Mĩcemanio Ĩrĩa Ĩtũteithagia ‘Gwĩkĩrana Hinya Ũhoro-inĩ Wĩgiĩ Wendo na Ciĩko Njega’

KWA IHINDA rĩa karine nyingĩ, andũ a Jehova nĩ makoretwo na mũbango wa gũcemanagia. Hĩndĩ ya Isiraeli ya tene, arũme othe nĩ maathiaga Jerusalemu nĩ ũndũ wa ciathĩ iria ithatũ nene. (Gũcok. 16:16) Hĩndĩ ya karine ya mbere Akristiano nĩ maacemanagia mategũtĩrĩria, kaingĩ mĩciĩ-inĩ ya andũ. (Filem. 1, 2) Mahinda-inĩ maya nĩ tũkenagĩra mĩcemanio na igomano. Nĩ kĩĩ gĩtũmaga ndungata cia Jehova icemanie hamwe? Gĩtũmi kĩnene nĩ tondũ nĩ gĩcunjĩ kĩa bata kĩa ũthathaiya witũ.​—Thab. 95:6; Kol. 3:16.

² Ningĩ, arĩa mathiaga mĩcemanio nĩ magunĩkaga. Mahinda-inĩ ma tene, Aisiraeli meerĩtwo mekage ũũ o thutha wa mĩaka mũgwanja hĩndĩ ya Gĩathĩ gĩa Ithũnũ: “Cokanagĩrĩriai andũ, arũme, atumia, ciana, o hamwe na mũndũ wa kũngĩ ũrĩa ũikaraga thĩinĩ wa matũũra manyu, nĩguo magathikĩrĩria na makeruta ũhoro wĩgiĩ Jehova Ngai wanyu na makamwĩtigĩra na magatigĩrĩra atĩ nĩ mahingia ciugo ciothe cia Watho ũyũ.” (Gũcok. 31:12) Kwoguo, gĩtũmi kĩa bata gĩa gũcemania hamwe nĩ ‘kũrutwo nĩ Jehova.’ (Isa. 54:13) Ningĩ mĩcemanio nĩ ĩtũheaga mweke wa kũmenyana, gwĩkĩrũo ngoro, na kũgĩa na hinya nĩ ũndũ wa kũnyitanĩra na arĩa angĩ.

MĨCEMANIO YA KĨŨNGANO

³ Arutwo arĩa maacemanĩtie hamwe thutha wa Pentekoste ya mwaka wa 33 M.M., nĩ maarũmĩrĩire ũrutani wa atũmwo marĩ na kĩyo, na “mũthenya o mũthenya nĩ maathiaga hekarũ-inĩ mategũtĩrĩria marĩ na muoroto o ũmwe.” (Atũm. 2:42, 46) Thutha ũcio, Akristiano macemania nĩ ũndũ wa ũthathaiya, maathomaga maandĩko marĩa maatongoretio nĩ roho hamwe na marũa marĩa atũmwo na arutwo angĩ maandĩkĩte. (1 Kor. 1:1, 2; Kol. 4:16; 1 Thes. 1:1; Jak. 1:1) Ningĩ nĩ maahoyaga hamwe. (Atũm. 4:24-29; 20:36) Rĩmwe na rĩmwe, nĩ gwakoragwo na maũndũ monetwo megiĩ ũtungata wa ũmishonarĩ. (Atũm. 11:5-18; 14:27, 28) Nĩ maaragĩrĩria morutani ma Bibilia na kũhinga kwa morathi marĩa maatongoretio nĩ roho. Nĩ kwaheanagwo motaaro megiĩ mĩthiĩre ĩrĩa yagĩrĩire ya Gĩkristiano na wĩrutĩri Ngai. Andũ othe nĩ meekagĩrũo ngoro makorũo na kĩyo harĩ kũhunjia ũhoro ũrĩa mwega.​—Rom. 10:9, 10; 1 Kor. 11:23-26; 15:58; Ef. 5:1-33.

⁴ Mahinda-inĩ maya, mĩcemanio ya Gĩkristiano ĩkagwo o ta hĩndĩ ya atũmwo. Tũrũmagĩrĩra ũndũ ũyũ ũgwetetwo thĩinĩ wa Ahibirania 10:24, 25: “Nĩ twĩciranagie mũndũ na ũrĩa ũngĩ . . . , tũtegũtiga gũcemanagia hamwe, ta ũrĩa andũ amwe memenyeretie, no twĩkĩranage ngoro, na tũgakĩrĩrĩria gwĩka ũguo o ũrĩa mũrona mũthenya ũcio ũgĩkuhĩrĩria.” Matukũ-inĩ maya maritũ ma mũico, nĩ tũrabatara kuongererũo hinya ũrĩa umanaga na gũcemania hamwe tũtegũtĩrĩria nĩguo tũtũũrie hinya wa kĩĩroho na wĩkindĩru wa Gĩkristiano. (Rom. 1:11, 12) Tũrĩ Akristiano, tũratũũra gatagatĩ-inĩ ka rũciaro ruogomu na rũhĩngĩcanu. Nĩ tũtiganĩte na maũndũ marĩa matakenagia Ngai na merirĩria ma gũkũ thĩ. (Afil. 2:15, 16; Tit. 2:12-14) Nĩ kũ kũngĩ tũngĩenda gũkorũo tiga gatagatĩ-inĩ ka andũ a Jehova? (Thab. 84:10) Na nĩ ũndũ ũrĩkũ ũngĩkorũo na ũguni gũkĩra kwĩruta na kwarĩrĩria Kiugo kĩa Ngai? Ta wĩcirie mĩcemanio ĩtiganĩte ĩrĩa ĩkoragwo ĩbangĩtwo nĩguo tũgunĩke.

MŨCEMANIO WA MŨTHIA-INĨ WA KIUMIA

⁵ Gĩcunjĩ kĩa mbere kĩa mũcemanio wa mũthia-inĩ wa kiumia gĩkoragwo na mĩario ya Bibilia ĩrĩa ĩkoragwo ĩhaarĩirio nĩ ũndũ wa andũ othe nginya arĩa mangĩkorũo mokĩte mũcemanio riita rĩa mbere. Mĩario ĩyo ya andũ othe nĩ ĩkoragwo na itemi rĩa bata harĩ kũhingia mabataro ma kĩĩroho ma andũ arĩa erũ o hamwe na ahunjia thĩinĩ wa kĩũngano.​—Atũm. 18:4; 19:9, 10.

⁶ Jesu Kristo, atũmwo ake, na arĩa maanyitanagĩra nao nĩ maakoragwo na mĩcemanio ya andũ othe ta ĩrĩa ĩkagwo thĩinĩ wa ciũngano cia andũ a Jehova ũmũthĩ. Hatarĩ nganja, Jesu nĩwe warĩ mwaria ũrĩa mwega biũ wanakorũo kuo thĩinĩ wa thĩ. Kwoigirũo ũũ igũrũ rĩake: “Gũtirĩ mũndũ ũrĩ waria take.” (Joh. 7:46) Jesu aaragia arĩ na wathani, nginya athikĩrĩria ake makagega. (Mat. 7:28, 29) Arĩa mooyaga ndũmĩrĩri yake na ũritũ nĩ maagunĩkaga mũno. (Mat. 13:16, 17) Atũmwo nĩ maarũmĩrĩire kĩonereria gĩake. Thĩinĩ wa Atũmwo 2:14-36, nĩ tũthomaga mĩario ya Petero ĩrĩa yahutirie andũ ngoro mũno hĩndĩ ya Pentekoste ya mwaka wa 33 M.M. Andũ aingĩ nĩ mooire ikinya nĩ ũndũ wa maũndũ marĩa maaiguire. Thutha ũcio, andũ amwe arĩa maathikĩrĩirie mĩario ya Paulo thĩinĩ wa Athene nĩ maatuĩkire etĩkia.​—Atũm. 17:22-34.

⁷ O na mahinda-inĩ maya, andũ milioni nyingĩ nĩ magunĩkĩte nĩ mĩario ya andũ othe ĩrĩa ĩrutagwo o kiumia ciũngano-inĩ, hamwe na mĩario ya andũ othe ĩrĩa ĩrutagwo igomano-inĩ. Mĩario ta ĩyo nĩ ĩtũririkanagia morutani ma Gĩkristiano na ĩgatũteithia gũthiĩ na mbere na wĩra wa Ũthamaki. Hĩndĩ ĩrĩa twanyita ũgeni andũ arĩa makenagio nĩ ndũmĩrĩri itũ o na arĩa angĩ moke mĩcemanio-inĩ itũ, no tũmateithie kũmenya morutani ma mũthingi ma Bibilia.

⁸ Nĩ kwaragĩrĩrio maũndũ matiganĩte thĩinĩ wa mĩario ya andũ othe. Maũndũ macio nĩ ta morutani ma Bibilia na ũrathi, motaaro ma Kĩĩmaandĩko megiĩ famĩlĩ na kĩhiko, maũndũ marahutia andũ ethĩ, na mĩthiĩre ya Gĩkristiano. Mĩario ĩmwe nĩ yaragĩrĩria magegania ma ũũmbi wa Jehova. Ĩngĩ nayo nĩ yaragĩrĩria wĩtĩkio, ũmĩrĩru, na wĩkindĩru wa andũ magwetetwo thĩinĩ wa Bibilia, na tũkonio ũrĩa tũngĩĩruta kuuma kũrĩ o.

⁹ Nĩguo tũgunĩke biũ nĩ mĩario ya andũ othe, twagĩrĩirũo gũthikĩrĩria na kinyi, tũhumbũrie maandĩko marĩa magwetwo nĩ mwaria, na tũtwarane nake akĩmathoma na akĩmataarĩria. (Luk. 8:18) Twathuthuria maũndũ marĩa mararĩrĩrio nĩ tũrĩĩrutanagĩria biũ kũrũmia maũndũ marĩa tweruta na kũmahũthĩra.​—1 Thes. 5:21.

¹⁰ Kũngĩkorũo na aria a kũigana, kĩũngano nĩ kĩrĩkoragwo na mĩario ya andũ othe o kiumia. Nĩguo ũndũ ũcio ũhoteke, kaingĩ aria a kuuma ciũngano-inĩ iria irĩ hakuhĩ nĩ manyitagwo ũgeni kũruta mĩario. Kũngĩkorũo gũtarĩ na aria a kũigana, mĩario ĩyo yagĩrĩire kũrutwo rĩrĩa rĩothe kwahoteka.

¹¹ Gĩcunjĩ gĩa kerĩ kĩa mũcemanio wa mũthia-inĩ wa kiumia nĩ Wĩruti wa Mũrangĩri ũrĩa ũkoragwo ũrĩ ciũria na macokio kuuma icunjĩ-inĩ iria ikoragwo ngathĩti-inĩ ya wĩruti ya Mũrangĩri. Kũgerera ngathĩti ĩyo, Jehova nĩ atũheaga irio cia kĩĩroho ihinda rĩrĩa rĩagĩrĩire.

¹² Kaingĩ icunjĩ cia wĩruti ciaragĩrĩria ũrĩa tũngĩhũthĩra motaaro ma Bibilia ũtũũro-inĩ wa o mũthenya. Icunjĩ icio nĩ ciĩkĩraga Akristiano hinya nĩguo mahote kũregana na “roho wa gũkũ thĩ” na mĩtugo ĩtarĩ mĩtheru. (1 Kor. 2:12) Ningĩ kũgerera Mũrangĩri nĩ tũteithagio gũtaũkĩrũo makĩria nĩ morutani ma Bibilia na ũrathi, ũndũ ũrĩa ũtũteithagia gũtwarana na ũhoro wa ma na gũtũũra njĩra-inĩ ya andũ arĩa athingu. (Thab. 97:11; Thim. 4:18) Gũkorũo kuo hĩndĩ ya Wĩruti wa Mũrangĩri na kũnyitanĩra na njĩra ya kũruta macokio no gũtũteithie tũkenere mũno kĩĩrĩgĩrĩro gĩa thĩ njerũ ĩrĩa ĩgaakorũo na ũthingu. (Rom. 12:12; 2 Pet. 3:13) Kũnyitanĩra hamwe na Akristiano arĩa angĩ nĩ gũtũteithagia gũkũria maciaro ma roho na gũgekĩra hinya wendi witũ wa gũtungatĩra Jehova na kĩyo. (Gal. 5:22, 23) Nĩ twĩkĩragwo hinya nĩguo tũhote gũkirĩrĩria magerio na twake “mũthingi mwega wa mahinda marĩa maroka,” nĩgetha ‘tũrũmie biũ muoyo ũrĩa wa ma.’​—1 Tim. 6:19; 1 Pet. 1:6, 7.

¹³ Tũngĩka atĩa nĩguo tũgunĩke biũ nĩ wĩruti ũcio? Twagĩrĩirũo kũhaarĩria gĩcunjĩ kabere tũrĩ mũndũ ũmwe ũmwe kana tũrĩ famĩlĩ, tũthome maandĩko marĩa monanĩtio, na hĩndĩ ya mũcemanio tũrute macokio tũkĩhũthĩra ciugo citũ. Ũndũ ũcio nĩ ũgũtũma ũhoro wa ma ũrikĩre ngoro-inĩ citũ, na andũ arĩa angĩ nĩ mekũgunĩka mathikĩrĩria tũgĩtaarĩria wĩtĩkio witũ. Twathikĩrĩria na kinyi macokio ma andũ arĩa angĩ nĩ tũrĩgunĩkaga nĩ wĩruti ũcio o kiumia.

MŨCEMANIO WA GATAGATĨ-INĨ GA KIUMIA

¹⁴ Kĩũngano nĩ gĩcemanagia o kiumia thĩinĩ wa Nyũmba ya Ũthamaki nĩ ũndũ wa mũcemanio wa Ũtũũro na Ũtungata Witũ wa Gĩkristiano. Mũcemanio ũcio ũkoragwo na icunjĩ ithatũ iria ikoragwo ihaarĩrĩirio gũtũteithia gũkorũo tũrĩ “agĩrĩru biũ” tũrĩ ndungata cia Ngai. (2 Kor. 3:5, 6) Mũtaratara na ũhoro ũrĩa ũkwarĩrĩrio nĩ ũheanagwo thĩinĩ wa Kabuku ka Mũcemanio wa Ũtũũro na Ũtungata Witũ wa Gĩkristiano ka o mweri. Ningĩ kabuku kau nĩ gakoragwo na tũcunjĩ twa maũndũ marĩa tũngĩhũthĩra ũtungata-inĩ.

¹⁵ Gĩcunjĩ kĩa mbere kĩa mũcemanio ũcio kĩrĩa gĩtagwo Mũthithũ Kuuma Kiugo-inĩ kĩa Ngai, gĩtũteithagia kũmenya ũhoro wĩgiĩ maũndũ marĩa marĩ thĩinĩ wa Bibilia na tũkeruta ũrĩa tũngĩmahũthĩra. Gĩcunjĩ kĩu gĩkoragwo na mĩario, ũthomi wa Bibilia, na ndeereti kuuma ũthomi-inĩ wa Bibilia wa kiumia kĩu. Ningĩ Kabuku ka Mũcemanio wa Ũtũũro na Ũtungata nĩ gakoragwo na indo ta mbica, na handũ ũngĩandĩka macokio megiĩ maũndũ macio. Kwĩruta Bibilia na njĩra ndikĩru ũguo nĩ gũtũgunaga ũtũũro-inĩ na harĩ njĩra citũ cia kũrutana nĩguo ‘tũkoragwo tũrĩ agĩrĩru kũna, tũhaarĩirio biũ nĩ ũndũ wa wĩra wothe mwega.’​—2 Tim. 3:16, 17.

¹⁶ Gĩcunjĩ gĩa kerĩ kĩa mũcemanio ũcio gĩtagwo Wĩrutanĩrie Biũ Ũtungata-inĩ, na kĩhaarĩrĩirio nĩguo andũ othe magĩe na mweke wa kwĩmenyeria nĩ ũndũ wa ũtungata, na magagĩrie ũhoti wao wa kũhunjia na kũrutana. Makĩria ma tũcunjĩ twa arutwo, nĩ gũkoragwo na video ciĩgiĩ gũteereta na mũndũ ũtungata-inĩ. Gĩcunjĩ gĩkĩ kĩa mũcemanio nĩ gĩtũteithagia kũgĩa na “rũrĩmĩ rwa arĩa marutĩtwo maũndũ,” nĩgetha ‘tũmenyage ũrĩa tũbatiĩ gũcokeria ũrĩa mũnogu na kiugo kĩrĩa kĩagĩrĩire.’​—Isa. 50:4.

¹⁷ Gĩcunjĩ gĩa gatatũ, kĩa Ũtũũro wa Gĩkristiano, gĩtũteithagia kuona ũrĩa tũngĩhũthĩra motaaro ma Bibilia ũtũũro-inĩ witũ. (Thab. 119:105) Ũndũ ũmwe ũkoragwo thĩinĩ wa gĩcunjĩ kĩu nĩ Wĩruti wa Bibilia wa Kĩũngano. Wĩruti wa Bibilia wa Kĩũngano ũkoragwo ũrĩ wa ciũria na macokio, ta ũrĩa Wĩruti wa Mũrangĩri wĩkagwo.

¹⁸ O mweri thutha wa kwamũkĩra Kabuku ka Mũcemanio wa Ũtũũro na Ũtungata, mũtabarĩri wa kĩama gĩa athuri kana mũthuri ũngĩ ũrĩa ũramũteithĩrĩria nĩ aroraga na kinyi maũndũ marĩa marĩ ho agacoka agathondeka mũtaratara. O kiumia, mũthuri wa kĩũngano ũkoragwo na ũhoti wa kũrutana na ũthuurĩtwo nĩ kĩama gĩa athuri, nĩ arĩkoragwo arĩ mũikarĩri gĩtĩ. Mawĩra make nĩ hamwe na gũtigĩrĩra atĩ mũcemanio wambĩrĩria na warĩka ihinda rĩrĩa rĩagĩrĩire, na kũgaathĩrĩria arĩa marĩ na icunjĩ cia arutwo o na kũmahe ũtaaro.

¹⁹ Tũngĩĩhaaragĩria, tũgathiĩ, na tũkanyitanĩra thĩinĩ wa Mũcemanio wa Ũtũũro na Ũtungata tũtegũtĩrĩria, nĩ tũrĩgĩaga na ũmenyo wa Maandĩko, tũgataũkĩrũo nĩ motaaro ma Bibilia, tũgakorũo na ũmĩrĩru wa kũhunjia ũhoro ũrĩa mwega, na tũgakũria ũhoti wa gũtua andũ arutwo. Arĩa mokaga mũcemanio-inĩ ũcio no ti Aira a Jehova abatithie o nao nĩ magunĩkaga nĩ kũnyitanĩra hamwe na ithuĩ na ndeereti cia gwaka kĩĩroho iria ciaragĩrĩrio. Nĩguo twĩhaarĩrie nĩ ũndũ wa mũcemanio ũcio, no tũhũthĩre Watchtower Library, JW Library^®, Ũthuthuria INTANETI-INĨ^™ (angĩkorũo nĩ kũrĩ na rũthiomi rũrĩa ũhũthagĩra), Ũteithio wa Ũthuthuria Harĩ Aira a Jehova, na library ĩrĩa ĩkoragwo thĩinĩ wa Nyũmba ya Ũthamaki. Thĩinĩ wa library ĩyo nĩ gũkoragwo na mabuku marĩa maroneka ma Aira a Jehova, Fahirisi kana Ũteithio wa Ũthuthuria Harĩ Aira a Jehova, Bibilia cia mĩthemba ĩtiganĩte, concordance, ibuku rĩa gũtaarĩria ciugo (dictionary), na mabuku mangĩ mangĩtũteithia. Mabuku macio no mahũthĩrũo nĩ mũndũ o wothe mbere kana thutha wa mĩcemanio.

MĨCEMANIO YA ŨTUNGATA

²⁰ Ikundi cia ahunjia nĩ icemanagia mahinda matiganĩte nĩguo ciĩke mũcemanio mũkuhĩ wa ũtungata gatagatĩ-inĩ na mũthia-inĩ wa kiumia. Mĩcemanio ĩyo kaingĩ ĩkagĩrũo mĩciĩ-inĩ ya andũ kana handũ hangĩ hagĩrĩire. Ningĩ no ĩkĩrũo Nyũmba-inĩ ya Ũthamaki. Kũbanga ikundi nini cia ahunjia icemanie kũndũ gũtiganĩte nĩ gũtũmaga ũkorũo ũrĩ ũndũ mũhũthũ harĩ ahunjia gũkinya mũcemanio-inĩ ũcio o hamwe na kũrĩa kũrahunjio. Ũndũ ũcio nĩ ũteithagia kũbanga ahunjia na ihenya na magathiĩ kũrĩa kũrahunjio mategũte mahinda. Ningĩ mũrori wa gĩkundi nĩ ekũhota gũteithia wega arĩa marĩ gĩkundi-inĩ gĩake. O na gũtuĩka nĩ wega o gĩkundi gĩcemanie kũndũ gũtiganĩte, nĩ kũrĩ hĩndĩ ikundi cigana ũna ingĩbatara gũcemania hamwe. Kwa ngerekano, angĩkorũo gũtikoragwo na ahunjia aingĩ mathiaga ũtungata gatagatĩ-inĩ ga kiumia, nĩ wega kũnyitithania ikundi kana kũbanga andũ othe macemanie Nyũmba-inĩ ya Ũthamaki kana handũ hangĩ hagĩrĩire. Gwĩka ũguo nĩ gũgũteithia o mũhunjia agĩe na mũndũ wa kũhunjia nake. Ningĩ kĩũngano no kĩone arĩ wega gũcemania Nyũmba-inĩ ya Ũthamaki hĩndĩ ya thigũkũ. O na ningĩ kĩũngano no gĩke mũcemanio wa ũtungata kĩrĩ hamwe thutha wa Wĩruti wa Mũrangĩri.

²¹ Hĩndĩ ĩrĩa gĩkundi gĩacemania kĩrĩ giki, mũrori wa gĩkundi kĩu nĩwe ũtongoragia mũcemanio wa ũtungata. Rĩmwe na rĩmwe, mũrori wa gĩkundi no ere mũteithĩrĩria wake kana mũrũ wa Ithe witũ ũngĩ wagĩrĩire atongorie mũcemanio ũcio. Ũrĩa ũratongoria agĩrĩirũo gũkorũo ehaarĩirie kwarĩrĩria ũndũ ũkũmateithia na mangĩhũthĩra ũtungata-inĩ. Thutha ũcio mĩbango ĩgiĩ kũhunjia ĩkabangwo, na ũmwe wao akahoithia. Magacoka magathiĩ ũtungata mategũte mahinda. Mĩcemanio ĩyo yagĩrĩire gũkorũo ĩrĩ ya ndagĩka ithano nginya mũgwanja, no angĩkorũo ĩgwĩkwo thutha wa mũcemanio wa kĩũngano yagĩrĩire kũhũthĩra ndagĩka nini gũkĩra icio. Ningĩ yagĩrĩire gũkorũo ĩrĩ ya gwĩkĩra ngoro, ĩheane motaaro mangĩhũthĩka, na ĩteithie arĩa marathiĩ kũhunjia. Arĩa erũ kana angĩ mangĩbatara ũteithio no magaywo hamwe na ahunjia marĩ na ũmenyeru nĩguo mamateithĩrĩrie.

MĨBANGO YA MĨCEMANIO CIŨNGANO-INĨ NJERŨ KANA IRIA NINI

²² O ũrĩa andũ aingĩ maratuĩka arutwo, noguo ciũngano irongerereka. Mũrori wa mũthiũrũrũko nĩwe ũiyũragia fomu ya kũhoya kwambĩrĩrio kĩũngano kĩerũ. No rĩmwe na rĩmwe, ikundi iria itarĩ nene no cione arĩ wega makĩria kũnyitanĩra na kĩũngano kĩrĩa kĩrĩ hakuhĩ.

²³ Rĩmwe ciũngano iria nini no ikorũo na aarĩ a Ithe witũ atheri. Hĩndĩ ta ĩyo, mwarĩ wa Ithe witũ ũrĩa ũkũhoithia kĩũngano-inĩ kana atongorie mĩcemanio agĩrĩirũo kwĩhumbĩra mũtwe o ta ũrĩa Maandĩko monanagia. (1 Kor. 11:3-16) Kaingĩ agĩrĩirũo gũkorũo aikarĩte thĩ arorete athikĩrĩria. Aarĩ a Ithe witũ matiagĩrĩirũo kũruta mĩario mĩcemanio-inĩ. Ithenya rĩa ũguo, magĩrĩirũo gũthoma ũhoro ũrĩa maheetwo nĩ ithondeka na maũtaarĩrie, kana warĩrĩrio nĩ aarĩ a Ithe witũ erĩ hihi na njĩra ya ndeereti kana ya kĩonereria. Wabici ya rũhonge nĩ ĩthuuraga mwarĩ wa Ithe witũ ũmwe wa kũmĩteithagia kwaranĩria na kĩũngano na akarũmbũiya ũhoro wĩgiĩ mĩcemanio. Thutha wa ihinda kũngĩgĩa ariũ a Ithe witũ magĩrĩire, nĩo marĩrutaga wĩra ũcio.

IGOMANO CIA MŨTHIŨRŨRŨKO

²⁴ O mwaka ciũngano iria irĩ thĩinĩ wa mũthiũrũrũko ũmwe nĩ ikoragwo na igomano igĩrĩ cia mũthenya ũmwe cia mũthiũrũrũko. Mahinda-inĩ macio ma gĩkeno, andũ othe nĩ magĩaga na mweke wa ‘kũhingũra ngoro ciao biũ’ makĩnyitanĩra na Akristiano arĩa angĩ. (2 Kor. 6:11-13) Nĩguo ithondeka rĩa Jehova rĩhingie bata mũna, nĩ rĩhaaragĩria ciongo cia Kĩĩmandĩko cia igomano na tũcunjĩ tũtiganĩte twa igomano icio. Ũhoro ũheanagwo na njĩra ya mĩario, cionereria, na kũhoyanwo ũhoro. Ũhoro ta ũcio wa ihinda rĩrĩa rĩagĩrĩire nĩ ũgunaga arĩa othe mokĩte. Ningĩ hĩndĩ ya igomano icio, arutwo erũ nĩ mabatithagio nĩguo monanie wĩyamũrĩri wao harĩ Jehova.

IGOMANO CIA THIKŨ ITHATŨ

²⁵ Igomano nene nĩ ciĩkagwo riita rĩmwe o mwaka. Kaingĩ ikoragwo irĩ cia thikũ ithatũ na ciũkagwo nĩ ciũngano cia mĩthiũrũrũko ĩigana ũna. Wabici cia honge iria itakoragwo na ciũngano nyingĩ rungu rwacio, no ibange ciũngano ciothe igomane handũ hamwe. Thĩinĩ wa mabũrũri mamwe, mĩbango ya igomano icio no ĩkorũo ĩtiganĩte kũringana na maũndũ ma kũu kana nĩ ũndũ wa ũtongoria ũrĩa ũheanĩtwo nĩ ithondeka. Rĩmwe na rĩmwe, igomano cia kĩĩmabũrũri na cia mwanya nĩ ciĩkagwo mabũrũri-inĩ mamwe na no ikorũo na Aira a Jehova ngiri nyingĩ kuuma mabũrũri matiganĩte. Kwa ihinda rĩa mĩaka mĩingĩ, andũ aingĩ nĩ merutĩte ũhoro mwega wa Ũthamaki nĩ ũndũ wa kũigua ũhoro wĩgiĩ igomano icio nene cia Aira a Jehova.

²⁶ Igomano cia thikũ ithatũ ikoragwo irĩ mahinda ma gĩkeno ma kũnyitanĩra ũthathaiya-inĩ harĩ arĩa meyamũrĩire Jehova. Nĩ ihũthagĩrũo gũtaarĩria ũtaũku mwerũ. Thĩinĩ wa igomano imwe cia thikũ ithatũ, indo njerũ nĩ irutagwo cia kũhũthĩrũo hĩndĩ ya wĩruti wa mũndũ kĩũmbe kana wa kĩũngano kana cia kũhũthĩrũo ũtungata-inĩ. Ningĩ nĩ kũbatithanagio. Igomano icio nĩ cia bata mũno harĩ gũteithia andũ makũre kĩĩroho. Nĩ irutaga ũira atĩ andũ a Jehova nĩ famĩlĩ ya thĩ yothe ya Akristiano meyamũrĩire Jehova arĩa makoragwo na rũũri rũrĩa rũmenyithanagia arutwo a Jesu Kristo.​—Joh. 13:35.

²⁷ Hĩndĩ ĩrĩa twathiĩ mĩcemanio ya kĩũngano na igomano cia andũ a Jehova, nĩ twĩkagĩrũo hinya gwĩka wendi wa Jehova. Ningĩ nĩ tũgitagĩrũo kuumana na maũndũ ma gũkũ thĩ marĩa mangĩthũkia wĩtĩkio witũ. Mĩcemanio ĩyo na igomano nĩ igoocithagia Jehova. (Thab. 35:18; Thim. 14:28) Nĩ twagĩrĩirũo gũcokagĩria Jehova ngatho mũno nĩ ũndũ wa gũtũhaarĩrĩria mahinda macio ma gũtwaka kĩĩroho ihinda-inĩ rĩrĩ rĩa mũthia.

IRIO CIA HWAĨ-INĨ CIA MWATHANI

²⁸ Riita rĩmwe o mwaka hĩndĩ ya kũririkana gĩkuũ kĩa Jesu Kristo, ciũngano cia Aira a Jehova thĩinĩ wa thĩ yothe nĩ ikũngũyagĩra Kĩririkano gĩa gĩkuũ kĩa Jesu, kana Irio cia Hwaĩ-inĩ cia Mwathani. (1 Kor. 11:20, 23, 24) Harĩ mwaka, ũcio nĩguo ũkoragwo ũrĩ mũcemanio ũrĩa wa bata mũno harĩ andũ a Jehova. Jesu nĩ aatwathire tũririkanage gĩkuũ gĩake.​—Luk. 22:19.

²⁹ Tarĩki cia Kĩririkano gĩa gĩkuũ kĩa Jesu iringanaga na cia rĩrĩa Pasaka yekagwo ta ũrĩa Maandĩko monanagia. (Tham. 12:2, 6; Mat. 26:17, 20, 26) Pasaka yarĩ gĩkũngũĩro gĩekagwo o mwaka nĩ Aisiraeli makĩririkana rĩrĩa maakũũrirũo kuuma Misiri mwaka-inĩ wa 1513 M.M.M. Hĩndĩ ĩyo Jehova aathuurire mũthenya wa 14 wa mweri wa mbere arĩ guo mangĩarĩire kagondu ka Pasaka na moime ũkombo-inĩ Misiri. (Tham. 12:1-51) Tarĩki cia Kĩririkano imenyekaga na njĩra ya gũtara thikũ 13 kuuma mweri woneka Jerusalemu ihinda inini thutha wa kiumia kĩa mbere kĩa mweri wa Machi, rĩrĩa mweri woneka riita rĩa mbere ũrĩ wothe.

³⁰ Ciugo cia Jesu thĩinĩ wa Mathayo 26:26-28 nĩ cionanĩtie ũrĩa Kĩririkano kĩbatiĩ gwĩkwo. Hĩndĩ ya Kĩririkano, nĩ gũkoragwo na mũgate na ndibei, na arĩa magaathiĩ gwathana na Jesu Kristo Ũthamaki-inĩ wa igũrũ no o tu marĩaga mũgate na makanyua ndibei. (Luk. 22:28-30) Akristiano arĩa angĩ hamwe na andũ angĩ arĩa makoragwo manyitĩtwo ũgeni nĩ magĩrĩire gũkorũo kuo hĩndĩ ya Irio cia Hwaĩ-inĩ cia Mwathani o na gũtuĩka matirĩaga mũgate kana makanyua ndibei. Rĩrĩa mathiĩ Kĩririkano monanagia ngatho ciao harĩ Jehova nĩ ũndũ wa kũruta Mũriũ wake Jesu Kristo nĩguo andũ othe magunĩke. Mbere ya Kĩririkano, nĩ kũrutagwo mĩario ya mwanya ĩrĩa ĩkoragwo na muoroto wa gwĩkĩra andũ ngoro mende gũka Kĩririkano na merute Bibilia.

³¹ Aira a Jehova nĩ matanyaga marĩ na gĩkeno mahinda ta macio ma gũkorũo hamwe mĩcemanio-inĩ, kũrĩa tũgĩaga mĩeke ya ‘gwĩciranagia mũndũ na ũrĩa ũngĩ nĩguo twĩkĩranage hinya ũhoro-inĩ wĩgiĩ wendo na ciĩko njega.’ (Ahib. 10:24) Ngombo ĩrĩa njĩhokeku na njũgĩ nĩ ĩtigagĩrĩra atĩ tũrĩ na mĩcemanio ĩratũhingĩria mabataro maitũ ma kĩĩroho. Ndungata ciothe cia Jehova hamwe na arĩa makenagio nĩ ũhoro wa ma nĩ mekagĩrũo ngoro matigĩrĩre atĩ nĩ mathiĩ mĩcemanio-inĩ ĩyo mategũtĩrĩria nĩgetha magunĩke. Ndungata cia Jehova cionania kuuma ngoro atĩ nĩ irakenera maũndũ marĩa Jehova aciheaga kũgerera ithondeka rĩake, nĩ ikoragwo na ũrũmwe. Makĩria ma ũguo, nĩ tũgoocithagia Jehova.​—Thab. 111:1.