KĨŨRIA GĨA 6
Ingĩhota Atĩa Kũregana na Hatĩka cia Riika?
ŨRĨA ŨNGĨKA
Ta wĩcirie ũndũ ũyũ: Brian akaiyũrũo nĩ maĩ nda ona arutwo erĩ mathomaga nao magĩũka kũrĩ we. Maita merĩ kiumia-inĩ gĩkĩ nĩ mageretie kũmũtindĩkĩrĩria agucie thigara. Rĩrĩ rĩgũkorũo rĩrĩ riita rĩa gatatũ.
Kĩmwana kĩa mbere gĩkoiga:
“Ũrĩ o wiki rĩngĩ? Reke ngũhe kĩndũ.”
Agaikia guoko mũhuko na akaruta kĩndũ ahe Brian.
Brian ona nĩ thigara araneo, akamaka.
Brian akoiga: “Na githĩ ndiramwĩrĩte atĩ ndinyuaga . . .”
Kĩmwana gĩa kerĩ gĩkamwĩra: “Tiga guoya!”
Brian akoiga: “Ndirĩ na guoya!”
Kĩmwana gĩa kerĩ gĩkaigĩrĩra Brian guoko kĩande-inĩ gĩkamwĩra: “Gucia o rĩmwe tu.”
Kĩmwana kĩa mbere gĩgakuhĩrĩria thigara ĩyo ũthiũ-inĩ wa Brian na gĩkamwĩra na mĩhehũ: “Gũtirĩ mũndũ ũkũmenya.”
Ũngĩka atĩa korũo nĩwe Brian?
TA WĨCIRIE
Hihi imwana icio mathomaga na Brian nĩ ciĩcirĩtie ũrĩa ireka? Hihi nĩcio cietuĩrĩire itua rĩa kũnyuaga thigara? Kwahoteka maatindĩkĩrĩirio gwĩka ũguo nĩ andũ angĩ. Tondũ nĩ marenda gwĩtĩkĩrĩka nĩ arĩa angĩ nĩkĩo maramarũmĩrĩra.
Ũngĩcemania na ũndũ ta ũcio-rĩ, ũngĩka atĩa nĩguo ndũgetĩkĩre kũhatĩkwo nĩ riika?
WĨHAARĨRIE
Bibilia yugaga ũũ: “Mũndũ mũbarĩrĩri [mũũgĩ] onaga gũkĩgĩa ũũru, akehitha, no arĩa matarĩ ogĩ mathiagĩrĩra o na mbere, magakĩya kũhera.”—Thimo 22:3.
Kaingĩ no wone ũgwati ũgĩũka. Kwa ngerekano, ta tua nĩ wona gĩkundi kĩa arutwo mũthomaga nao marĩ mbere yaku na nĩ maranyua thigara. Ũngĩciria thĩna ũrĩa ũngiumĩra no wĩhaarĩrie ũrĩa ũgwĩka.
WĨCIRIE
Bibilia yugaga ũũ: “Tũũriai thamiri njega.”—1 Petero 3:16.
Wĩyũrie ũũ: ‘Ndarũmĩrĩra andũ-rĩ, gũgũcoka gũthiĩ atĩa thutha-inĩ?’ Nĩ ma, no ũkenere gwĩtĩkĩrĩka nĩ arĩa angĩ, no ũndũ ũcio no wa ihinda inini tu. No hihi ũkũigua atĩa thutha-inĩ? Nĩ ũgwĩtĩkĩra kwaga kũrũgama na maũndũ marĩa wĩtĩkĩtie nĩ ma ma nĩguo ũkenie arĩa mũthomaga nao?—Thama 23:2.
TUA ITUA
Bibilia yugaga ũũ: “Mũndũ ũrĩa mũũgĩ nĩ gwĩtigĩra etigagĩra.”—Thimo 14:16.
Nĩ tũrĩbataraga gũtua matua na nĩ marĩhutagia mũtũũrĩre witũ. Bibilia nĩ yaragia ũhoro wa andũ maatuire matua mega ũtũũro-inĩ wao ta Jusufu, Ayubu na Jesu. Ningĩ nĩ yaragia ũhoro wa andũ ta Kaini, Esau na Judasi arĩa maatuire matua moru. We ũgũtua matua mahaana atĩa?
Bibilia yugaga ũũ: ‘Thingataga wĩhokeku.’ (Thaburi 37:3) Angĩkorũo nĩ wĩcũranĩtie igũrũ rĩgiĩ moimĩrĩro na ũgatua itua, gũtaarĩria mũrũgamo waku no gũkorũo kũrĩ ũndũ mũhũthũ na gũkũrehere moimĩrĩro mega.
Ndũkamake tondũ to nginya wĩre andũ a riika rĩaku maũndũ maingĩ. Kuuga ACA nĩ kũiganu. Kana ũgĩtarĩria mũrũgamo waku wega no uuge ũũ:
“Niĩ ndirĩ wa ho!”
“Ndiĩkaga maũndũ ta macio!”
“Haiya, kaĩ o na inyuĩ mwĩkaga ũguo?”
Ũndũ ũrĩa wa bata nĩ kũrũgama na maũndũ marĩa ũĩ nĩ ma ma. Ũngĩka ũguo, no ũmake nĩ kuona ũrĩa mangĩtigana nawe na ihenya.
ŨRĨA ŨNGĨKA ŨNGĨNYŨRŨRIO
Ũngĩtĩkagĩra kũhatĩkagwo nĩ riika rĩaku, ũrĩkaga maũndũ marĩa marenda wĩke
Ĩ andũ a riika rĩaku mangĩkũnyũrũria? Ĩ mangĩkũria, “Nĩ kĩĩ kĩũru, kaĩ wĩ kĩguoya atĩa?” Ĩrĩgĩrĩra kũnyũrũrio na njĩra ta ĩyo. Ũngĩcokia atĩa? No ũhũthĩre njĩra ta ici.
No wĩtĩkanie na ũcio ũrakũnyũrũria. (“Nĩ ma ndĩ guoya.” Ũcoke ũtaarĩrie gĩtũmi gĩaku.)
No ũregane na ũguo arakwĩra. Ũgwete gĩtũmi gĩaku gĩa kũrega, ũcoke ũgwete ũndũ ũrĩa acio marakũhatĩka mangĩrĩgĩrĩrũo makorũo moĩ. (“Ngwĩciragia nĩ mũĩ mathĩna ma kũnyua thigara.”)
Mangĩthiĩ na mbere gũkũnyũrũria, meherere. Menya atĩ o ũrĩa ũgũikara harĩ o mũno noguo megũthiĩ na mbere gũgũtindĩkĩrĩria. Kũmeherera gũkuonania atĩ ndũngĩmetĩkĩria makũgarũre.
Ma nĩ atĩ ndũngĩĩthema hatĩka cia riika. No no ũhote gũtua itua rĩaku, na ũrũgame na mũrũgamo waku. Itua nĩ rĩaku.—Joshua 24:15.