ No mũhaka mũrori akorũo arĩ mũndũ ũtanyitagĩrĩra mawoni make. Agĩrĩirũo gũkorũo arĩ mũndũ ũngĩrutithania wĩra na arĩa angĩ thĩinĩ wa kĩama gĩa athuri arĩ na ũrũmwe. Nĩ agĩrĩire kwĩyona na njĩra ĩrĩa yagĩrĩire na ndagatanye arĩa angĩ meke maũndũ makĩrĩte ũhoti wao. Tondũ ndanyitagĩrĩra mawoni make, ndonaga mawoni make marĩ ma bata gũkĩra ma athuri arĩa angĩ. Angĩ no makorũo na ngumo kana ũhoti we atarĩ. Mũthuri onanagia atĩ ndaranyitĩrĩra mawoni make rĩrĩa atua matua akĩhũthĩra Maandĩko na akerutanĩria kwĩgerekania na Jesu Kristo. (Afil. 2:2-8) Nĩ mũndũ ũtarĩ wa mbaara kana wa ngũĩ ĩndĩ atĩaga andũ arĩa angĩ na akamona marĩ a bata kũmũkĩra. Ti mũndũ wa mwĩĩkĩrĩro, ũrĩa ũtindĩkagĩrĩria arĩa angĩ metĩkĩre mawoni make kana mwĩkĩre wake wa maũndũ. Ndarakaraga na ihenya, no athingataga thayũ rĩrĩa ararũmbũyania na arĩa angĩ.

¹⁴ Ningĩ, mũndũ ũragĩrĩra gũtungata arĩ mũrori wa kĩũngano akoragwo na meciria mega. Ũguo nĩ kuuga atĩ nĩ ahotaga kwĩgirĩrĩria na ndahiũhaga gũtua matua. Nĩ ataũkagĩrũo wega nĩ motaaro ma Jehova na ũrĩa mangĩhũthĩrũo. Mũndũ ũrĩ na meciria mega nĩ etĩkagĩra ũtaaro na ũtongoria. Ndarĩ ũhinga.

¹⁵ Paulo nĩ aaririkanirie Tito atĩ mũrori nĩ mũndũ wendete maũndũ mega. Agĩrĩire gũkorũo arĩ mũthingu na mwĩhokeku. Ngumo icio nĩ cionekaga rĩrĩa ararũmbũyania na arĩa angĩ na mũrũgamo-inĩ wake mũrũmu wa maũndũ mega na ma ũthingu. Atũũraga kũringana na wĩyamũrĩri wake harĩ Jehova na hĩndĩ ciothe nĩ arũmagia ithimi cia ũthingu. Nĩ ahotaga kũiga thiri. Ningĩ nĩ mũnyitani ũgeni, na kwoguo nĩ eheanaga na akaruta indo ciake nĩ ũndũ wa andũ arĩa angĩ.​—Atũm. 20:33-35.

¹⁶ Nĩguo mũrori atungate na njĩra njega, nĩ arabatara gũkorũo na ũhoti wa kũrutana. Kũringana na ciugo cia Paulo kũrĩ Tito, mũrori agĩrĩire gũkorũo arĩ mũndũ “ũrũmagia kiugo kĩrĩa kĩa wĩhokeku ũhoro-inĩ wĩgiĩ ũhoti wake wa kũrutana, nĩgetha ahotage gwĩkĩrana ngoro kũgerera ũrutani ũrĩa wagĩrĩire na gũkaania arĩa mareganaga naguo.” (Tit. 1:9) Nĩ ahotaga kũruta ihooto, kuonania ũira, gũtooria mĩhĩnga, na kũhũthĩra Maandĩko na njĩra angĩhota kũiguithia andũ arĩa angĩ na gwĩkĩra wĩtĩkio wao hinya. Onanagia ũhoti ta ũcio wa kũrutana mahinda-inĩ marĩa magĩrĩru o na marĩa maritũ. (2 Tim. 4:2) Nĩ akoragwo na ũkirĩrĩria ũrĩa ũbataranagia nĩguo arũnge mũndũ ũhĩtĩtie na njĩra ya ũhooreri kana ateithie mũndũ ũrĩ na nganja na amwĩkĩre ngoro eke maũndũ mega agĩtindĩkwo nĩ wĩtĩkio. Gũkorũo na ũhoti wa kũruta andũ marĩ aingĩ kana mũndũ ũmwe ũmwe nĩ ũira wa atĩ mũrori ũcio nĩ ahingĩtie ũndũ ũcio wa bata.

¹⁷ Athuri nĩ magĩrĩire gũkorũo na kĩyo ũtungata-inĩ. Nĩ magĩrĩirũo kuonania nginya ũndũ-inĩ ũcio atĩ nĩ marerutanĩria kwĩgerekania na Jesu, ũrĩa woonaga kũhunjia ũhoro mwega ũrĩ ũndũ ũrĩa wa bata makĩria. Jesu nĩ aateithagia arutwo ake gũkorũo marĩ ahunjia ega. (Mar. 1:38; Luk. 8:1) Athuri mangĩĩrutĩra biũ ũtungata-inĩ o na marĩ na maũndũ maingĩ ma gwĩka, no matũme kĩũngano gĩothe gĩkorũo na kĩyo o ta kĩu. Rĩrĩa athuri mahunjia na andũ a famĩlĩ ciao o hamwe na arĩa angĩ thĩinĩ wa kĩũngano, ũndũ ũcio nĩ ũtũmaga ‘mekĩrane ngoro.’​—Rom. 1:11, 12.

¹⁸ Maũndũ macio mothe no monanie ta mũrori erĩgagĩrĩrũo ahingie maũndũ maingĩ mũno. Hatarĩ nganja, gũtirĩ mũrori ũngĩkinyĩra na njĩra nginyanĩru ithimi icio cia igũrũ cionanĩtio thĩinĩ wa Bibilia, ĩndĩ gũtirĩ mũthuri mwamũre thĩinĩ wa kĩũngano wagĩrĩire kuoneka atĩ nĩ anyihĩirũo na gĩkĩro kĩnene nĩ ngumo o na ĩmwe ya icio. Athuri amwe no makorũo na ngumo imwe njega ciĩyumĩrĩtie na angĩ makorũo na ũhoti maũndũ-inĩ mangĩ. Moimĩrĩro nĩ atĩ kĩama gĩothe gĩa athuri nĩ kĩrĩkoragwo na ngumo ciothe njega iria irabatarania nĩguo kĩũngano kĩa Ngai kĩrũgamĩrĩrũo wega.

¹⁹ Rĩrĩa kĩama gĩa athuri kĩrenda mũndũ amũrũo atuĩke mũrori, nĩ wega kĩririkane ciugo ici cia mũtũmwo Paulo: “Ngwĩra mũndũ o wothe gatagatĩ-inĩ kanyu ndageciragie ũhoro wake mwene gũkĩra ũrĩa kwagĩrĩire gwĩciria, no eciragie nĩguo agĩe na meciria mega, kũringana na gĩthimi kĩa wĩtĩkio kĩrĩa Ngai aheete o mũndũ.” (Rom. 12:3) O mũthuri agĩrĩire kwĩyona arĩ ũrĩa mũnini mũno. Gũtirĩ o na ũmwe wao wagĩrĩire kwĩyona arĩ “mũthingu makĩria” rĩrĩa mararora ngumo cia ũrĩa marenda amũrũo. (Koh. 7:16) Kĩama gĩa athuri kĩrĩ na ithimi icio cia Kĩĩmaandĩko meciria-inĩ, nĩ kĩagĩrĩire kũrora kana mũrũ wa Ithe witũ ũrĩa kĩrenda amũrũo nĩ ahingĩtie ithimi icio na gĩkĩro kĩrĩa kĩagĩrĩire. Athuri mangĩririkana atĩ mũndũ ũcio marenda amũrũo ti mũkinyanĩru na matue itua rĩmwĩgiĩ matarĩ na mũthutũkanio na ũhinga, no monanie atĩ nĩ maheete gĩtĩo ithimi cia Jehova cia ũthingu na atĩ nĩ mararũmbũiya kĩũngano. Magĩciria ũhoro wa itua rĩao, nĩ magĩrĩirũo kũhoya Jehova amatongorie na roho mũtheru na mathuthurie na kinyi kana mũrũ wa Ithe witũ ũcio nĩ ahingĩtie ithimi cia Kĩĩmaandĩko. Ũcio nĩ ũmwe wa maũndũ marĩa maritũ makoragwo mehokeirũo, na no mũhaka magĩka ũguo marũmĩrĩre ũtaaro ũyũ wa Paulo: “Ndũkanahĩkĩke kũigĩrĩra mũndũ o na ũrĩkũ moko.”​—1 Tim. 5:21, 22.

MACIARO MA ROHO

²⁰ Athuri arĩa makoragwo na ngumo cia kĩĩroho nĩ monanagia wega atĩ matongoragio nĩ roho mũtheru na makonania maciaro ma roho ũtũũro-inĩ wao. Paulo nĩ aandĩkire maciaro kenda ma roho na nĩmo “wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria.” (Gal. 5:22, 23) Arori ta acio nĩ mekagĩra hinya aarĩ na ariũ a Ithe witũ na magateithia kĩũngano gĩkorũo na ũrũmwe gĩkĩhingia ũtungata mũtheru. Mĩthiĩre yao na moimĩrĩro ma wĩra wao nĩ cionanagia atĩ mamũrĩtwo nĩ roho mũtheru.​—Atũm. 20:28.

MERUTANAGĨRIA GŨKORŨO NA ŨRŨMWE

²¹ Nĩ ũndũ wa bata athuri kũrutithania wĩra hamwe nĩguo kĩũngano gĩkorũo na ũrũmwe. No makorũo na ngumo itiganĩte, ĩndĩ nĩ matũũragia ũrũmwe gatagatĩ-inĩ kao na njĩra ya gũthikanagĩrĩria na gĩtĩo o na akorũo ti maũndũ mothe maraiguithanĩria. Angĩkorũo hatirĩ ũtaaro wa Bibilia ũragararũo, o ũmwe wao agĩrĩirũo kũnyita mbaru itua rĩrĩa rĩatuo nĩ kĩama gĩa athuri atekũnyitĩrĩra mawoni make. Gũkorũo na roho ta ũcio kuonanagia atĩ aratongorio nĩ “ũũgĩ ũrĩa uumaga igũrũ,” ũrĩa ‘ũrĩ thayũ, na ũigananĩru.’ (Jak. 3:17, 18) Gũtirĩ mũthuri ũbatiĩ kwĩyona ta arĩ wa bata gũkĩra athuri arĩa angĩ kana agerie kũmaatha. Rĩrĩa kĩama gĩa athuri kĩarutithania wĩra kĩrĩ na ũrũmwe, gĩkoragwo gĩkĩnyitanĩra na Jehova, na kĩũngano nĩ kĩgunĩkaga.​—1 Kor., mũrango wa 12; Kol. 2:19.

KWĨRUTANĨRIA GŨTUĨKA MŨRORI

²² Arũme agimaru kĩĩroho nĩ magĩrĩirũo kwĩrirĩria gũtuĩka arori. (1 Tim. 3:1) O na kũrĩ ũguo, nĩguo mũndũ atungate arĩ mũthuri wa kĩũngano nĩ abataraga kwĩrutanĩria na kwĩima. Ũguo nĩ kuuga akorũo ehaarĩirie kũrũmbũiya aarĩ na ariũ a Ithe witũ na kũmahingĩria mabataro mao ma kĩĩroho. Kwĩrutanĩria gũtuĩka mũrori nĩ kuuga mũndũ eke ũrĩa wothe angĩhota nĩguo akinyĩre ithimi iria irĩ Maandĩko-inĩ.

MAŨNDŨ MA MŨNDŨ NO MACENJIE

²³ Mũrũ wa Ithe witũ ũtungatĩte ihinda iraihu arĩ mwĩhokeku no arware kana aremwo nĩ kũruta wĩra ũrĩa ehokeirũo. Kwahoteka nĩ ũndũ wa ũkũrũ, no aremwo gũthiĩ na mbere kũruta mawĩra marĩa arori mehokagĩrũo. O na kũrĩ ũguo, agĩrĩirũo gũthiĩ na mbere kũheo gĩtĩo na kuonwo arĩ mũthuri ihinda-inĩ rĩrĩa rĩothe amũrĩtwo. Ndarabatara gũtiga gũtungata arĩ mũthuri atĩ tondũ ndarahota kũhingia maũndũ maingĩ. Nĩ agĩrĩire gũthiĩ na mbere kũheo gĩtĩo kĩnene kĩrĩa kĩheagwo athuri othe arĩa merutanagĩria biũ kũrĩithia rũũru.

²⁴ No mũrũ wa Ithe witũ angĩona arĩ wega atige gũthiĩ na mbere gũkorũo arĩ mũrori nĩ ũndũ wa maũndũ make gũcenjia magatũma aremwo nĩ gũtungata-rĩ, no eke ũguo. (1 Pet. 5:2) Nĩ agĩrĩire gũthiĩ na mbere kũheo gĩtĩo. Arĩ na ũhoti wa gwĩka maũndũ maingĩ mega kĩũngano-inĩ, o na akorũo ndaraheo wĩra ũrĩa ũrutagwo nĩ athuri.

MAWĨRA THĨINĨ WA KĨŨNGANO

²⁵ Athuri nĩ marutaga mawĩra matiganĩte thĩinĩ wa kĩũngano. Nĩ gũkoragwo na mũtabarĩri wa kĩama gĩa athuri, mwandĩki, mũrori wa ũtungata, ũrĩa ũtongoragia Wĩruti wa Mũrangĩri, na mũrori wa Mũcemanio wa Ũtũũro na Ũtungata. Athuri aingĩ nĩ matungataga marĩ arori a ikundi. Athuri matikoragwo maigĩirũo ihinda rĩrĩa megũtungata mawĩra-inĩ macio. No mũrũ wa Ithe witũ angĩthaama, kana aremwo nĩ kũhingia maũndũ marĩa ehokeirũo nĩ ũndũ wa kũrwara, kana atigithio gũtungata arĩ mũthuri nĩ ũndũ wa kwaga kũhingia ithimi cia Kĩĩmaandĩko, nĩ gũthuuragwo mũthuri ũngĩ arute wĩra ũrĩa ararutaga. Thĩinĩ wa ciũngano iria gũtakoragwo na athuri aingĩ, mũthuri no abatare kũruta makĩria ma wĩra ũmwe nginya rĩrĩa ariũ a Ithe witũ angĩ makaagĩrĩra gũtuĩka athuri.

²⁶ Mũtabarĩri wa kĩama gĩa athuri nĩwe ũkoragwo arĩ mũikarĩri gĩtĩ mĩcemanio-inĩ ya kĩama gĩa athuri. Nĩ arutithanagia wĩra na athuri arĩa angĩ arĩ na wĩnyihia, makĩrũmbũiya rũũru rwa Ngai. (Rom. 12:10; 1 Pet. 5:2, 3) Agĩrĩirũo gũkorũo na ũhoti wa kũbanga maũndũ wega na akamatabania arĩ na kĩyo.​—Rom. 12:8.

²⁷ Mwandĩki nĩwe ũigaga rekondi cia kĩũngano na agaikara akĩmenyithagia athuri maũndũ ma bata megiĩ kĩũngano. Kũngĩbatarania, mũthuri ũngĩ kana ndungata ya kĩũngano yagĩrĩire no ĩheo wĩra wa kũmũteithĩrĩria mawĩra-inĩ mamwe.

²⁸ Mũrori wa ũtungata nĩwe ũrũgamagĩrĩra mĩbango ĩgiĩ wĩra wa kũhunjia na maũndũ mangĩ megiĩ ũtungata. Nĩ akoragwo na mũtaratara wa gũceerera kaingĩ ikundi ciothe cia kũhunjia, kwoguo wikendi ĩmwe harĩ mweri nĩ aceeragĩra gĩkundi ngũrani. Ciũngano-inĩ nini iria itakoragwo na ikundi nyingĩ cia ũtungata, no aceerere o gĩkundi maita merĩ harĩ mwaka. Hĩndĩ ya iceera rĩake, atongoragia mũcemanio wa ũtungata, akahunjia hamwe na gĩkundi kĩu, na agateithĩrĩria ahunjia magĩcokera na makĩĩruta Bibilia na andũ.

ARORI A IKUNDI

²⁹ Mũndũ gũtungata arĩ mũrori wa gĩkundi thĩinĩ wa kĩũngano nĩ mweke wa mwanya. Mawĩra make mahutĩtie (1) kũrũmbũiya maũndũ ma kĩĩroho ma o mũndũ thĩinĩ wa gĩkundi kĩu; (2) gũteithĩrĩria o mũndũ thĩinĩ wa gĩkundi ahunjagie ategũtĩrĩria arĩ na kĩyo na agakoragwo na gĩkeno ũtungata-inĩ; na (3) gũteithĩrĩria na kũmenyeria ndungata cia kĩũngano iria irĩ gĩkundi-inĩ kĩu ciagĩrĩre kwĩhokerũo maũndũ mangĩ kĩũngano-inĩ. Kĩama gĩa athuri nĩkĩo gĩtuaga nĩ ariũ a Ithe witũ arĩkũ maragĩrĩra makĩria harĩ kũhingia mawĩra macio.

³⁰ Nĩ ũndũ wa mawĩra marĩa mũrori wa gĩkundi ehokagĩrũo ahingie, kũngĩhoteka, arori a ikundi magĩrĩirũo gũkorũo marĩ athuri a kĩũngano. O na kũrĩ ũguo, ndungata ya kĩũngano ĩrĩa yagĩrĩire no ĩrute wĩra ũcio nginya rĩrĩa mũthuri wa kĩũngano akawoerera. Ndungata ya kĩũngano ĩrĩa ĩraruta wĩra ũcio ĩtagwo ndungata ya gĩkundi tondũ we ti mũrori thĩinĩ wa kĩũngano. Arutaga wĩra ũcio arĩ rungu rwa ũtongoria wa athuri.

³¹ Wĩra ũmwe wa bata wa mũrori wa gĩkundi nĩ gũtongoria ũtungata-inĩ. Gũkoragwo ũtungata-inĩ kaingĩ, kĩyo gĩake, na gũkoragwo na wendi wa kũhunjia nĩ gwĩkagĩra ngoro arĩa angĩ gĩkundi-inĩ gĩake. Nĩ wega kũbanga mũthenya ũrĩa andũ aingĩ maroneka, tondũ ahunjia marĩ hamwe nĩ mekĩranaga ngoro na magateithania. (Luk. 10:1-16) Mũrori wa gĩkundi agĩrĩirũo gũtigĩrĩra atĩ kũrĩ na kũndũ kũiganu gwa kũhunjia. Kaingĩ nĩwe ũtongoragia mũcemanio wa ũtungata na akabanga ũrĩa ahunjia megũthiĩ kũhunjia. Rĩrĩa atekuoneka, agĩrĩirũo kũhe mũthuri ũngĩ wĩra ũcio, kana ndungata ya kĩũngano, no angĩkorũo gũtirĩ ũkuoneka aũhe mũhunjia ũngĩ wagĩrĩire nĩguo ahunjia makorũo na ũtongoria ũrĩa marabatara.

³² Mũrori wa gĩkundi agĩrĩire kũbanga kabere ũhoro wĩgiĩ iceera rĩa mũrori wa ũtungata na amenyithie gĩkundi gĩake ũhoro wa iceera rĩu nĩguo makorũo mehaarĩirie gũkaagunĩka. Rĩrĩa andũ othe thĩinĩ wa gĩkundi mataarĩrio wega ũhoro wĩgiĩ iceera rĩu, no makenere kũrĩnyita mbaru.

³³ Gĩkundi gĩa kũhunjia kĩagĩrĩire gũkorũo gĩtarĩ na andũ aingĩ. Ũndũ ũcio ũteithagia mũrori wa gĩkundi ahote kũmenya wega andũ othe arĩa marĩ gĩkundi-inĩ gĩake. Arĩ mũrĩithi ũrĩ wendo, nĩ arũmbũyagia o mũndũ. Nĩ ageragia gũteithia o mũndũ na kũmwĩkĩra ngoro ũhoro-inĩ wĩgiĩ ũtungata na kũnyita mbaru mĩcemanio ya kĩũngano. Ningĩ nĩ erutanagĩria gwĩka ũndũ ũngĩ o wothe ũngĩbatarania nĩguo ateithie o mũndũ gũkorũo na hinya kĩĩroho. Arĩa mangĩkorũo marĩ arwaru kana marĩ na mĩtangĩko nĩ magunĩkaga nĩ ũndũ wa iceera rĩake. Kũgerera ũtaaro mũna kana ũndũ wa gwĩkĩra ngoro, mũndũ no ende kwĩrutanĩria gũkinyĩra mĩeke ĩngĩ thĩinĩ wa kĩũngano na akorũo arĩ ũteithio mũnene harĩ arĩa angĩ. Kaingĩ mũrori wa gĩkundi erutanagĩria gũteithia arĩa marĩ gĩkundi-inĩ gĩake. O na kũrĩ ũguo, arĩ mũthuri na mũrĩithi nĩ arũmbũyagia kĩũngano kĩrĩ gĩothe na njĩra ya wendo na nĩ akoragwo ehaarĩirie gũteithia arĩa othe marabatara ũteithio.​—Atũm. 20:17, 28.

³⁴ Wĩra ũmwe wa mũrori wa gĩkundi nĩ gũteithia harĩ kuoya riboti cia ũtungata cia andũ arĩa marĩ gĩkundi-inĩ gĩake. Riboti icio icokaga ikaneo mwandĩki. Ahunjia no mateithĩrĩrie mũrori wa gĩkundi na njĩra ya kũneanaga riboti ciao mategũcererũo. No maneage mũrori wa gĩkundi kĩao riboti o mũico wa mweri kana magaciikia gathandũkũ-inĩ karĩa gathuurĩtwo ka riboti cia ũtungata thĩinĩ wa Nyũmba ya Ũthamaki.

KAMĨTĨ YA ŨTUNGATA YA KĨŨNGANO

³⁵ Nĩ kũrĩ mawĩra mamwe marutagwo nĩ Kamĩtĩ ya Ũtungata ya Kĩũngano, ĩrĩa ĩkoragwo na mũtabarĩri wa kĩama gĩa athuri, mwandĩki, na mũrori wa ũtungata. Kwa ngerekano, kamĩtĩ ĩyo nĩyo ĩtĩkagĩria Nyũmba ya Ũthamaki ĩhũthĩrũo nĩ ũndũ wa mohiki kana mathiko, na nĩyo ĩbangaga ahunjia ikundi-inĩ cia kũhunjia. Kamĩtĩ ĩyo ningĩ nĩyo ĩhĩtũkagia andũ agĩrĩru arĩa marenda gũtungata marĩ mapainia a hĩndĩ ciothe kana a gũteithĩrĩria kana mĩeke-inĩ ĩngĩ ya ũtungata. Kamĩtĩ ya ũtungata ĩrutaga wĩra rungu rwa ũtongoria wa kĩama gĩa athuri.

³⁶ Mawĩra ma athuri acio, nginya ma ũrĩa ũtongoragia Wĩruti wa Mũrangĩri, mũrori wa Mũcemanio wa Ũtũũro na Ũtungata, na arĩa angĩ makoragwo kĩama-inĩ gĩa athuri, mataaragĩrio nĩ wabici ya rũhonge.

³⁷ Kĩama gĩa athuri o thĩinĩ wa kĩũngano nĩ gĩcemanagia mahinda kwa mahinda kwarĩrĩria maũndũ megiĩ ũrĩa kĩũngano kĩrathiĩ na mbere kĩĩroho. Hamwe na mũcemanio wa athuri ũrĩa wĩkagwo hĩndĩ ya iceera rĩa mũrori wa mũthiũrũrũko, nĩ gwĩkagwo mũcemanio wa athuri mĩeri ta ĩtatũ thutha wa o iceera rĩa mũrori wa mũthiũrũrũko. O na kũrĩ ũguo, athuri no macemanie hĩndĩ o yothe kũngĩbatarania.

MENYIHAGĨRIEI

³⁸ O na gũtuĩka arori ti akinyanĩru, andũ othe thĩinĩ wa kĩũngano nĩ mekagĩrũo ngoro mamenyihagĩrie tondũ mamũrĩtwo nĩ Jehova. Arori nĩ makoorio nĩ ũndũ wa ciĩko ciao. Marũgamagĩrĩra Jehova na mũbango wake wa gĩtheokrasi. Ahibirania 13:17 yugaga ũũ: “Athĩkagĩrai arĩa matongoragia gatagatĩ-inĩ kanyu na mũmenyihagĩrie, nĩ gũkorũo maikaraga meiguĩte nĩ ũndũ wanyu tondũ nĩ makoorio ũhoro wanyu, nĩguo mekage ũguo makenete no ti magĩcayaga, tondũ ũndũ ũcio no ũkorũo na moimĩrĩro moru harĩ inyuĩ.” O ta ũrĩa Jehova ahũthagĩra roho wake kwamũra mũndũ, noguo aũhũthagĩra kweheria mũndũ ũratungata arĩ mũrori angĩkorũo ndaronania maciaro ma roho na ndarakinyanĩria ithimi cia Kĩĩmaandĩko.

³⁹ Na githĩ tũtikenagĩra mũno kĩyo na kĩonereria kĩega kĩa arori a kĩũngano? Paulo akĩandĩkĩra kĩũngano gĩa Thesalonike aameerire ũũ: “Tũramũũria ariũ a Ithe witũ, atĩ mũtĩage arĩa marutaga wĩra na kĩyo gatagatĩ-inĩ kanyu na makamũtongoria thĩinĩ wa Mwathani na makamũtaara; na mũmeciragie na njĩra ya mwanya mũrĩ na wendo nĩ ũndũ wa wĩra wao.” (1 Thes. 5:12, 13) Wĩra mũingĩ ũrĩa ũrutagwo nĩ arori a kĩũngano ũtũmaga ũtungata witũ ũhũthe na tũũkenere. Ningĩ thĩinĩ wa marũa ma mbere marĩa Paulo aandĩkĩire Timotheo, nĩ oonanirie mwerekera ũrĩa andũ thĩinĩ wa kĩũngano magĩrĩire gũkorũo naguo kwerekera arori. Aameerire ũũ: “Athuri arĩa marũgamagĩrĩra maũndũ na njĩra njega mabatiĩ kuonagwo magĩrĩire kũheo gĩtĩo maita merĩ, na makĩria arĩa merutanagĩria ũhoro-inĩ wĩgiĩ kwaria na kũrutana.”​—1 Tim. 5:17.

MAWĨRA MANGĨ ATHURI MARUTAGA ITHONDEKA-INĨ

⁴⁰ Athuri amwe nĩ mathuuragwo matungate thĩinĩ wa Ikundi cia Gũceerera Arwaru. Angĩ nao matungataga thĩinĩ wa Kamĩtĩ cia Ũiguano na Thibitarĩ na nĩ maceeragĩra mandagĩtarĩ kwaria nao ũhoro wĩgiĩ kũrigita Aira a Jehova matekũhũthĩra thakame. Arori angĩ nĩ mahotaga gũtwarithia maũndũ ma Ũthamaki na mbere na njĩra ya gũteithĩrĩria gwaka na kũmenyerera Nyũmba cia Ũthamaki na Nyũmba cia Igomano kana gũtungata thĩinĩ wa Kamĩtĩ cia Igomano. Kĩyo kĩa ariũ a Ithe witũ acio na wendi wao wa gũtungata nĩ ikenagĩrũo mũno nĩ andũ othe thĩinĩ wa ithondeka. Hatarĩ nganja ‘andũ ta acio nĩ tũmatĩaga mũno.’​—Afil. 2:29.

MŨRORI WA MŨTHIŨRŨRŨKO

⁴¹ Kĩama Kĩrĩa Gĩtongoragia nĩ kĩbangaga kwamũrũo athuri arĩa maragĩrĩra matungate marĩ arori a mũthiũrũrũko. Wabici ya rũhonge ĩmehokagĩra wĩra wa gũceerera ciũngano iria irĩ thĩinĩ wa mũthiũrũrũko, na kaingĩ mekaga ũguo maita merĩ o mwaka. Ningĩ rĩmwe na rĩmwe nĩ maceeragĩra mapainia arĩa makoragwo icigo-inĩ cia kũraihu. Nĩ mabangaga rĩrĩa megũceerera ciũngano na magacimenyithia kabere nĩguo iceera rĩao rĩkorũo na ũguni mũnene.

⁴² Mũtabarĩri wa kĩama gĩa athuri nĩwe ũtongoragia harĩ kũbanga maũndũ nĩguo iceera rĩu rĩĩkĩre hinya andũ othe. (Rom. 1:11, 12) Rĩrĩa mũtabarĩri wa kĩama gĩa athuri amũkĩra marũa megiĩ iceera rĩu, na ũhoro wĩgiĩ mabataro ma mũrori wa mũthiũrũrũko na mũtumia wake (angĩkorũo nĩ ahikanĩtie), nĩ abangaga gwa gũkoma na maũndũ mangĩ mangĩbatarania agĩteithĩrĩrio nĩ ariũ a Ithe witũ angĩ. Nĩ atigagĩrĩra atĩ andũ othe, nginya mũrori wa mũthiũrũrũko, nĩ mamenyithio mĩbango ĩyo.

⁴³ Mũrori wa mũthiũrũrũko nĩ aranagĩria na mũtabarĩri wa kĩama gĩa athuri ũhoro wĩgiĩ mĩbango ya mĩcemanio, nginya mĩcemanio ya ũtungata. Mĩcemanio ĩyo ĩbangagwo kũringana na ũrĩa mũrori wa mũthiũrũrũko angiuga kana ũtongoria kuuma wabici ya rũhonge. Andũ othe nĩ mabataraga gũkorũo mamenyithĩtio kabere ũhoro wĩgiĩ mathaa na kũrĩa gũgekĩrũo mĩcemanio ya kĩũngano, ya mapainia, ya athuri na ndungata cia kĩũngano, na ya ũtungata.

⁴⁴ Mũthenya wa Njumaine, mũrori wa mũthiũrũrũko nĩ aroraga kandi cia Rekodi ya Kutaniko ya Mhubiri, rekondi cia mũigana wa andũ arĩa mokaga mĩcemanio, na rekondi cia icigo cia kũhunjia, na cia mathabu. Gwĩka ũguo nĩ kũmũteithagia kũmenya mabataro ma kĩũngano na akahota kũmenya ũrĩa angĩteithĩrĩria arĩa maigaga rekondi icio. Mũtabarĩri wa kĩama gĩa athuri agĩrĩirũo kũbanga ũrĩa mũrori wa mũthiũrũrũko ekwamũkĩra rekondi icio kabere.

⁴⁵ Hĩndĩ ya iceera rĩake, mũrori wa mũthiũrũrũko nĩ ahũthagĩra ihinda kwaria na aarĩ na ariũ a Ithe witũ marĩ mũndũ ũmwe ũmwe o ũrĩa angĩhota, ta hĩndĩ ya mĩcemanio, ũtungata, makĩrĩanĩra, na mahinda-inĩ mangĩ. Makĩria ma ũguo, nĩ acemanagia na athuri na ndungata cia kĩũngano nĩguo arĩrĩrie nao ũtaaro wa Maandĩko, na maũndũ mangĩ ma kũmekĩra ngoro marĩa mekũmateithia kũrĩithia rũũru rũrĩa mehokeirũo. (Thim. 27:23; Atũm. 20:26-32; 1 Tim. 4:11-16) Ningĩ nĩ acemanagia na mapainia nĩguo amekĩre ngoro na ahe o ũmwe wao ũteithio wĩgiĩ mathĩna marĩa mangĩkorũo namo ũtungata-inĩ.

⁴⁶ Kũngĩkorũo na ũndũ ũngĩ ũrabatara kũrorũo, mũrori wa mũthiũrũrũko nĩ ateithagĩrĩria o ũrĩa wothe angĩhota kiumia-inĩ kĩu. Ũngĩaga kũrĩka ihinda-inĩ rĩu, no ateithie athuri kana andũ arĩa mahutĩtio nĩ ũndũ ũcio gwĩka ũthuthuria wĩgiĩ ũtongoria wa Kĩĩmaandĩko ũrĩa mangĩhũthĩra. Wabici ya rũhonge ĩngĩbatara kũmenya harĩa ũndũ ũcio ũkinyĩte, mũrori wa mũthiũrũrũko na athuri nĩ matũmaga riboti ĩrĩ na maũndũ mothe megiĩ ũndũ ũcio.

⁴⁷ Mũrori wa mũthiũrũrũko aceerera kĩũngano, athiaga mĩcemanio ya kĩũngano kĩu. Mĩcemanio ĩyo no ĩcenjie rĩmwe na rĩmwe kũringana na ũtongoria ũrĩa ũheanĩtwo nĩ wabici ya rũhonge. Nĩ aheanaga mĩario ya gwĩkĩra ngoro, kũũmĩrĩria, kũheana ũtaaro, na gwĩkĩra kĩũngano hinya. Nĩ erutanagĩria gũteithia kĩũngano gĩkorũo na wendo harĩ Jehova, Jesu Kristo, na ithondeka rĩa Jehova.

⁴⁸ Muoroto ũmwe wa iceera rĩa mũrori wa mũthiũrũrũko nĩ gwĩkĩra ahunjia ngoro makorũo na kĩyo ũtungata-inĩ na kũmahe maũndũ marĩa mangĩhũthĩra. Ahunjia aingĩ thĩinĩ wa kĩũngano no mahote kwĩbanga nĩguo manyitanĩre biũ ũtungata-inĩ kiumia kĩu, hihi ta gũtuĩka mapainia a gũteithĩrĩria mweri-inĩ ũcio wa iceera. Mũhunjia o wothe ũngĩenda gũthiĩ ũtungata nake kana na mũtumia wake no oige kabere. Nĩ hakoragwo na ũguni mũno gũthiĩ na mũrori wa mũthiũrũrũko kana mũtumia wake gũcokera andũ na kũrĩ arutwo a Bibilia. Kwĩrutanĩria gwaku nĩguo ũnyite mbaru biũ mĩbango ĩyo ya kiumia kĩu gĩa iceera nĩ gũkenagĩrũo mũno.​—Thim. 27:17.

⁴⁹ Mũthiũrũrũko nĩ ũbangagĩrũo igomano igĩrĩ cia mũthiũrũrũko o mwaka. Mũrori wa mũthiũrũrũko nĩwe wĩhokeirũo wĩra wa gũtabania mĩbango ĩgiĩ igomano icio. Nĩ athuuraga mũrori wa kĩgomano na mũteithĩrĩria wa mũrori wa kĩgomano. Magĩrĩirũo kũrutithania wĩra nake kũbanga maũndũ megiĩ kĩgomano. Ũndũ ũcio ũteithagia mũrori wa mũthiũrũrũko ahote kũrũmbũiya makĩria programu ya kĩgomano. Ningĩ mũrori wa mũthiũrũrũko nĩ athuuraga ariũ a Ithe witũ agĩrĩru marũgamĩrĩre honge itiganĩte cia kĩgomano. Ningĩ, thutha wa ihinda nĩ abangaga nĩguo mathabu ma mũthiũrũrũko marorũo kana nĩ mekĩtwo wega. Kĩgomano-inĩ kĩmwe kĩa mũthiũrũrũko harĩ mwaka, mũrũ wa Ithe witũ kuuma wabici ya rũhonge nĩ okaga arĩ mwaria ũrĩa ũceerete. Nĩ ũndũ wa kũraihĩrĩria kana gũkorũo na nyũmba nini cia gwĩkĩrũo kĩgomano, mĩthiũrũrũko ĩmwe nĩ ĩgayanagio icunjĩ cigana ũna, na o gĩcunjĩ gĩgakorũo na kĩgomano kĩa mũthiũrũrũko.

⁵⁰ Mũrori wa mũthiũrũrũko atũmaga riboti yake ya ũtungata o mweri ĩmwe kwa ĩmwe kũrĩ wabici ya rũhonge. Angĩhũthĩra mbeca makĩria harĩ maũndũ ta thabarĩ, irio, gwa gũkoma, na indo ingĩ cia o mũhaka iria arabatara nĩguo ahingie wĩra wake, na kĩũngano kĩrĩa aceereire kĩremwo kũmũcokeria mbeca cia mahũthĩro macio, no atũme mũigana ũcio kũrĩ wabici ya rũhonge. Arori arĩa magendaga nĩ makoragwo na ũũma atĩ mangĩiga maũndũ ma Ũthamaki wa Jehova mbere, nĩ marĩhingagĩrio mabataro mao ma kĩĩmwĩrĩ o ta ũrĩa Jesu eeranĩire. (Luk. 12:31) Ciũngano nĩ ciagĩrĩirũo kuoya na ũritũ mweke wa kũnyita ũgeni athuri acio merutagĩra mũno kũmatungatĩra.​—3 Joh. 5-8.

KAMĨTĨ YA WABICI YA RŨHONGE

⁵¹ Thĩinĩ wa thĩ yothe, o wabici ya rũhonge ya Aira a Jehova ĩkoragwo na athuri atatũ kana makĩria, agima kĩĩroho na mahingĩtie ithimi cia Kĩĩmaandĩko, arĩa matungataga marĩ Kamĩtĩ ya Wabici ya Rũhonge ĩrĩa ĩrũgamagĩrĩra wĩra wa kũhunjia thĩinĩ wa bũrũri kana mabũrũri marĩa marĩ rungu rwayo. Ũmwe wao atungataga arĩ mũtabarĩri wa Kamĩtĩ ya Wabici ya Rũhonge.

⁵² Arĩa matungataga thĩinĩ wa Kamĩtĩ ya Wabici ya Rũhonge marũmbũyagia maũndũ marĩa mahutĩtie ciũngano ciothe iria irĩ rungu rwa wabici ĩyo. Kamĩtĩ ĩyo nĩ ĩrũgamagĩrĩra wĩra wa kũhunjia ũhoro mwega wa Ũthamaki gĩcigo-inĩ kĩrĩa kĩrĩ rungu rwa wabici ĩyo, na ĩgatigĩrĩra atĩ nĩ kwambĩrĩrio ciũngano na mĩthiũrũrũko nĩguo ĩhote kũrũgamĩrĩra wega maũndũ megiĩ ũtungata gĩcigo-inĩ kĩu. Kamĩtĩ ĩyo ningĩ no ĩrũmbũyagia wĩra ũrĩa ũrutagwo nĩ amishonarĩ arĩa makoragwo ũtungata-inĩ wa kũhunjia, mapainia a mwanya, a hĩndĩ ciothe, na a gũteithĩrĩria. Rĩrĩa kũrĩ na igomano, kamĩtĩ ĩyo nĩ ĩbangaga na ĩkagaya wĩra nĩguo ‘maũndũ mothe mekĩkage na mũtaratara o na mũbango mwega.’​—1 Kor. 14:40.

⁵³ Mabũrũri-inĩ mamwe marĩa makoragwo rungu rwa Kamĩtĩ ya Wabici ya Rũhonge ya bũrũri ũngĩ, nĩ kwamũragwo Kamĩtĩ ya Bũrũri. Ũndũ ũcio nĩ ũteithagia wĩra ũrũgamĩrĩrũo na njĩra njega kũrĩa gũtungatagwo nĩ Kamĩtĩ ya Bũrũri. Kamĩtĩ ya Bũrũri ĩroraga maũndũ megiĩ Betheli, ĩkarũmbũiya marũa, riboti na maũndũ mangĩ marĩa maramũkĩrũo, na wĩra wa kũhunjia. Kamĩtĩ ĩyo nĩ ĩrutithanagia wĩra na Kamĩtĩ ya Wabici ya Rũhonge harĩ gũtwarithia maũndũ ma Ũthamaki na mbere.

⁵⁴ Kĩama Kĩrĩa Gĩtongoragia nĩkĩo kĩamũraga arĩa othe matungataga thĩinĩ wa Kamĩtĩ cia Wabici cia Honge na Kamĩtĩ cia Bũrũri.

ARĨA MATŨMAGWO NĨ WABICI NENE YA AIRA A JEHOVA

⁵⁵ Rĩmwe na rĩmwe, Kĩama Kĩrĩa Gĩtongoragia nĩ gĩtũmaga ariũ a Ithe witũ arĩa maragĩrĩra maceerere o wabici ya rũhonge thĩinĩ wa thĩ yothe. Wĩra ũrĩa mũnene wa mũrũ wa Ithe witũ ũrĩa ũngĩkorũo atũmĩtwo nĩ gwĩkĩra ngoro famĩlĩ ya Betheli na gũteithĩrĩria Kamĩtĩ ya Wabici ya Rũhonge ũhoro-inĩ wĩgiĩ mathĩna marĩa mangĩkorũo namo kana ciũria iria mangĩkorũo nacio ciĩgiĩ wĩra wa kũhunjia na gũtua andũ arutwo. Mũrũ wa Ithe witũ ũcio ningĩ nĩ acemanagia na arori amwe a mũthiũrũrũko na rĩmwe na rĩmwe agacemania na amishonarĩ arĩa makoragwo ũtungata-inĩ wa kũhunjia. Hĩndĩ ya mũcemanio ũcio, nĩ aragia nao ũhoro wĩgiĩ mathĩna na mabataro mao, na akamekĩra ngoro nĩ ũndũ wa wĩra wao wa bata mũno wa kũhunjia ũhoro wa Ũthamaki na gũtua andũ arutwo.

⁵⁶ Mũrũ wa Ithe witũ ũcio nĩ endaga mũno kũmenya maũndũ marĩa marahingio ũtungata-inĩ megiĩ kũhunjia ũhoro wa Ũthamaki o hamwe na maũndũ mangĩ megiĩ ciũngano. Mahinda mangĩtĩkĩria no aceerere nginya wabici cia ũtaũri. Rĩrĩa aceerera wabici ya rũhonge, nĩ anyitanagĩra o ũrĩa angĩhota wĩra-inĩ wa kũhunjia ũhoro wa Ũthamaki.

MARĨITHAGIA NA NJĨRA YA WENDO

⁵⁷ Nĩ tũgunĩkaga mũno kuumana na kĩyo na wendo ũrĩa tũrũmbũyagio naguo nĩ arũme agima kĩĩroho. Twathiĩ na mbere kwĩnyihĩria arori arĩa mamũrĩtwo nĩguo marĩithie rũũru, nĩ tũgĩaga na ũrũmwe hamwe na Kristo Jesu, arĩ we Mũtwe wa kĩũngano. (1 Kor. 16:15-18; Ef. 1:22, 23) Tweka ũguo, roho wa Ngai nĩ ũtheremaga kũrĩ ciũngano ciothe thĩinĩ wa thĩ, na Kiugo kĩa Ngai gĩkahota gũtongoria wĩra witũ thĩinĩ wa thĩ yothe.​—Thab. 119:105.