Ngai nĩ Oombire Mũthuri na Mũtumia wa Mbere

Jehova nĩ aahaarĩirie mũgũnda mũthaka wetagwo Edeni. Mũgũnda ũcio waiyũrĩte mahũa, mĩtĩ, na nyamũ. Thutha ũcio Ngai akĩũmba mũndũ wa mbere ũrĩa wetagwo Adamu kuuma rũkũngũ-inĩ, agĩcoka akĩmũhuhĩrĩria mĩhũmũ maniũrũ-inĩ make. Hihi nĩ ũĩ gwathiire atĩa? Adamu aatuĩkire mũndũ wĩ muoyo. Jehova nĩ aamũheire wĩra wa kũmenyerera mũgũnda ũcio na akĩmwĩra ahe nyamũ ciothe marĩĩtwa.

Jehova nĩ aaheire Adamu watho wa bata mũno. Aamwĩrire ũũ: ‘No ũrĩe matunda ma mũtĩ o wothe tiga o ũmwe tu. Hĩndĩ ĩrĩa ũkaarĩa matunda ma mũtĩ ũcio, no ũgaakua.’

Thutha ũcio Jehova akiuga: ‘Nĩ ngũũmbĩra Adamu mũteithia.’ Aatũmire Adamu akome toro mũnene, agĩcoka akĩmũruta rũbaru rũmwe na akĩrũhũthĩra kũmũũmbĩra mũtumia wetagwo Hawa. Adamu na Hawa nĩo maarĩ famĩlĩ ya mbere. Adamu aaiguire atĩa nĩ ũndũ wa kũũmbĩrũo mũtumia? Aakenire mũno nginya akiuga ũũ: ‘Ta rora kĩrĩa Jehova athondeka kuuma rũbaru-inĩ rwakwa! Ũyũ ahaana o ta niĩ.’

Jehova eerire Adamu na Hawa maciarane na maiyũrie thĩ. Eendaga marutithanie wĩra wa gũthondeka thĩ yothe marĩ hamwe ĩtuĩke paradiso, o ta ũrĩa mũgũnda wa Edeni wahaanaga. No ũguo tiguo gwathiire. Nĩkĩ? Nĩ tũkwĩruta ũndũ ũcio gĩcunjĩ-inĩ kĩrĩa kĩrũmĩrĩire.