Marakara nĩ Moru

Adamu na Hawa mauma mũgũnda-inĩ wa Edeni, nĩ maagĩire na ciana nyingĩ. Mũriũ wao wa mbere, Kaini, aarĩ mũrĩmi, nake wa kerĩ, Habili, aarĩ mũrĩithi.

Mũthenya ũmwe, Kaini na Habili nĩ maarutĩire Jehova magongona. Hihi nĩ ũĩ igongona nĩ kĩĩ? Nĩ kĩheo kĩa mwanya. Jehova nĩ aakenirio nĩ igongona rĩa Habili, no ndaakenirio nĩ rĩa Kaini. Ũndũ ũcio nĩ warakaririe Kaini mũno. Jehova nĩ aamũkaanirie na akĩmwĩra atĩ marakara macio no matũme eke ũndũ mũũru. No Kaini ndaathikĩrĩirie.

Handũ ha ũguo, Kaini eerire Habili ũũ: ‘Ũka tũthiĩ werũ-inĩ.’ Rĩrĩa maarĩ werũ-inĩ marĩ oiki, Kaini nĩ aatharĩkĩire mũrũ wa nyina na akĩmũũraga. Jehova angĩekire atĩa nĩ ũndũ wa gĩĩko kĩu? Aaherithirie Kaini na njĩra ya kũmũingata kuuma famĩlĩ-inĩ yao, na ndangĩetĩkĩririo acoke.

Hihi harĩ ũndũ tũngĩĩruta? Rĩmwe no twambĩrĩrie kũrakara angĩkorũo maũndũ matirathiĩ ũrĩa tũrenda. Tũngĩigua twambĩrĩria kũrakara kana andũ angĩ matwĩre twĩmenyerere nĩ ũndũ nĩ mona tũrĩ na marakara, twagĩrĩire kũgarũrĩra o na ihenya na tũgirĩrĩrie marakara macio matanatũtooria.

Tondũ Habili nĩ eendete Jehova na eekaga ũrĩa kwagĩrĩire, Jehova ndarĩ hingo akaariganĩrũo nĩwe. Ngai nĩ akaariũkia Habili hĩndĩ ĩrĩa agaatua thĩ paradiso.