Jakubu nĩ Aaheirũo Igai

Isaaka aarĩ na mĩaka 40 hĩndĩ ĩrĩa aahikirie Rebeka. Nĩ aamwendete mũno. Thutha wa ihinda nĩ maagĩire tũhĩĩ twĩrĩ twa mahatha.

Ũrĩa warĩ mũkũrũ eetagwo Esau, nake ũrĩa mũnini eetagwo Jakubu. Esau nĩ eendete mũno kũhĩta kwoguo kaingĩ ndaakoragwo mũciĩ, ĩndĩ Jakubu eendete gũikara mũciĩ.

Matukũ-inĩ macio, mwanake ũrĩa mũkũrũ nĩwe waheagwo mũgũnda ũrĩa mũnene na mbia iria nyingĩ nĩ ithe. Na rĩu nĩrĩo rĩetagwo igai. Thĩinĩ wa famĩlĩ ya Isaaka, igai rĩu rĩahutĩtie nginya ciĩranĩro iria Jehova eerĩire Iburahimu. Esau ndaatindanagĩra mũno na ciĩranĩro icio, ĩndĩ Jakubu nĩ aamenyaga atĩ ciarĩ cia bata mũno.

Mũthenya ũmwe Esau nĩ aakinyire kwao arĩ mũnogu mũno tondũ aatindĩte akĩhĩta. Nĩ aaiguire mũnungo mwega wa irio iria Jakubu aarugaga na akĩmwĩra ũũ: ‘Ndĩ mũhũtu mũno! He irio icio ndune ũraruga!’ Jakubu akĩmwĩra ũũ: ‘Nĩ ngũkũhe, ĩndĩ no wambire ũhe igai rĩaku.’ Esau akĩmwĩra: ‘Igai rĩakwa rĩngĩndeithia na kĩĩ! No ũrĩoe. Niĩ ndĩrenda o kũrĩa.’ Hihi nĩ ũkuona ta Esau eekire ũndũ wa ũũgĩ? Aca o na hanini. Esau aaheanire kĩndũ kĩa goro mũno nĩ ũndũ wa irio thani ĩmwe.

Isaaka aakũra, ihinda nĩ rĩakinyire rĩa kũrathima mũriũ wake ũrĩa mũkũrũ. No Rebeka nĩ aateithirie Jakubu, mũrũ wake ũrĩa mũnini nĩguo arathimwo arĩ we. Rĩrĩa Esau aamenyire ũguo, nĩ aarakarire mũno na akĩbanga kũũraga mũrũ wa nyina. Isaaka na Rebeka nĩ meendaga kũgitĩra Jakubu, na kwoguo makĩmwĩra ũũ: ‘Thiĩ ũgaikare na mamaguo Labani, nginya Esau ahoorerie marakara.’ Jakubu nĩ aathikĩrĩirie motaaro ma aciari ake na agĩthiĩ nĩguo ndakoragwo.